1 Corinthians 12

¹Wat die gawes van die Gees betref, broers, wil ek hê dat julle ingelig moet wees.

²Julle weet dat, toe julle nog heidene was, julle blindelings na die stom afgode meegevoer is.

³Daarom wil ek hê julle moet weet dat iemand wat sê: “Vervloek is Jesus”, nie deur die Gees van God praat nie; en niemand kan sê: “Jesus is die Here” nie, behalwe deur die Heilige Gees.

⁴Daar is 'n verskeidenheid van genadegawes, maar dit is dieselfde Gees wat dit gee;

⁵daar is 'n verskeidenheid van bedieninge, maar dit is dieselfde Here wat die opdrag gee;

⁶daar is 'n verskeidenheid van kragtige werkinge, maar dit is dieselfde God wat alles in almal tot stand bring.

⁷Aan elkeen afsonderlik word 'n werking van die Gees gegee tot voordeel van almal.

⁸Aan die een word deur die Gees die gawe gegee om 'n woord van wysheid te praat, aan 'n ander 'n woord van kennis deur dieselfde Gees;

⁹aan die een geloof deur dieselfde Gees, aan 'n ander genadegawes van gesondmaking deur die één Gees.

¹⁰Aan die een gee Hy die krag om wonders te doen, aan 'n ander die gawe om te profeteer, en aan nog 'n ander die gawe om tussen die geeste te onderskei. Aan nog een gee Hy die gawe om ongewone tale of klanke te gebruik en aan 'n ander om dit uit te lê.

¹¹Maar al hierdie dinge is die werk van een en dieselfde Gees, wat aan elkeen afsonderlik 'n gawe uitdeel soos Hy wil.

¹²Net soos die liggaam 'n eenheid is en baie lede het, en soos al die lede saam, al is hulle baie, een liggaam vorm, so is dit ook met die liggaam van Christus.

¹³Omdat ons almal een liggaam geword het, is ons almal met die een Gees gedoop, of ons nou Jood of Griek is, slaaf of vry. Ons is almal van die een Gees deurdrenk.

¹⁴Die liggaam bestaan ook nie net uit een lid nie, maar uit baie.

¹⁵As die voet sou sê: “Omdat ek nie 'n hand is nie, is ek nie deel van die liggaam nie,” hou hy om dié rede tog nie op om deel van die liggaam te wees nie.

¹⁶En as die oor sou sê: “Omdat ek nie 'n oog is nie, is ek nie deel van die liggaam nie,” hou hy om dié rede eweneens nie op om deel van die liggaam te wees nie.

¹⁷As die hele liggaam oog was, hoe sou hy kon hoor? En as die hele liggaam oor was, hoe sou hy kon ruik?

¹⁸Maar nou het God die lede, elkeen van hulle afsonderlik, in die liggaam gevoeg soos Hy dit wou hê.

¹⁹As almal saam net een lid was, hoe sou daar 'n liggaam kon wees?

²⁰Nou is daar wel baie lede maar net een liggaam.

²¹Die oog kan nie vir die hand sê: “Ek het jou nie nodig nie.” Die kop kan weer nie vir die voete sê: “Ek het julle nie nodig nie.”

²²Inteendeel, die lede van die liggaam wat as die swakste voorkom, is juis noodsaaklik,

²³en dié wat vir ons minder mooi lyk, klee ons met groter sorg. So word ons minder aansienlike dele besonder mooi gemaak,

²⁴terwyl die aantreklike dele dit nie nodig het nie. God het die liggaam so saamgestel dat Hy groter eer gegee het aan die lid wat eer kortkom,

²⁵sodat daar nie verdeeldheid in die liggaam sou wees nie, maar dat die lede gelyke sorg vir mekaar dra.

²⁶As een lid ly, ly al die lede saam; en as een lid geëer word, is al die lede saam bly.

²⁷Julle is die liggaam van Christus, en afsonderlik is elkeen 'n lid daarvan.

²⁸En in die kerk is daar mense aan wie God 'n bepaalde taak gegee het. Ten eerste is daar apostels, ten tweede profete, ten derde leraars; verder is daar dié wat wonderdade kan doen, dan dié wat genadegawes ontvang het om mense gesond te maak, om hulp te verleen, om leiding te gee of om ongewone tale of klanke te gebruik.

²⁹Is almal miskien apostels? Is almal profete? Is almal leraars? Kan almal miskien wonders doen?

³⁰Het almal die genadegawes om mense gesond te maak? Of gebruik almal miskien ongewone tale of klanke en kan almal dit uitlê?

³¹Lê julle toe op die beste genadegawes.