1 Kings 1

¹Kgoši Dafida mola e le mokgalabje, a tšofetše, o be a sa ruthele, le ge ba mo apeša dikobo.

²Bahlanka ba gagwe ba bolela nae ba re: A kgoši mong wa rena a ke a tsomelwe mosetsana wa kgarebe, e a kago oka kgoši, e a fepe, a robale a e gokaretše, gore kgoši mong wa rena a ruthele.

³Ba nyaka mosetsana yo botse mo dileteng tša Isiraele ka moka; ba hwetša Abisaga wa Sunema, ba mo tliša go kgoši.

⁴Mosetsana eo e be e le yo botse ka kudu a tla a ba mooki wa kgoši, a e direla; fela kgoši ga ya ka ya mo tseba.

⁵Adonia morwa wa Hagithi o kile a tsoga a re: Kgoši e tlo ba nna! A inyakela koloi, le banamedi ba dipitsi, le banna ba masome a mahlano ba go eta pele.

⁶Gomme tatagwe ga a ka a ba a mo kgala mola a sa phela, a se ke a re: O reng o dira dilo tše bjalo? Le gona Adonia e be e le yo botse sebopego; o be a belegwe ke Hagithi, a hlatlama Abesalomo.

⁷Gomme o be a lakane le Joaba morwa wa Tseruya, le Abyathara moperisita; bona ba mo thuša, ba ema le yena.

⁸Ge e le Tsadoko moperisita, le Benaya morwa wa Joyada, le Nathane moporofeta, le Simei, le Rei, le bagale ba Dafida, bona ga ba ka ba ema le Adonia.

⁹Adonia a ya a hlaba dinku le dikgomo tše di nonnego; e be e le kua leswikeng la Segelethe sedibeng sa Rogele; a bitša bana babo barwa ba kgoši bohle, le banna ba Juda bohle ba bahlanka ba kgoši.

¹⁰A lesa go bitša Nathane moporofeta, le Benaya, le bagale, le Salomo.

¹¹Ke mo Nathane a boletšego le Batseba mmago Salomo a re: A ga o a ka wa di kwa gobane Adonia morwa wa Hagithi o beilwe kgoši, mong wa rena Dafida a sa tsebe?

¹²Bjale tlaa ke go eletše gore o phološe bophelo bja gago le bophelo bja Salomo morwa wa gago.

¹³Yaa o tsene go kgoši o bolele o re: Kgoši mong wa ka! A ga wa ka wa enela nna molata wa gago wa re: E a tlogo ntatela bogošing ke Salomo morwa wa gago? Wa re: Ke yena a tlogo dula sedulong sa ka? Bjale ke ka baka lang ge Adonia a dirilwe kgoši?

¹⁴E tlo re ge o sa bolela le kgoši, go tlo tsena nna ke go šetše morago, gore ke tlatše polelo ya gago.

¹⁵Batseba a tsena go kgoši phapošing. Gomme kgoši e be e tšofetše gagolo, e okwa ke Abisaga wa Sunema.

¹⁶Batseba a phuhlama a lotšha; kgoši ya re: O nyakang?

¹⁷Batseba a re: Mongaka! O kile wa enela nna molata wa gago ka Morena Modimo wa gago wa re: E a tlogo ntatela bogošing ke Salomo morwa wa gago? Wa re: Ke yena a tlogo dula sedulong sa ka?

¹⁸Bjale Adonia šole, ke yena kgoši; gomme wena Kgoši mongaka ga o di tsebe.

¹⁹E bile o hlabile dipholo, le tše di nonnego, le dunku tše ntši, gomme o biditše barwa ba kgoši bohle le Abjathara moperisita, le Joaba molaodi wa dira. Ge e le Salomo mohlanka wa gago ga a ka a mo laletša.

²⁰Bjale wena Kgoši mongaka! Mahlo a Isiraele ka moka a lebeletše wena, gore o ba tsebiše e a tlogo go latela a dula sedulong sa kgoši.

²¹Ge o ka lesa go dira ka mokgwa wo, gona mohla o ithobalelago le botatago, wena Kgoši mongaka, nna le Salomo ngwanake re tlo sengwa disenyi.

²²Batseba a sa bolela le kgoši, gwa ba go tsena Nathane moporofeta.

²³Ba botša kgoši ba re: Nathane moporofeta šo! A tsena go kgoši, a lotšha a inametše fase pele ga kgoši.

²⁴Nathane a bolela a re: Kgoši mongaka! Afa ke wena o laetšego wa re Adonia a go latele bogošing, a dule sedulong sa gago?

²⁵Gabone Adonia lehono o tšwele a yo hlaba dipholo, le tše di nonnego, le dinku tše ntši; gomme o biditše barwa, ba kgoši bohle, le balaodi ba dira, le Abyathara moperisita. Gomme šebala, ba a ja, ba a nwa ba šikile le yena, ba re: Kgoši Adonia a a phele!

²⁶Ge e le nna mohlanka wa gago, le Tsadoko moperisita, le Benaya morwa wa Joyada, le Salomo mohlanka wa gago, ga a ka a re bitša.

²⁷Ge taba ye e ka ba e tšwele go wena Kgoši, gona rena bahlanka ba gago ga wa ka wa re tsebiša e a tlogo go latela a dula sedulong sa gago, mong a rena.

²⁸Ke mo kgoši Dafida a fetotšego a re: Bitšang Batseba a tle fa. Batseba a tsena a ema pele ga kgoši.

²⁹Kgoši ya ena ya re: Ka bophelo bja Morena e a phološitšego moya wa ka mo dikotsing ka moka,

³⁰lehono ke tlo dira se ke go enetšego sona ka Morena Modimo wa Isiraele ka re: Salomo morwa wa gago ke yena a tlogo ntatela bogošing, e a tlogo dula sedulong sa ka bakeng sa ka.

³¹Batseba a phuhlama a inamela fase a lotšha a re: A kgoši Dafida mong wa ka a phele ka go sa felego!

³²Ke mo Dafida a itšego: Bitšang Tsadoko moperisita a tle fa, le Nathane moporofeta, le Benaya morwa wa Joyada. Ba bitšwa ba tla.

³³Kgoši ya laela ya re: Bitšang bahlanka ba mong wa lena, ba ye le lena, mme Salomo morwa wa ka le mo nametšeng meila ya ka, le mo iše Gihone.

³⁴Gomme Tsadoko moperisita le Nathane moporofeta ba mo tlotše le le gona kua, ba mmee kgoši ya Isiraele; gomme le letše phalafala le re: Kgoši Salomo a phele!

³⁵Le tsebo rotoga le mo šetše nthago, a tle a dule sedulong sa ka, ka gobane ke yena a tlogo ba kgoši legatong la ka; ke beile yena gore e be moetapele wa Isiraele le Juda.

³⁶Gwa fetola Benaya morwa wa Joyada a re: Amene! Le Morena Modimo wa Kgoši mongaka a ke a realo!

³⁷A be le Salomo bjalo ka ge a be a na le kgoši mong wa ka; a godiše sedulo sa gagwe se be se fete sa kgoši Dafida mong wa ka.

³⁸Ke moka Tsadoko moperisita, le Nathane moporofeta, le Benaya morwa wa Joyada, le madira a mošate, ba tšwa ba yo nametša Salomo meila ya kgoši Dafida, mme ba mo iša Gihoni.

³⁹Tsadoko moperisita a tla a swere lenaka la setlolo sa ngwakong o mokgethwa, a tlotša Salomo. Ba napa ba letša phalafala, gomme setšhaba ka moka sa re: Kgoši Salomo a a phele!

⁴⁰Bjale batho ka moka ba rotoga ba mo šetše nthago ba letša phalafala, ba thabile, e le lethabo le legolo, lefase la palega ka lehoa la bona.

⁴¹Adonia a di kwa, le bohle ba ba bego ba na nae, ba šetše ba feditše go ja. Le Joaba ge a ekwa mollo wa phalafala a re: Mekgoši yeo, le lešata leo, di reng?

⁴²A sa realo ke ge go fihla Jonathane morwa wa Abyathara moperisita. Adonia a re: Tlaa, gobane o monna wa senatla; o tliša taba e botse.

⁴³Jonathane a fetola a re: Go bjalo! Kgoši Dafida mong wa rena o beile Salomo kgoši.

⁴⁴Kgoši e romile Tsadoko moperisita, le Nathane moporofeta, le Benaya morwa wa Joyada, le madira a mošate, ba ya ba mo nametša meila ya kgoši.

⁴⁵Tsadoko moperisita, le Nathane moporofeta, ba ya ba mo tlotša a ba kgoši ba le kua Gihoni; ba rotoga ntshe ka go thaba, motse wa ka wa tlala modumo. Ke ona mašata a le a kwelego.

⁴⁶Bjale Salomo o dutše sedulong sa bogoši.

⁴⁷Gomme bahlanka ba kgoši le bona ba tsene ba dumediša kgoši Dafida ka ditšhegofatšo ba re: Modimo wa gago a a šetše leina la Salomo le be le fete la gago, a godiše sedulo sa gagwe se be se fete sa gago. Gomme kgoši ya lotšha e le mo dilaong,

⁴⁸ya ba ya rapela ya re: A go lebogwe Morena Modimo wa Isiraele ge lehono a beile wa go dula sedulong sa ka, mme ka mmona ka mahlo a ka.

⁴⁹Gomme bohle ba ba bego ba laleditšwe ke Adonia mme ba tla ba dula nae, bjale ba tsoga ba tšhogile; ba tloga bohle ba ikela mo ba yago.

⁵⁰Adonia yena ka gobane a boifa Salomo, a ya a itshwarelela ka dinaka tša aletare.

⁵¹Salomo a tsebišwa gore Adonia šole o boifa kgoši Salomo; o itshwareletše ka dinaka tša aletare, mme o re: Kgoši Salomo a a nkenele gore a ka se ke a mpolaya ka lerumo, nna mohlanka wa gagwe.

⁵²Salomo a re: Ge e ka ba ke motho wa makgonthe, gona le moriri o tee wa hlogo ya gagwe o ka se ke wa wela fase; fela, ge go ka hwetšwa bobe mo go yena, gona o tlo bolawa.

⁵³Gomme kgoši Salomo a roma motho, a boa nae a etšwa kua aletareng. Adonia a lotšha kgoši Salomo. Salomo a mo rera a re: Yaa ngwakong wa gago.