Psalms 34

¹'n Lied van Dawid. Hy het hom kranksinnig gehou by Abimelek. Dié het hom weggejaag en hy het padgegee.

²Ek sal die Here altyd weer prys, sy lof sal altyd op my lippe wees.

³Ek sal die roem van die Here sing; dié wat swaar kry, sal dit hoor en daaroor bly wees.

⁴Sing saam met my oor die grootheid van die Here en laat ons saam sy Naam prys.

⁵Ek het die Here aangeroep en Hy het my geantwoord, Hy het my gered uit alle doodsgevare.

⁶Dié wat swaar kry, sien op na Hom en straal van blydskap, hulle word nie teleurgestel in hulle verwagting nie.

⁷Ek is een van die ellendiges wat geroep het. Die Here het gehoor, uit al my benoudhede het Hy my gered.

⁸Die Engel van die Here slaan sy laer op rondom dié wat die Here dien, en red hulle.

⁹Kom ondervind en sien self dat die Here goed is! Dit gaan goed met die mens wat by Hom skuil.

¹⁰Julle wat aan die Here behoort, dien Hom! Wie Hom dien, het geen gebrek nie.

¹¹Selfs leeus ly gebrek en kry honger, maar wie die Here se hulp vra, kom niks kort van al die goeie dinge nie.

¹²Kom, kinders, luister na my! Ek wil julle leer hoe om die Here te dien.

¹³As iemand die lewe liefhet en 'n lang lewe begeer om die goeie te geniet,

¹⁴moet hy sy tong weerhou van kwaadpraat en sy lippe van leuens.

¹⁵Bly weg van die kwaad af en doen wat goed is, soek vrede en jaag dit na!

¹⁶Die Here sorg vir die regverdiges en luister na hulle hulpgeroep.

¹⁷Maar Hy tree op teen dié wat kwaad doen en vee selfs die herinnering aan hulle van die aarde af.

¹⁸As die regverdiges om hulp roep, hoor die Here hulle en red Hy hulle uit al hulle benoudhede.

¹⁹Die Here is naby die gebrokenes, Hy help die moedeloses.

²⁰Al word die regverdige ook deur hoeveel rampe getref, die Here red hom uit almal.

²¹Die Here sorg vir die hele liggaam van die regverdige: geen been word gebreek nie.

²²Die kwaad wat die goddelose doen, bewerk sy eie ondergang: vir sy vyandskap teen die regverdige sal hy boet.

²³Die Here maak sy dienaars vry. Wie by Hom skuil, sal nie as skuldige behandel word nie.