Psalms 86

¹'n Gebed van Dawid. Luister tog na my, Here, verhoor my gebed, want ek is hulpeloos en arm.

²Beskerm my, want ek is u troue dienaar, red my, want U is my God, op U vertrou ek.

³Wees my genadig, Here, ek roep die hele dag deur na U.

⁴Maak my bly, Here, ek hunker na U.

⁵U is goed, Here, U vergewe altyd weer, U is getrou teenoor dié wat na U roep om hulp.

⁶Luister na my gebed, Here, gee tog ag op my smeekgebed.

⁷Op die dag van my nood roep ek na U, U sal my gebed verhoor.

⁸Daar is geen god soos U nie, Here, niks kan met u werk vergelyk word nie.

⁹U het al die nasies gemaak; hulle sal voor U kom buig, Here, en aan u Naam die eer gee,

¹⁰want U is groot en doen magtige dade, U alleen is God.

¹¹Leer my u pad, Here, ek wil wandel in u waarheid; leer my U met toewyding dien.

¹²Met my hele hart sal ek U prys, Here my God, u Naam altyd eer,

¹³want u liefde vir my was groot: uit die dieptes van die dood het U my gered.

¹⁴Dit is hovaardige mense wat my aanval, o God, 'n bende geweldenaars wat my wil doodmaak, mense wat met U nie rekening hou nie.

¹⁵U, Here, is 'n barmhartige en genadige God, lankmoedig, vol liefde en trou.

¹⁶Sien my, u dienaar van my geboorte af, in genade aan, gee U my tog krag en red my.

¹⁷Maak my 'n voorbeeld van u goedheid, sodat dié wat my haat, verleë sal moet toesien dat U, Here, my help en vir my uitkoms gee.