2 Chronicles 32

¹Ditaba tše le mabothakga a di latetšwe ke go tla ga Sanheribe kgoši ya Asuri. O tlile nageng ya Juda a rakela metse ya dibo a re o tlo e thopa.

²Hiskia ge a bona Sanheribe a etla a lebantše go lwa le Jerusalema,

³a eletšana le balaodi ba madira a gagwe, ba re go thibje didiba tša meetse tše di lego ka ntle ga motse; mme ba mo thuša.

⁴Batho ba bantši ba tla ba thiba didiba ka moka; ba thiba le noka e elago e phatša naga yeo, gore dikgoši tša Asuri ge di tla, di se ke tša hwetša meetse a mantši.

⁵Hiskia a dira ka maatla, a tsoša morako mo o bego o phušogile, a aga dibo mo go wona; a aga le o mongwe morako ka ntle, a tiiša merako ya Milo motseng wa Dafida; a dira dibetša tše ntši le dikotse tše ntši.

⁶A beela setšhaba balaodi ba dira, a ba botha lepatlelong la kgoro ya motse, a tiiša dipelo tša bona a re:

⁷Tiang maatla, le eme senna; le se ke la boifa la tšhoga kgoši ya Asuri ka ge a tlile le bontši bjo bokaakaa; gobane ba ba nago le rena ba feta ba gagwe ka go ata.

⁸Letsogo la gagwe ke la nama; gomme rena re na le Morena Modimo wa rena wa go re lwela le go hlabana ditlhabano tša rena. Gomme setšhaba sa ikholofetša ka mantšu a Hiskia kgoši ya Juda.

⁹Ge go fetile lebakanyana, Sanheribe kgoši ya Asuri, a roma bahlanka ba gagwe ba ya Jerusalema, yena a sa le kua Lakisi a na le dira tša gagwe ka moka; a iša lentšu go Hiskia kgoši ya Juda le go Bajuda ka moka ba Jerusalema, a re:

¹⁰Sanheribe kgoši ya Asuri o re: Le holofetšeng ge le dutše sebong sa Jerusalema?

¹¹A ga se gore le forwa ke Hiskia gore a le bolaiše tlala le lenyora ge a re: Morena Modimo wa rena o tlo re namolela diatleng tša kgoši ya Asuri!

¹²A ga se yena Hiskia e a feditšego meboto ya Modimo, le dialetare tša gagwe, a botša Juda le Jerusalema a re: Le rapele aletareng e tee fela, le thuntšhetše diorelo mo go yona?

¹³Gomme se nna le bontate re se dirilego ditšhaba ka moka a ga le se tsebe? A medimo ya ditšhaba tše dingwe tšeo e kgonne go phološa dinaga tša tšona seatleng sa ka?

¹⁴Ke ofe modimo mo go medimo ya ditšhaba tšela tše bontate ba di fedišitšego, wo o kgonnego go phološa setšhaba sa wona seatleng sa ka, ge le re Modimo wa lena a ka kgona go le phološa seatleng sa ka?

¹⁵Bjale gomme, le se ke la forwa ke Hiskia, a se ke a le timetša ka mokgwa wo. Le se ke la mo dumela, gobane ga go modimo wa setšhaba mang le mang, goba mmušo mang le mang, o kilego wa kgona go phološa setšhaba sa wona seatleng sa ka, le ge e le diatleng tša bontate; bjale wa lena Modimo a ka kgona bjang go le phološa seatleng sa ka?

¹⁶A realo, mme bahlanka ba gagwe ba fela ba sa bolela tše dingwe tša go roga Morena Modimo, le go roga Hiskia mohlanka wa gagwe.

¹⁷O be a ngwadile le lengwalo la go goboša Morena Modimo wa Isiraele, a mmolela ka go re: Modimo wa Hiskia a ka se ke a kgona go phološa setšhaba sa gagwe seatleng sa ka, bjalo ka ge medimo ya ditšhaba tše dingwe e šitilwe go phološa ditšhaba tša yona diatleng tša ka.

¹⁸Tše bjalo ba di bolela ka Sejuda, ba hlabošetša mantšu go setšhaba sa Jerusalema se se bego se eme morakong, e le gore ba tšhoge ba nolege moko, bona ba kgone go tla ba thopa motse.

¹⁹Ba bolela Modimo wa Jerusalema ka mokgwa wa ge ba bolela medimo e mengwe ya lefase, e lego dibopša tša diatla tša batho.

²⁰Gomme Hiskia le Jesaya moporofeta morwa wa Amotsi ba rapela ka baka la taba ye, ba hlabošetša mantšu legodimong.

²¹Ke mo Morena a romilego Morongwa wa gagwe, a fediša banna ba bagale ka moka, le balaodi ba madira, le dikgošana tša mo mešašeng ya kgoši ya Asuri. A boela nageng ya gagwe a llwe ke dihlong. Ya re ge a tsene ngwakong wa Modimo wa gagwe, a bolaelwa ntshe ke bana ba gagwe ba a ba tswetšego, ba mmolaya ka lerumo.

²²Ke wona mokgwa wo Morena a phološitšego Hiskia le ba Jerusalema ka wona seatleng sa Sanheribe kgoši ya Asuri le diatleng tša bohle, a ba khutšiša ka thoko tše go fela.

²³Gomme batho ba bantši ba tlišetša Morena dineo motseng wa Jerusalema; le Hiskia kgoši ya Juda ba mo ntšhetša dilo tše bohlokwa; a dula e le moretwa ditšhabeng ka moka ka taba tšeo.

²⁴Mehleng yeo Hiskia o kile a babja a nyako hwa; a rapela Morena. Mme Morena a bolela le yena ka pono ya matete.

²⁵Fela Hiskia ga a ka a leboga Morena ka mo go lekanego ditšhegofatšo tše a di neilwego, gobane pelo ya gagwe e ikgogomošitše, a ba a welwa ke kgalefo, le Juda, le Jerusalema.

²⁶Hiskia a ikokobetša, a lahla boikgogomošo bja pelo ya gagwe, le ba Jerusalema ba dira bjalo; mme kgalefo ya Morena ya se ke ya ba wela mehleng ya ge Hiskia a sa phela.

²⁷Hiskia o be a na le mahumo a mantši ka kudu, a humile gagolo; a itirela nywako ya go bolokela disilifera, le digauta, le magakabje a bohlokwa, le dinoko, le dikotse, le dibjana tše di kganyogegago tša mehutahuta.

²⁸A itirela le nywako ya dišego tša mabele, le ya dinkgo tša morara; a ikagela le maraka a diruiwa tša mehutahuta, le maraka a mehlape.

²⁹A ikagela le metse, a rua dinku le dikgomo tše ntši, gobane Modimo a na a mo nea dithoto tše ntšintši.

³⁰Ke yena Hiskia e a thibilego meetse a sediba se se elago se etšwa Gihoni, a iša meetse a sona thoko ya tlase ya bodikela motseng wa Dafida. Hiskia o be a na le mahlatse medirong ya gagwe ka moka.

³¹Fela, mohla wola go tlile batseta ba dikgoši tša Babele, ba ba rometšwego go botšiša mohlolo o diregilego nageng, Modimo o be a mo tlogetše gore a mo leke, a tsebe tšohle tše di lego pelong ya gagwe.

³²Ge e le ditaba tše dingwe tša Hiskia, tša mediro ya gagwe ya borapedi, šedile di ngwadilwe diponong tša Jesaya morwa wa Amotsi le mo pukung ya dikgoši tša Juda le tša Isiraele.

³³Hiskia o ithobaletše le botatagwe; ba mmolokile serwaolong mabitleng a barwa ba Dafida; gomme Bajuda ka moka le ba Jerusalema ba mo godišitše lehung la gagwe; legatong la gagwe gwa buša Manase morwa wa gagwe.