1 Chronicles 21

¹Sathane o kile a tsoga a senyetša Isiraele, a tutuoetša Dafida gore a bale Isiraele.

²Dafida a roma Joaba le bakgoma ba setšhaba a re: Yang le bale Isiraele, le thome Bereseba le gome ka Dani; mme le tliše palo ya bona go nna, ke tle ke e tsebe.

³Joaba a re: Morena a ke a atiše setšhaba sa gagwe galekgolo! Kgoši mong aka, a ga ke re ka moka ga bona ke bahlanka ba gago! Ke ka baka lang ge wena mong aka o nyaka tše bjalo? Isiraele o tlo hlolelwa molato ka baka lang?

⁴Fela, lentšu la kgoši la fenya la Joaba. Joaba a tšwa, a ralala Isiraele ka moka, a ba a boela Jerusalema;

⁵a nea Dafida palo ya setšhaba. Baisiraele ka moka e be e le dikete tše makgolo a lesome le motšo o tee ba bahlabani; gomme bana ba Juda e be e le banna ba dikete tše makgolo a mane a nago le masome a šupago a dikete, banna ba bahlabani.

⁶Ge e le Balefi le Babenyamini ga ba ka ba balwa le ba bangwe, gobane lentšu la kgoši le be le beleka Joaba.

⁷Gomme taba ye e be e befetše Morena, a otla Isiraele ka baka la yona.

⁸Ke mo Dafida a rapetšego Modimo a re; ke sentše gagolo ka go dira taba ye; gomme bjalo hle, a ko ntebalele molato wo, gobane nna mohlanka wa gago ke dirile bošaedi bjo bogolo.

⁹Morena a roma Gada mmoni wa Dafida a re:

¹⁰Sepela o botše Dafida o re: Morena o re: Ke bea dilo tše tharo pele ga gago; go tšona kgetha setee se nkago go dira sona.

¹¹Gada a tla go Dafida a re: Morena o re: Ikgethele:

¹²Goba o kgetha nywaga e meraro ya tlala; goba dikgwedi tše tharo o bolawa ke manaba a gago, o fihlelwa ke lerumo la manaba a gago; goba matšatši a mararo a lerumo la Morena, a lehu le lebe nageng ye, la ge Morongwa wa Morena a fediša batho dileteng tšohle tša Isiraele. Bjale eleletša o mpotše phetolo ye ke tlogo e iša go e a nthomilego.

¹³Dafida a fetola a re: Nna ke tlaletšwe ka kudu. A nke ke wele seatleng sa Morena, gobane kgaugelo ya gagwe ke e kgolokgolo; a nke ke se wele diatleng tša batho.

¹⁴Bjale Morena a tliša lehu le lebe go Isiraele; gwa hwa banna ba dikete tše masome a šupago ba Baisiraele.

¹⁵Modimo a roma Morongwa Jerusalema gore a senye motse woo. Ya re ge a sa fela a o senya, Morena a šegama ge a bona bošula bjoo, a laela Morongwamofediši yeo a re: Go hwetše; gomiša seatla sa gago! Gomme Morongwa wa Morena o be a eme seboeng sa Oronani Mojebusi.

¹⁶Dafida a lebelela a bona Morongwa wa Morena a eme seboeng seo a retha tšhoša godimo ga motse wa Jerusalema, Dafida le bagolo ba khunama ba lotšha ba apere mankgeretla.

¹⁷Dafida a rapela Modimo a re: Mosenyi ke nna ke laetšego ka re setšhaba se balwe! Ke nna ke dirilego bobe! Dinku tše di dirileng? Morena Modimo wa ka, a seatla sa gago se se ke sa imela nna le ba leloko la ka, se se ke sa hlokofatša setšhaba sa gago.

¹⁸Morongwa wa Morena a bolela le Gada a re a botše Dafida a re a rotoge a tle seboeng sa Oronani Mojebusi, a agele Morena aletare gona moo.

¹⁹Dafida a ya a dira se a se boditšwego ke Gada a laetšwe ke Morena.

²⁰Oronani ge a retologa a bona Morongwa, gomme barwa ba gagwe ba bane ba ba bego ba na nae, ba utama. Oronani o be a fola mabele.

²¹Dafida a tla go Oronani; Oronani ge a gadima a mmona, a tla a etšwa seboeng, a lotšha Dafida, sefahlogo sa gagwe se inametše fase.

²²Dafida a bolela le Oronani a re: Mphe felo fa ga seboa, ke agele Morena aletare mo go sona. Ke tlo go neela tšhelete e se lekanego, gore lehu le lebe le tloge setšhabeng.

²³Oronani a fetola a re: Itšeele seboa se, kgoši monga ka, o dire ka mo o ratago. Sedi dipholo, a e be tša sehlabelo; gomme diphata tša go fola šedi, a e be dikgong; le mabele šea, a e be a sebego; ka moka ke a di ntšha!

²⁴Kgoši Dafida a fetola a re: Aowa, ke tlo di reka ka tšhelete e di lekanego, gobane nka se tšee tša gago ka di nea Morena, ka tliša sehlabelo ka tša gago, ke sa ka ka reka.

²⁵Dafida a ntšhetša Oronani gauta ya Sekele tše makgolo a selelago, a reka felo fao.

²⁶A agela Morena aletare, a tliša dihlabelo le dileboga; ya re ge a hlaboša lentšu a rapela, Morena a araba ka mollo o tšwago legodimong ka godimo ga aletare ya sehlabelo.

²⁷Morena a botša Morongwa a re a bušetše tšhoša bodulong bja yona.

²⁸Bjale Dafida ge a lemogile gobane Morena o mo kwile gona moo seboeng sa Oronani, a fela a iša dihlabelo ntshe.

²⁹Gobane Ngwako wola wa Morena wo Moshe a o dirilego ba le lešokeng, le aletare ya dihlabelo, di be di le motseng wa Gibea mehleng yeo.

³⁰Ge e le Dafida yena ga a ka a kgona go tla aletareng yeo go nyaka Modimo, gobane o be a tšhogile tšhoša ya Morongwa wa Morena.