1 Chronicles 26

¹Dihlopha tša baleti ba dikgoro šedi: Go Bakora e be e le Meselemia morwa wa Kore wa barwa ba Asafa.

²Barwa ba Meselemia e be e le Sekaria wa ntlha, le Jediele wa bobedi, le Sebadya wa boraro, le Jathiniele wa bone,

³le Elama wa bohlano, le Johanani wa go selela, le Elioenai wa go šupa.

⁴Barwa ba Obede-Edomo e be e le Semaria wa ntlha, le Josabadi wa bobedi, le Joage wa boraro, le Sakaria wa bone, le Nethaniele wa bohlano,

⁵le Amiele wa go selela, le Isashara wa go šupa, le Peulithi wa seswai; gobane Modimo o be a mo šegofaditše.

⁶Le Semaya morwa wa gagwe o be a na le barwa ba gagwe ba e kilego ya ba bagolo ba leloko la gabo, gobane e be e le banna ba dinatla.

⁷Barwa ba Semaya ke Othini, le Refaele, le Obede, le Elisabadi, le bana ba bobona ba banna ba dinatla, le Elihu le Semakia.

⁸Bao ka moka e be e barwa ba Obede-Edomo; bona le bana ba bona le ba bobona, e be e le banna ba dinatla, ba matla modirong; e be e le ba masome a selelago a metšo e mebedi, ba ga Obede-Edomo.

⁹Le Meselemia o be a na le barwa le bana babo, banna ba lesome la metšo e seswai ba dinatla.

¹⁰Le Hosa e mongwe wa barwa ba Merari o be a na le barwa; mogolo wa bona e be e le Simiri, le ge e se yena wa leitšibulo; o filwe bogolo ke tatagwe.

¹¹Wa bobedi e be e le Hilikia; wa boraro e be e le Tebalia; wa bone e be e le Sekaria; barwa ba Hosa ka moka le bana babo e be e le ba lesome le metšo e meraro.

¹²Dihlopha tše tša baleti ba dikgoro, ka palo ya bagolo ba banna, modiro wa bona e be e le go hlokomela Ngwako wa Morena ga mmogo le bana ba bobona.

¹³Ba hlaotšwe ka matengwa, ba bayane le bagolo, ka go ya ka meloko ya bona le ka dikgoro.

¹⁴Tengwa la kgoro ya thoko ya bohlabela la wela Meselemia; morwa wa gagwe Sekaria e be e le yo bohlale dikeletšong; yena ba mo diretše matengwa, mme a welwa ke tengwa la kgoro ya thoko ya leboa.

¹⁵Obede-Edomo a welwa ke tengwa la kgoro ya thoko ya borwa; barwa ba gagwe ba welwa ke tengwa la go leta nywako ya matlotlo.

¹⁶Supima le Hosa ba welwa ke tengwa la go leta thoko ya bodikela le kgoro ya Salekete, mo mmila o rotogago, mme baleti mo ba emago ba lebane.

¹⁷Thoko ya bohlabela go be go leta Balefi ba ba selelago; thoko ya leboa e be e le ba bane ka mehla; thoko ya borwa e be e le ba bane ka mehla; nywakong ya matlotlo e be e le babedibabedi.

¹⁸Mo mathuding a ka thoko ya bodikela, mo mmila o rotogago, go be go leta ba bane; mathuding gona go be go leta ba babedi.

¹⁹Ke tšona dihlopha tša baleti ba dikgoro ba barwa ba Kora le ba barwa ba Merari.

²⁰Banababo ba Balefi ba e bego e le balaki ba mahumo a Ngwako wa Modimo le ba dipolokelo tša tše kgethwa šeba:

²¹Ke barwa ba Laedani, ba Laedani ba ga Gerisome, ba e bego e le bagolo ba moloko wa ba Laedani ba ga Gerisome, ke ba ga Jehiele.

²²Barwa ba Jehiele ke Sethama le Joele ngwanabo, balaki ba mahumo a Ngwako wa Morena.

²³Ge e le mo go ba Amorama, le ba Jitsehara, le ba Heburone, le ba Usiele

²⁴molaki wa mahumo e be e le Sebuele morwa wa Gerisome morwa wa Moshe.

²⁵Bana babo moloko wa Eliesere e be e le Rehabya morwa wa gagwe, le Jesaya morwa wa gagwe, le Jorama morwa wa gagwe, le Sikiri morwa wa gagwe, le Selomitha morwa wa gagwe.

²⁶Selomitha yo le bana ba gagwe e be e le bona balaki ba mahumo ala ka moka a a kgethilwego ke kgoši Dafida le balaodi ba dikgao tša ba dikete le tša ba lekgolo, le balaodi ba dira.

²⁷Ba di kgethile e le dithebola le dithopiwa, ya ba tša go thakga Ngwako wa Morena;

²⁸le tšohle tše di bego di kgethilwe ke Samuele mmoni, le Saulo morwa wa Kisi, le Abinere morwa wa Nere, le Joaba morwa wa Tseruya. Tše kgethwa ka moka tše, di be di lakwa ke Selomitha le bana babo.

²⁹Ba ga Jitsehara, ba ba bego ba beilwe go hlokomela mediro ya kwa ntle ya Isiraele, e le bahlapetši le baahlodi, ke Kenanya le barwa ba gagwe.

³⁰Ba ga Heburone ba ba bego ba beilwe go hlapetša Isiraele ka mošono wa Jorodane thoko ya bodikela, le mediro ka moka ya go hlankela Morena le kgoši, e be e le Hasabya le bana babo, banna ba dinatla ba sekete se se nago le makgolo a šupago.

³¹Go bona ba gaHeburone mogolo e be e le Jeria, mogolo wa ge go iwa ka leloko la gabo le ka dikgoro tša gabo. Bona ba kile ba balwa ka ngwaga wa masome a mane wa pušo ya Dafida; go bona gwa hwetšwa banna ba dinatla ba motseng wa Jasere wa Gileada.

³²Ba gabo e be e le banna ba dinatla ba dikete tše pedi le makgolo a šupago, beng ba malapa; kgoši Dafida o ba beile go hlapetša Barubeni, le Bagada, le ba seripa sa Bamanase ditabeng ka moka tša Modimo le tša kgoši.