2 Chronicles 22

¹Ahasia morwa wa gagwe e monyenyane a dirwa kgoši ke baagi ba Jerusalema, a buša legatong la gagwe, gobane bagolwane ka moka ba be ba bolailwe ke sera sela sa Baarabia se se bego se ba šwahletše mešašeng. Ke ka baka leo Ahasia morwa wa Jorama a dirilwego kgoši.

²Ahasia o be a na le nywaga e masome a mabedi a metšo e mebedi ge a tšea bogoši, a fetša ngwaga o tee a le kgoši Jerusalema. Leina la mmagwe e be e le Athalia morwedi wa Omiri.

³Le yena o tšere ka tsela ya ba leloko la Ahaba, gobane mmagwe o be a mo ruta go dira tše kgopo.

⁴A dira tše di bego di befela Morena, a etša ba leloko la Ahaba, gobane e be e le bona baeletši ba gagwe mola tatagwe a hwile, ba mo senya.

⁵Le mekgwa ya gagwe e be e le go latela dikeletšo tša bona. O kile a tšwa dira le Jorama morwa wa Ahaba kgoši Isiraele, a lwa le Hasaele kgoši ya Siria kua motseng wa Ramothe nageng ya Gileada; mme Jorama a gobatšwa ke Basiria,

⁶a goma a ya Jeseriele go alafša dintho tše a bego a di ntšhitšwe kua Rama ge a hlabana le Hasaele kgoši ya Siria. Gomme Ahasia morwa wa Jorama kgoši ya Juda a fologela Jeseriele a tla go hlola Jorama morwa wa Ahaba ka ge a babja.

⁷Di be di etšwa go Modimo, gore Ahasia a senyege ka go etela Jorama ge ba yo gahlanetša Jehu morwa wa Nimisi yo Morena a bego a mmeile kgoši gore a fediše ba leloko la Ahaba.

⁸Ya re ge Jehu a tlišetša ba leloko la Ahaba kotlo, a hwetša bakgoma ba Juda le barwa ba bana ba boAhasia, ba e bego e le bahlanka ba Ahasia, a ba bolaya.

⁹A nyaka Ahasia, ba mo swara Samaria ba mo tliša go Jehu, ba mmolaya; mme ba mmoloka gobane ba re ke morwa wa Josafate yola a bego a nyaka Morena ka pelo ka moka. Gomme mo go ba leloko la Ahasia gwa hlokwa e a kgonago go ba kgoši.

¹⁰Bjale Athalia mmago Ahasia ge a bona morwa wa gagwe a bolailwe, a tsoga a bolaya bohle ba leloko la magoši a Juda.

¹¹Ke mo Josabathe morwedi wa kgoši a tšerego Joase morwa wa Ahasia, a mo utswa mo go bakgomana ba ba bego ba bolawa, a mo uta le mofepi wa gagwe mo phapošing ya go robala. Josabathe e be e le morwedi wa kgoši Jorama, e le mosadi wa Joyada moperisita; o utile Joase ka mokgwa woo, gobane a le kgaetšedi ya Ahasia; a mo utela Athalia, a se ke a bolawa.

¹²A dula go bona ngwakong wa Modimo a utilwe gwa fela nywaga e selelago; mme naga ya bušwa ke yena Athalia.