2 Samuel 23

¹Šea mantšu a mafelelo a Dafida: Moeno wa Dafida morwa wa Isai, moeno wa monnamorokami, motlotšwa wa Modimo wa Jakobo, seretiserategi sa Isiraele.

²Moya wa Morena o bolela ka nna, leleme la ka le ne foko lagwe.

³Modimo wa Isiraele o ntheretše, lentswe la Isiraele o mpoditše. Mmuši wa batho moloki, mmuši mmoifamodimo.

⁴O etša seedi ka meso, o etša tšatši ge le hlaba ka moswana go se maru, le gadima mola pula e khudile, bjang bja mela mo faseng.

⁵Ruri, o bjalo ngwako wa ka ka Modimo; o ntlemile ka kgwerano ya ka mehla, a e diga ka botlalo ya bolokwa. Go phologa ga ka gohle, le lethabo lohle, ke yena a di tšweletšago.

⁶Ba dihlola bohle, ke baetšameetlwa ya go lahlwa, ka gobane e sa swarwe ka seatla;

⁷monna wa go e swara o kgona ka tshipi, le ka theko ya lerumo, ya fišwa ka mollo ya fela e le gona moo felo ga yona.

⁸Šea maina a bagale ba Dafida: Joseba Basebethe wa Thakemoni, yena e mogolo wa bagale, o kile a retha lerumo la gagwe a bolaile ba makgolo a mararo ka lebaka letee.

⁹A hlatlangwe ke Eleasara morwa wa Dodo morwa wa Ahohi, e mongwe wa bagale ba bararo ba ba bego ba na le Dafida mohla ba rumola Bafilisita ba kgobokanetše go hlabana, mme banna ba Isiraele ba rotoga.

¹⁰Yena o kile a tsoga a bolaya Bafilisita, seatla sa gagwe sa ba sa lapa se kgomaretše tšhoša. Mohlang woo Morena a ba fa phenyo e kgolo; batho ba boa ba mo šetše morago ba rebola fela.

¹¹A hlatlangwa ke Sama morwa wa Age wa Harari. Mola Bafilisita ba bokane kua Lehi, gona moo go be go na le serapa sa dihlodi. Ya re ge setšhaba se tšhaba Bafilisita,

¹²Sama a ema mo gare ga serapa a se amoga Bafilisita a ba bolaya; Morena a mo nea phenyo e kgolo.

¹³Ba bararo ba, bona diketapele tša bao ba masome a mararo, ba tlile go Dafida mola a le mphomeng wa Adulama ka lebaka la puno. Ke ge sehlopha sa Bafilisita se bokane mo moeding wa Refaima.

¹⁴Dafida o be a le sebong mohla woo; gomme mošaša wa Bafilisita o be o le mo Betlehema.

¹⁵Dafida ge a ekwa lenyora, a re: Ke mang e a kago nkgela meetse a go nwa a sediba sa kgorong ya Betlehema?

¹⁶Gomme bagale ba bararo bao ba hlaga gare ga mošaša wa Bafilisita, ba ga meetse a sediba sa mo kgorong ya Betlehema, ba bao nao ba tla go Dafida; gomme yena a gana go a nwa, a a tšhollela Morena,

¹⁷a re: Morena, anke ke se ke ka ba ka nwa meetse a kego ke madi a banna ba ba bego ba gafile bophelo bja bona. Gomme a gana go nwa. Ke sona se se dirilwego ke ba bararo bao.

¹⁸Abisai ngwanabo Joaba morwa wa Tseruya e be e le yena molaodi wa ba bararo ba; o kile a retha lerumo la gagwe a bolaile ba makgolo a mararo, a retwa ke ba bararo bao.

¹⁹Ba bararo bao ba be ba mo reta, a ba a ba molaodi wa bona. Fela, o be a sa lekane le bona ba bararo bao ba pele.

²⁰E mongwe e be e le Benaya morwa wa Joyada morwa wa monna wa bogale e a dirilego tše kgolo, wa motse wa Kabatsiele. Yena o kile a bolaya ditau tše pedi kua Moaba, a ba a tsena a bolaya tau e le legageng mohla go nele leswela.

²¹O kile a bolaya monna wa Moegipita, monna wa kokoto, e a bego a swere tšhoša. Benaya a mo thoma a swere thoka fela; a ubula tšhoša e bego e swerwe ke Moegipita yo, a mmolaya ka yona.

²²Ke tšona tše di dirilwego ke Benaya morwa wa Joyada. O be a retwa ke ba bararo bala.

²³O be a tumišwa go fetiša ba masome a mararo; fela, o be a sa lekane le ba bararo bala. Dafida o mo dirile molaodi wa dikala.

²⁴Asahele ngwanabo Joaba e be e le e mongwe wa ba masome a mararo, le Elihanani morwa wa Dodo wa Betlehema.

²⁵Le Sama wa Harodi, le Elika wa Harodi,

²⁶le Heletse wa Phaliti, le Ira morwa wa Ikese wa Thekoa,

²⁷le Abiesere wa Anathothe, le Mebunai wa Husathi,

²⁸le Tsalamoni wa Ahohi, le Maharai wa Netofa,

²⁹le Helebe morwa wa Baana wa Netofa, le Ithai morwa wa Ribai wa Gibea wa ga Benyamini,

³⁰le Benaya wa Pirathoni, le Hidai wa dinokaneng tša Goase,

³¹le Abi Aliboni wa Araba, le Asimawethe wa Barahumi,

³²le Eliaba wa Salaboni, le barwa ba Jaseni Jonathane,

³³le Sama wa Harari, le Ahiama morwa wa Sarara wa Harari,

³⁴le Elipelete morwa wa Ahasibai morwa wa monna wa Maakati, le Eliama morwa wa Ahitofele wa Gilo,

³⁵le Hetsero wa Karamele, le Paarai wa Arabi,

³⁶le Jegaele morwa wa Nathane wa Tsoba, le Bani wa Gadi,

³⁷le Tseleke Moamoni, le Naharai wa Beerothe morwadi wa marumo a Joaba morwa wa Tseruya,

³⁸le Ira wa Jithira, le Garebe wa Kithira, le Uria Mohethe. Bona ba ka moka ke ba masome a mararo a metšo e šupago.