Psalms 96

¹Sing 'n nuwe lied tot eer van die Here, sing tot eer van die Here, almal op aarde!

²Sing tot eer van die Here, prys sy Naam, verkondig elke dag sy reddingsdade!

³Vertel die nasies van sy mag, al die volke van sy magtige dade.

⁴Die Here is groot, al die lof kom Hom toe, ontsagwekkend is Hy bo alle gode.

⁵Al die gode van die volke is niks: dit is die Here wat die hemele gemaak het.

⁶Majesteit en luister straal van Hom uit, krag en glans vul sy heiligdom.

⁷Prys die Here, alle volke, prys die Here om sy eer en mag!

⁸Prys die Here om die eer van sy Naam! Kom na sy voorhowe toe, bring vir Hom offers!

⁹Buig voor die Here by sy heilige verskyning; betoon eerbied aan Hom, almal op aarde.

¹⁰Verkondig onder die nasies: “Die Here regeer; die wêreld staan vas, dit wankel nie; die Here sal die volke regverdig oordeel.”

¹¹Die hemele moet bly wees en die aarde moet juig, die see en alles daarin moet druis,

¹²die veld en alles daarop moet jubel, al die bome in die bos moet hulle verheug

¹³voor die Here, want Hy kom, Hy kom om oor die aarde te heers. Hy sal oor die wêreld heers met regverdigheid, oor die volke met billikheid.