Psalms 83

¹'n Lied. 'n Psalm van Asaf.

²Moet tog nie afsydig staan nie, o God, moet tog nie stilbly en niks doen nie!

³Kyk hoe gaan u vyande teen U te kere, hoe verset u teëstanders hulle teen U.

⁴Teen u volk smee hulle komplotte in die geheim, hulle sweer saam teen dié wat onder u beskerming staan.

⁵Hulle sê: “Kom ons roei hulle uit dat hulle nie meer 'n volk is nie, dat niemand meer die naam Israel sal onthou nie.”

⁶Hulle het eensgesind saamgespan en 'n verbond teen U gesluit:

⁷Edom en die Ismaeliete, Moab en die Hagareërs,

⁸Gebal, Ammon en Amalek, Filistea en die inwoners van Tirus.

⁹Selfs Assirië het by hulle aangesluit; hulle help almal die kinders van Lot. Sela

¹⁰Maak met hulle soos met die Midianiete, soos met Sisera, soos met Jabin by Kisonspruit.

¹¹Hulle is by En-Dor vernietig en hulle lyke het daar op die grond gelê en vergaan.

¹²Maak met hulle leiers soos met Oreb en Seëb, met elkeen van hulle aanvoerders soos met Seba en Salmunna,

¹³wat gesê het: “Kom ons vat die weivelde van God vir ons.”

¹⁴My God, maak tolbosse van hulle, stoppels in die wind,

¹⁵'n bos wat in vuur verteer word, berge wat in vlamme afbrand;

¹⁶jaag hulle met u stormwind, slaan hulle uitmekaar met u orkaan.

¹⁷Laat hulle met skande daarvan afkom! Dan sal hulle weet wie U is, Here!

¹⁸Bring hulle tot skande, maak die lewe vir hulle een lang verskrikking, verneder hulle en wis hulle uit;

¹⁹laat hulle besef dat alleen U die Naam “Here” het, U, die Allerhoogste oor die hele aarde.