2 Chronicles 24

¹Joase ge a eba kgoši o be a na le nywaga e šupago, a fetša nywaga e masome a mane a le kgoši motseng wa Jerusalema. Leina la mmagwe e be e le Tsibya wa Bereseba.

²Joase o be a dira tše di kgahlago Morena ka mehla yohle ge Joyada moperisita a sa phela.

³Joyada o mo tšeišitše basadi ba babedi, a tswala barwa le barwedi.

⁴Ge go fetile lebaka, Joase a rera go mpshafatša Ngwako wa Morena.

⁵A bitša baperisita le Balefi, a bolela le bona a re: Tšwelang metseng ya Juda le kgobele tšhelete go Baisiraele ka moka, gore ka ngwaga o mongwe le o mongwe go lokišwe ngwako wa Modimo. Akgofišang taba ye. Fela, Balefi ba diega.

⁶Kgoši ya bitša Joyada, yena e mogolo wa baperisita, ya mo rera ya re: o reng o sa ka wa hlokomela gore Balefi ba ntšhiše Bajuda le ba Jerusalema lekgetho le le beilwego ke Moshe mohlanka wa Morena, e lego lekgetho la phuthego ya Isiraele la go ntšhetšwa ngwako wa kgwerano?

⁷Gobane motho e mobe yola Athalia le barwa ba gagwe ba šulakantše Ngwako wa Modimo; gomme tše kgethwa ka moka tša Ngwako wa Morena ba di dirišitše mediro ya bobaali.

⁸Kgoši ge e boletše, ba dira polokelo, ba e bea kgorong ya Ngwako wa Morena ka ntle.

⁹Ba hlabela Juda le Jerusalema mokgoši, ba re go ntšhiwe lekgetho la Morena, le Moshe mohlanka wa Morena a le ntšhišitšego Baisiraele ba le kua lešokeng.

¹⁰Bakgoma ka moka ba setšhaba ba thaba, ba ntšha ba tšhela, polokelo ya ba ya tlala.

¹¹Gomme ge polokelo e tlišwa go balaki ba Balefi ba ba beilwego ke kgoši, mme ba bona tšhelete e le e ntši, gwa tla mongwadi wa kgoši, le molaki wa moperisita e mogolo, ba tšholla polokelo, ba tsebo e bušetša bodulong bja yona; ba dira ka mokgwa wo ka mehla, ba kgobela tšhelete tše ntši.

¹²Kgoši le Joyada ba di nea bahlapetši ba mediro ya Ngwakong wa Morena. Bona ba thwala babetli ba maswika le ba dikôta gore ba mpshafatše Ngwako wa Morena; le barudi ba tshipi le ba mphiri, gore ba lokiše Ngwako wa Morena.

¹³Ke moka badiri ba swara mediro; modiro wa tšwela pele ka diatla tša bona. Ba buša ba lokiša Ngwako wa Modimo wa ba wa dula bjalo ka peleng ka thoko tše go fela.

¹⁴Mola ba o phethile, ba tliša ditšhelete tše di šetšego go kgoši le go Joyada, gwa dirwa dibjana tša Ngwako wa Modimo ka tšona, tša go dira dihlabelong, le meruswana ya diorelo, le dibjana tše dingwe tša gauta le tša silifera. Gomme mehleng ya ge Joyada a sa phela ba tliša dihlabelo ka mehla.

¹⁵Joyada o hwile a tšofetše, a tennwe ke go phela, a na le nywaga e lekgolo le masome a mararo ge a ehwa.

¹⁶Ba mmolokile motseng wa Dafida mabitleng a dikgoši, gobane tše a di diretšego Isiraele le Modimo le Ngwako wa Modimo e be e le tše botse.

¹⁷Mola Joyada a hwile gwa tla bakgoma ba Juda ba lotšha kgoši; kgoši ya theetša tše ba di bolelago.

¹⁸Gomme ba tlogela Ngwako wa Morena Modimo wa botatabo, ba direla dikokwane tša Ašera le medimo ya diswantšho. Kgalefo ya Morena ya wela Juda le Jerusalema ka baka la molato woo.

¹⁹Morena a roma baporofeta ba tla go bona, gore ba ba gomišetše go yena, bona ba ba kgothatša; fela, ba gana go kwa.

²⁰Moya wa Morena wa tlela Sekaria morwa wa Joyada moperisita, a ema pele ga setšhaba, a bolela a re: Modimo o re: Le reng le lahla melao ya Morena? Le ka se ke la ba la letlega, gobane le tlogetše Morena, mme le yena a le tlogela.

²¹Gomme bona ba mo lakana, ba mo thuma ka maswika a le mo lapeng la Ngwako wa Morena, ba dira bjalo ba romilwe ke kgoši.

²²Kgoši Joase o be a lebetše tše Joyada tatago Sekaria a mo diretšego ka botho, mme a bolaya morwa wa gagwe. Yena ge a ehwa o boletše a re: Morena a a di bone, a latiše!

²³Ge go fela ngwaga woo, a šwahlelwa ke madira a Basiria; ba tla Juda le motseng wa Jerusalema, ba fediša bakgoma ka moka ba setšhaba setšhabeng; dithebola tša bona ka moka ba di iša go kgoši ya bona kua Damaseko.

²⁴Dira tšeo tša Basiria di be di se di kae; fela, Morena o gafetše madira a mantši diatleng tša bona, ka gobane ba tlogetše Morena Modimo wa botatabo. E be e le kotlo ye ba e tlišeditšego Joase.

²⁵Ge ba mo gomela, ba mo tlogetše a le bohlokong bjo bogolo; gomme bahlanka ba gagwe ba mo lakana ka baka la madi a barwa bala ba Joyada moperisita, ba mmolaya a le malaong a gagwe, a hwa. Ba mmo lokile motseng wa Dafida e sego mabitleng a dikgoši.

²⁶Ba ba bego ba mo lakane ke Sabadi morwa wa Simeathe mosadi wa Moamoni, le Josabadi morwa wa Simiritha mosadi wa Momoaba.

²⁷Ge e le ditaba tša barwa ba gagwe, le tša dikgoelelo tše ntši tša baporofeta, le tša mola go lokišwa ngwako wa Modimo, tšona di ngwadilwe tlhathollong ya puku ya dikgoši. Legatong la gagwe gwa buša Amatsia morwa wa gagwe.