1 Thessalonians 5

¹Oor die tyd en omstandigheid wanneer hierdie dinge sal gebeur, is dit nie nodig om aan julle te skrywe nie, broers.

²Julle weet self maar alte goed dat die dag van die Here onverwags kom soos 'n dief in die nag.

³Wanneer die mense sê: “Alles is rustig en veilig,” sal die ondergang hulle skielik oorval soos geboortepyne 'n swanger vrou, en niemand sal ontkom nie.

⁴Maar, broers, julle leef nie in die duisternis nie; dié dag sal julle nie soos 'n dief oorval nie.

⁵Julle is tog almal mense van die lig, mense van die dag; ons is nie van die nag of die duisternis nie.

⁶Laat ons dan nie slaap soos die ander nie, maar laat ons wakker bly en nugter wees.

⁷Dié wat slaap, is van die nag; en dié wat hulle dronk drink, is van die nag.

⁸Maar ons wat van die dag is, moet nugter wees; ons moet geloof en liefde as borsharnas dra en die hoop op verlossing as helm.

⁹God het ons tog nie bestem om gestraf te word nie, maar om deur ons Here Jesus Christus verlos te word.

¹⁰Hy het ter wille van ons gesterwe, sodat ons, of ons by sy koms nog lewe of reeds dood is, saam met Hom kan lewe.

¹¹Praat mekaar moed in en versterk mekaar dan met hierdie woorde, soos julle trouens reeds doen.

¹²Broers, ons vra julle: Erken die mense wat so hard onder julle werk en julle in opdrag van die Here lei en teregwys.

¹³Betoon in liefde die hoogste agting aan hulle ter wille van hulle werk. Leef in vrede met mekaar.

¹⁴Ons druk julle dit op die hart, broers: Wys die leeglêers onder julle tereg, praat die kleinmoediges moed in, help die swakkes, wees met almal geduldig.

¹⁵Sorg dat niemand 'n ander mens kwaad vir kwaad vergeld nie. Beywer julle liewer altyd vir die belange van julle medegelowiges en van alle mense.

¹⁶Wees altyd bly.

¹⁷Bid gedurig.

¹⁸Wees in alle omstandighede dankbaar, want dit is wat God in Christus Jesus van julle verwag.

¹⁹Moenie die werking van die Heilige Gees teenstaan nie.

²⁰Moenie profesieë geringskat nie,

²¹maar toets dit alles, behou wat goed is,

²²en bly weg van alles wat sleg is.

²³Mag God, wat vrede gee, julle volkome aan Hom toegewyd maak en julle geheel en al, na gees, siel en liggaam, so bewaar dat julle onberispelik sal wees wanneer ons Here Jesus Christus weer kom!

²⁴Hy sal dit ook doen, want Hy wat julle roep, is getrou.

²⁵Broers, bid ook vir ons.

²⁶Groet al die medegelowiges met 'n soen van Christelike broederskap.

²⁷In die Naam van die Here dring ek by julle daarop aan dat hierdie brief aan al die gelowiges voorgelees word.

²⁸Die genade van ons Here Jesus Christus sal by julle wees.