2 Samuel 14

¹Joaba morwa wa Tseruya a lemoga gobane pelo ya kgoši e hlologetšwe Abesalomo.

²A roma motho a ya kua Thekoa a bitša mosadi wa gona e bego e le yo bohlale, a mo laela a re: Itire motho e a nyamilego pelo, o apare diaparo tša sello; o se ke wa tlola makhura; o itire mosadi yo e lego kgale a llela mohu.

³O tsene go kgoši o bolele le yona ka go re le ka go re. Gomme Joaba a mo ruta se a tlogo se bolela.

⁴Mosadi wa Thekoa a tla a phuhlama a lotšha a inametše fase, a bolela le kgoši a re: Hle Kgoši, namolela!

⁵Kgoši ya re: O ne taba mang? Mosadi a re: Ruri, nna ke mosadi wa mohlologadi; go nna wa ka o hwile.

⁶Bjale nna molata wa gago ke be ke na le barwa ba babedi. Bona bao ba lwa ba le kua nageng; gomme ka ge go se monamoledi, e mongwe a itia e mongwe a mmolaya.

⁷Bjale šedi, moloko ka moka o ntsogetše, nna molata wa gago; ba re: Re ntšhetše mmolai eo wa ngwanabo, re lefeletše polao ya ngwanabo, re fediše moji wa bohwa. Ke gore ba rata go tima legala la ka le le šetšego, gore monna wa ka a se ke a šalelwa ke leina le ge e le lešalela mo lefaseng.

⁸Kgoši ya fetola ya re: Boela lapeng la gago; ke tlo ba botša se ba tlogo go dira sona.

⁹Bjale mosadi eo wa Thekoa a bolela le kgoši a re: Kgoši Mongaka! Molato woo o ka ba mo go nna le go moloko wešo. A o se be go kgoši le go sedulo sa gagwe.

¹⁰Kgoši ya re: Ge motho a ka go senya ka polelo, mo tliše fa go nna; mme a ka se ke a hlwa a go dira selo.

¹¹Mosadi a re: A kgoši a ke a gopole Morena Modimo wa gagwe, gore tshenyego e se ke ya gola e eya ka molefetšamadi ge a ka bolaya morwa wa ka. Kgoši ya re: Ka bophelo bja Morena, le ntsha e tee ya moriri wa morwa wa gago e ka se wele fase.

¹²Mosadi a re: Ako lese nna molata wa gago ke botše wene Kgoši Mongaka taba. Kgoši ya re: Bolela!

¹³Mosadi a re: O reng o eleletša go dira setšhaba sa Modimo ka mokgwa woo? Ka gobane ge wena Kgoši o boletše taba tše, go bjalo ka e ke o re: O ne molato ge o sa gomiše molelekwa wa gago.

¹⁴Gobane re batho ba go hwa; re etša meetse ge a tšhologetše fase, a se ke a hlwa a gobela. Modimo ga a senye bophelo bja motho; se Modimo a se eleletšago ke gore, molelekwa a se dule a lelekilwe, a le kgole le Modimo.

¹⁵Bjale ge ke tlile ka bolela taba ye le wena Kgoši Mongaka, ke ka gobane ke tšhogile batho. Ke mo nna molata wa gago ke itšego: Ke tlo ya ke bolele le kgoši; mohlomong kgoši o tlo dira se nna molata wa gagwe ke se bolelago.

¹⁶Ka re: Kgoši e tlo kwa, mme e tlo namolela nna molata wa yona seatleng sa monna e a ratago go fediša nna le ngwana wa ka, gore bohle re tšwe mo nageng yeno ya Modimo.

¹⁷Gomme nna molata wa gago ka re: Lentšu la kgoši mongaka le tlo nkuša pelo; ka gobane wena Kgoši Mongaka o boka morongwa wa Modimo, o kwa tše di botse le tše mpe; gomme Morena Modimo wa gago o tlo ba le wena.

¹⁸Bjale kgoši ya fetola ya re: O se ke wa nkutela se ke tlogo go botšiša bjale. Mosadi a re: Kgoši Mongaka a a botšiše.

¹⁹Kgoši ya re: A ga o a lakana le Joaba mo tabeng ye ka moka? Mosadi a fetola a re: Ka bophelo bja gago, Kgoši Mongaka, ga go e a kago efogela thoko ya le letona goba ya la ntsogošo ge go bolela wene Kgoši Mongaka. Ke Joaba mohlanka wa gago e a nthomilego, ke yena a nthutilego ditaba tše ka moka.

²⁰Joaba mohlanka wa gago o dirile ka mokgwa wo, gore taba ye e fetolwe e tle e fele. Gomme bohlale bja gago Mongaka bo etša bja morongwa wa Modimo ka go tseba tšohle tša lefaseng.

²¹Gomme kgoši ya bolela le Joaba ya re: Šedi ge, tše ke di dirilego; bjale yaa o goroše lesogana leo, Abesalomo.

²²Joaba a napa a lotšha a inametše fase, a reta kgoši a re: Lehono nna mohlanka wa gago ke mo ke lemogilego gobane o ntebelela ka botho, Kgoši Mongaka; kgoši o dirile se nna mohlanka wa gago ke bego ke era sona.

²³Joaba a tsoga a ya Gesuri; a boela Jerusalema a na le Abesalomo.

²⁴Kgoši ya re: A a boele ngwakong wa gagwe, a se ke a tla a lebana le nna. Abesalomo a ya ngwakong wa gagwe, a se ke a bonana le kgoši.

²⁵Gomme mo setšhabeng ka moka sa Isiraele go be go se na monna wa go ka swana le Abesalomo ka botse bja sebopego. O be a retwa gagolo. Go tloga lwaong go fihla phogong go be go se bosodi mo go yena.

²⁶E be e re mohla a kutwa hlogo, boima bja meriri ya gagwe ya ba sekele tša makgolo a mabedi ka kelo ya mošate. O be a segwa meriri gatee ka ngwaga; a kutwa ka gobane e be e mo imela.

²⁷Gomme Abesalomo a belegelwa barwa ba bararo le morwedi o tee, Thamara, mosetsana wa sebopego se sebotse.

²⁸Gomme Abesalomo a dula motseng wa Jerusalema, gwa fela nywaga e mebedi a sešo a bonana le kgoši.

²⁹Abesalomo a roma motho a bitša Joaba gore a tle a mo iše go kgoši. Joaba a gana go tla. A buša a roma la bobedi; Joaba a fela a gana go tla.

³⁰Abesalomo a roma bahlanka ba gagwe a re: Le a bona, tšhemo yela ya Joaba e bapetšego le ya ka, e na le mabele. Yang le e tšhume ka mollo.

³¹Ke mo Joaba a tsogilego a tla lapeng la Abesalomo a re: Bahlanka ba gago ba reng ba fišitše mabele a ka?

³²Abesalomo a fetola a re: O ko bone; ke romile motho ka go botša ka re: Tlaa o nkele go kgoši, o mpotšišetše o re: Ke tlogetšeng Gesuri ka tla mono? Go ka be go le kaone ge nka be ke sa dutše ntshe. Bjale ke rata go bona sefahlogo sa kgoši. Fela, ge go nna go sa na le molato, napa o mpolaye.

³³Joaba a ya go kgoši a e anegela taba ye; a bitša Abesalomo, a tsena go kgoši, a lotšha a inametše fase pele ga kgoši. Gomme kgoši ya atla Abesalomo.