Psalms 98

¹'n Psalm. Sing 'n nuwe lied tot eer van die Here, want Hy het magtige dade gedoen, deur sy krag en Goddelike mag het Hy oorwin.

²Die Here het sy oorwinning bekend gemaak, aan die nasies het Hy sy reddingsdade geopenbaar.

³Aan die huis van Israel het Hy sy liefde en sy trou herbevestig; die hele wêreld het gesien dat ons God die oorwinning behaal het.

⁴Juig tot eer van die Here, almal op aarde, wees vrolik, juig en sing!

⁵Sing tot eer van die Here met begeleiding van die lier, speel op die lier en sing.

⁶Blaas die trompet en die ramshoring, jubel tot eer van die Here, die Koning.

⁷Die see en alles daarin moet druis, die aarde en alles daarop moet juig,

⁸die riviere moet hande klap, die berge moet saam juig

⁹voor die Here, want Hy kom om oor die aarde te heers; Hy sal oor die wêreld heers met regverdigheid, oor die volke met billikheid.