Psalms 64

¹Vir die koorleier. 'n Psalm van Dawid.

²Hoor my as ek kla, o God, beskerm my lewe teen die bedreiging van die vyand!

³Bewaar my van die komplotte van kwaadwilliges, van die kwaadstokery van mense wat onreg doen,

⁴wat met skerp tonge vir swaarde en giftige woorde vir pyle

⁵uit hinderlae lostrek op 'n onskuldige mens. Uit die bloute trek hulle selfversekerd op hom los.

⁶Hulle smee bose planne en kom ooreen om strikke te stel. Hulle dink niemand sien hulle nie.

⁷Hulle beplan skelmstukke en sê: “Ons het 'n volmaakte komplot gesmee, want wat binne in 'n mens is, wat hy uitgedink het, is 'n geheim.”

⁸Dan tref God hulle met 'n pyl, en meteens is hulle daarmee heen:

⁹hulle eie tonge het hulle tot 'n val gebring! Elkeen wat dit sien, knik met voldoening die kop.

¹⁰Met groot ontsag getuig almal dan van die dade van God omdat hulle insig gekry het in wat Hy doen.

¹¹Laat die regverdige hom in die Here verbly en sy toevlug by Hom soek, laat al die opregtes Hom prys.