Psalms 38

¹'n Psalm van Dawid. 'n Herinnering.

²Moet my tog nie in u toorn bly straf nie, Here, en my langer in u gramskap tugtig nie.

³U pyle het my getref, u hand lê swaar op my.

⁴Deur u toorn is daar nie meer 'n gesonde plek aan my liggaam nie, deur my sonde is daar nie meer 'n heel plek aan my lyf nie.

⁵Ja, my ongeregtighede het my oorweldig soos 'n las wat vir my te swaar is.

⁶My wonde stink en sweer, en dít deur my eie dwaasheid.

⁷Ek is krom en inmekaar getrek, ek loop die hele dag en treur,

⁸want my lyf brand van die koors en daar is nie meer 'n gesonde plek aan my liggaam nie.

⁹Ek is gedaan en heeltemal platgeslaan, my hart jaag en ek brul van die pyn.

¹⁰U weet waarna ek smag, Here, my gesmeek is vir U geen geheim nie.

¹¹My hart jaag, my krag het ingegee, ek kan nie eers meer sien nie.

¹²My siekte hou my familie en my vriende ver van my af, en my bure kom nie naby my nie.

¹³Dié wat my lewe soek, stel vir my strikke, dié wat daarop uit is om my kwaad aan te doen, praat al klaar van my ondergang; die hele dag deur dink hulle vals beskuldigings teen my uit.

¹⁴Maar ek hou my doof, ek hoor niks, ek hou my stom, ek maak my mond nie oop nie.

¹⁵Ek het geword soos 'n man wat niks hoor nie en wat niks het om te antwoord nie.

¹⁶Ek vertrou op U, Here, U sal antwoord, Here my God.

¹⁷Ek vra U: “Moenie dat hulle hulle verlustig in my leed en hulle groot hou as die lyding vir my te veel word nie.”

¹⁸Ek kan dit byna nie meer uithou nie, ek is nooit sonder pyn nie.

¹⁹Ek bely my ongeregtigheid, my sonde kwel my.

²⁰My vyande is vol lewenskrag en daar is so baie wat my sonder rede haat,

²¹wat my kwaad vir goed vergeld en teen my is omdat ek die goeie najaag.

²²Moet my tog nie verlaat nie, Here, my God, moenie ver van my af bly nie!

²³Maak tog gou om my te help, Here, my Redder!