Psalms 26

¹Van Dawid. Laat reg aan my geskied, Here, want ek is onskuldig. Ek het op die Here vertrou en nie getwyfel nie.

²Toets my, Here, keur my, ondersoek my deur en deur.

³Ek laat my deur u liefde lei en ek lewe deur u trou.

⁴Ek hou my nie op met bedrieërs nie en met agterbakse mense gaan ek nie om nie.

⁵Ek vermy die geselskap van misdadigers en hou my nie op met goddeloses nie.

⁶As 'n onskuldige, Here, was ek my hande en draai ek na u altaar toe

⁷om my loflied te sing en van al u wonders te vertel.

⁸Here, u woonplek, die tuiste van u heerlikheid, het ek lief.

⁹Moet my tog nie saam met die sondaars, met die moordenaars laat omkom nie.

¹⁰Daar is bedrog in hulle hande, hulle regterhande is vol omkoopgeld.

¹¹Maar ek is onskuldig. Red my en wees my genadig;

¹²dan is my pad vorentoe gelyk en sal ek die Here prys in die samekoms van die gemeente.