Psalms 118

¹Loof die Here, want Hy is goed, aan sy liefde is daar geen einde nie!

²Israel moet getuig: “Aan sy liefde is daar geen einde nie.”

³Die huis van Aäron moet getuig: “Aan sy liefde is daar geen einde nie.”

⁴Dié wat die Here dien, moet getuig: “Aan sy liefde is daar geen einde nie.”

⁵In my nood het ek na die Here geroep, die Here het my gebed verhoor en my bevry.

⁶Die Here is by my, ek ken geen vrees nie; wat kan 'n mens aan my doen?

⁷Die Here is by my, Hy help my: ek sal neerkyk op dié wat my haat.

⁸Om by die Here te skuil, is beter as om op mense te vertrou.

⁹Om by die Here te skuil, is beter as om op hoë mense te vertrou.

¹⁰Nasies het van alle kante af op my afgestorm. In die Naam van die Here het ek hulle aanval afgeslaan.

¹¹Hulle het my omsingel, my van alle kante bestorm. In die Naam van die Here het ek hulle aanval afgeslaan.

¹²Hulle het soos bye om my gepak, maar hulle het verdwyn soos doringtakke in 'n vuur. In die Naam van die Here het ek hulle aanval afgeslaan.

¹³My vyande wou my platloop en my ondergang bewerk, maar die Here het my gehelp.

¹⁴Die Here is my krag en my beskerming. Dit is Hy wat my gered het!

¹⁵Hoor die gejuig in die laer van die oorwinnaars: “Die Here doen kragtige dade,

¹⁶die Here triomfeer, die Here doen kragtige dade!”

¹⁷Ek sal nie sterwe nie, ek sal lewe en van die dade van die Here getuig.

¹⁸Die Here het my swaar gekasty, maar my nie aan die dood oorgegee nie.

¹⁹Maak die tempelpoort vir my oop: ek wil ingaan en die Here loof.

²⁰Dit is die poort na die Here toe; regverdiges mag daardeur ingaan.

²¹Ek wil U loof omdat U my gebed verhoor en my gered het.

²²Die klip wat deur die bouers afgekeur is, juis hy het die belangrikste klip in die gebou geword.

²³Dit is deur die Here gedoen en is 'n wonder in ons oë!

²⁴Dit is die dag wat die Here gemaak het; laat ons daaroor juig en bly wees.

²⁵Red tog, Here, gee tog voorspoed, Here!

²⁶Prys hom wat in die Naam van die Here kom! Ons seën julle uit die huis van die Here.

²⁷Die Here is God; Hy skenk ons die lewe. Begin die fees! Wuif met takke! Gaan tot by die horings van die altaar.

²⁸U is my God, U wil ek loof; my God, u grootheid wil ek besing.

²⁹ Loof die Here, want Hy is goed, aan sy liefde is daar geen einde nie.