Isaiah 3

¹Die Here die almagtige God gaan uit Jerusalem en Juda elke stut en steunpilaar verwyder: almal wat sorg vir brood en water,

²elke weerbare burger, elke soldaat, regter, profeet, waarsêer, leier,

³offisier, hoë amptenaar, raadgewer, kundige vakman en ervare besweerder.

⁴Die Here sal aan onvolwassenes gesag gee oor die volk, wispelturige mense sal oor hulle heers.

⁵Die volk sal mekaar te lyf gaan, man teen man, vriend teen vriend; seuns sal grysaards te lyf gaan, en dié wat nie gesag het nie, die vooraanstaandes.

⁶As iemand sy broer in die ouerhuis pak en sê: “Jy het darem nog behoorlike klere, wees ons leier en regeer oor hierdie vervalle spul,”

⁷sal hy op daardie dag uitroep: “Ek wil nie die leiding neem nie! Daar is nie kos en ook nie behoorlike klere in my huis nie; moet my nie aanstel as leier van die volk nie.”

⁸Jerusalem het gewaggel, Juda het in duie gestort omdat hulle hulle met woord en daad teen die Here en teen sy gesag verset het.

⁹Hulle partydigheid in die regspraak getuig teen hulle. Hulle sondig openlik soos Sodom, hulle steek niks weg nie. Ellende wag vir hulle, hulle het die ramp verdien!

¹⁰Sê vir die regverdiges met húlle sal dit goed gaan; hulle sal die vrug van hulle dade geniet.

¹¹Maar ellende wag vir die skuldiges; wat hulle gedoen het, sal aan húlle gedoen word.

¹²My volk het kinders as regeerders, vrouens as heersers. My volk, jou leiers verlei jou en bring jou van koers af.

¹³Die Here is gereed vir die regsaak, Hy staan klaar om oor die volk te oordeel.

¹⁴Die Here begin die saak teen die leiers en die hoë amptenare van sy volk: Julle het die wingerde gestroop; wat van die hulpeloses geroof is, lê in julle huise.

¹⁵Wat besiel julle dat julle my volk vertrap en die hulpeloses verdruk? vra die Here my God, die Almagtige.

¹⁶Verder het die Here gesê: Omdat die vrouens van Sion hoogmoedig is en kop in die lug rondloop terwyl hulle ogies maak, wegstap met trippelgang en hulle enkelringe laat rinkel,

¹⁷sal Ek, die Here, hulle hare afskeer. Ja, die Here sal hulle koppe kaalskeer.

¹⁸Op dié dag sal die Here die versiersels wegneem: enkelringe, sonnetjies en maantjies,

¹⁹oorbelletjies en armbande, sluiers

²⁰en hooftooisels, voetkettinkies, versierde gordels, reukwater en gelukbringertjies,

²¹ringe en neusringe,

²²feesklere, mantels en tjalies, handsakkies

²³en spieëltjies, spogrokkies, kopdoekies en skouermanteltjies.

²⁴In plaas van reukwater sal daar stank wees, in plaas van 'n gordel 'n tou, in plaas van gekrulde hare 'n kaalkop, in plaas van 'n fyn kledingstuk 'n harige roukleed, in plaas van skoonheid die brandmerk van 'n slaaf.

²⁵Jerusalem, jou manne sal deur die swaard val en jou jongmanne in die oorlog.

²⁶Jou poorte sal treur en rou, en jy sal sonder mense sit.