Psalms 48

¹'n Lied. 'n Psalm van die Koragiete.

²Die Here is groot! Aan Hom kom al die lof toe hier in die stad van ons God, hier op sy heilige berg,

³mooi, hoog geleë, en 'n vreugde vir die hele aarde, Sionsberg teen die noorde, die stad van die Groot Koning.

⁴In hierdie goed versterkte stad het God Hom as beskermer geopenbaar.

⁵Konings het bymekaargekom en as een mag opgetrek,

⁶maar skaars het hulle die stad gesien of hulle het bang geword en verskrik op die vlug geslaan.

⁷Angs het hulle daar beetgepak, vrees soos dié van 'n vrou wat 'n kind in die wêreld bring,

⁸angs soos toe U met die oostewind die skepe van Tarsis verpletter het.

⁹Soos ons daarvan gehoor het, het ons dit self ervaar hier in die stad van die Here, die Almagtige, in die stad van ons God, die stad wat Hy vir altyd vas laat staan. Sela

¹⁰Hier in u tempel oordink ons u trou, o God.

¹¹Net soos u Naam, o God, so strek u lof oor die hele aarde. U mag het groot redding gebring.

¹²Sionsberg moet bly wees, die stede van Juda moet oor u reddingsdade juig!

¹³Gaan om Sion, trek reg rondom, tel sy torings,

¹⁴bewonder sy mure, bekyk sy versterkings, sodat julle dit aan 'n volgende geslag kan vertel!

¹⁵Dié God is ons God vir altyd; Hy sal ons altyd lei.