2 Chronicles 6

¹Mohla woo Salomo a re: Morena o boletše a re: o rata go dula mo swiswing!

²Bjale ke go agetše ngwako gore e be bodulo bjo o tlogo dula go bjona ka mehla le mehla.

³Kgoši ya retologa ya lebana le setšhaba, ya šegofatša phuthego ya Isiraele ka moka; gomme phuthego ka moka ya Isiraele e be e eme.

⁴Kgoši ya re: A go retwe Morena Modimo wa Isiraele, ka gobane o phethile ka seatla sa gagwe tše a di boditšego Dafida tate a re:

⁵E sa le mola ke ntšha setšhaba sa ka Egipita, ga ke ešo ka kgetha motse o mongwe mo dileteng tša Isiraele ka moka gore go agelwe leina la ka Ngwako; le gona ga ke ešo ka hlaola monna a ba kgoši ya setšhaba sa ka sa Isiraele.

⁶Wo ke o kgethilego ke motse wa Jerusalema, gore e be mo leina la ka le tlogo dula gona; ke hlaotše Dafida a ba kgoši ya setšhaba sa ka sa Isiraele.

⁷Gomme Dafida tate mo pelong ya gagwe o be a rata go aga Ngwako wa leina la Morena Modimo wa Isiraele.

⁸Morena a bolela le yena Dafida tate a re: Ge mo pelong ya gago o rera go agela leina la ka Ngwako, o dirile gabotse.

⁹Fela, Ngwako woo o ka se ke wa agiwa ke wena. E a tlogo o aga ke morwa wa gago yo o tlogo mo tswala. Ke yena a tlogo agela leina la ka Ngwako.

¹⁰Gomme lentšu leo Morena a le boletšego, o bile o le phethile; gobane nna ke eme legatong la Dafida tate, ke dutše sedulong sa Isiraele ka mo Morena a boletšego; gomme ke agetše leina la Morena Modimo wa Isiraele Ngwako,

¹¹mme polokelo e nago le kgwerano ya Morena ye a e dirilego le Baisiraele, ke e beile ntshe.

¹²Bjale Salomo a ema pele ga aletare ya Morena phuthego ka moka ya Isiraele e mo lebeletše, a emiša matsogo a gagwe.

¹³Gobane Salomo o be a dirile serokamelo ka mphiri, a se beile gare ga lapa; bophara bja sona e be e le meelo e mehlano thoko tšohle; leemo e be e le meelo e meraro; a ema godimo ga sona, a khunama ka matolo a lebane le phuthego ya Isiraele ka moka, a emišetša matsogo legodimong,

¹⁴gomme a re: Morena Modimo wa Isiraele! Kua magodimong le mono faseng ga go Modimo mokawena, e o botegelago bahlanka ba gago mme wa ba dira ka botho, ge ba phela ba lebane nago ka pelo ka moka.

¹⁵Dafida tate mohlanka wa gago o mo diretše tšohle tše o mmoditšego tšona. O be o di boletše ka molomo; mme lehono šedi, o di phethile ka seatla sa gago.

¹⁶Gomme bjale, Morena Modimo wa Isiraele! Nama o dire tše o di boditšego mohlanka wa gago Dafida tate, wa re: Mo sedulong sa bogoši bja Isiraele o ka se ke wa hlokišwa monna yo ke tlogo mmona a dutše go sona, ge bana ba gago ba ka swara tsela ya bona ka melao ya ka, ba lebane le nna bjalo ka wene.

¹⁷Morena Modimo wa Isiraele, bjale lentšu leo, o le boletšego le Dafida mohlanka wa gago, a e be la therešo.

¹⁸Afa ruri Modimo a ka dula le batho mono lefaseng? Hleng magodimo, le magodimo a godimodimo a sa kgone go go lekana! Bjale Ngwako wo ke o agilego o ka go lekana bjang?

¹⁹Morena Modimo wa ka! Thapelo ya mohlanka wa gago e sekegele tsebe, o kwe kgoeletšo ya mohlanka wa gago le topo ya gagwe a e beago pele ga gago.

²⁰A mahlo a gago a lebelele Ngwako wo mosegare le bošego, felo mo o go boletšego wa re: Leina la ka le tlo dula fa! Gore o kwe thapelo ya mohlanka wa gago a e beago monomo.

²¹O kwe ge nna mohlanka wa gago le setšhaba se sa gago re go llela re le felo fa. O kwe o le bodulong bja gago godimong; o kwe o ba lebalele.

²²E re ge motho a senyetše wa gabo, gomme ba mo eniša keno a itlema, keno ya tla pele ga aletare ya gago fa Ngwakong wo,

²³o kwe o le godimong, o dire, o ahlolele bahlanka ba gago; yo kgopo a tšwewe, o lefetše mokgwa o mobe wa gagwe; e a lokilego a tšwe molatong, o mo nee tše di mo swanetšego ka ge a lokile.

²⁴Mohla setšhaba sa gago sa Isiraele se fenywa ke manaba ka ge se go senyetše, e re ge ba boela go wene ba itshola leineng la gago, ba go llela ba rapela ba le fa Ngwakong wo,

²⁵o kwe o le godimong; setšhaba sa gago sa Isiraele o se lebalele dibe tša sona, o se bušetše mo nageng yeno ye o e neilego bona le botatabo.

²⁶Mohla wo legodimo le tswaletšwe, go se pula, ka ge ba go senyetše, e re ge ba etla ba rapela felo fa, ba itshola leineng la gago, ba lahla sebe sa bona ka gobane o ba otla,

²⁷o kwe o le godimong; bahlanka ba gago, le ba setšhaba se sa gago, o ba lebalele sebe se ba se dirilego; gobane o tlo ba ruta tsela e botse, ye ba tlogo sepela ka yona, mme o nešetše naga ye ya gago pula, naga yeno o e neetšego tšhaba se sa gago ya ba legae la bona.

²⁸Mohla go wile tlala nageng, goba ya welwa ke dinkhu, goba phori, goba megwelema, le ge e ka ba tšie, goba mogokong, le ge manaba a ba hlohla mo nageng le mo kgorong, le ge e ka ba kotlo mang le bolwetši mang,

²⁹dithapelo tšohle le ditopo tšohle, ge di ka direlwa motho mang le mang, le ge e le setšhaba ka moka sa gago sa Isiraele, bohle ba lemoga kotlo ya dipelo tša bona, mme ba emišitše atla tša bona ba le Ngwakong wo,

³⁰o kwe o le godimong, o le bodulong bja gago bjo bo tiilego, o ba lebalele; bohle o ba nee tše di lebanego tsela ye ba bego ba e swere; gobane o tseba dipelo tša bona, motsebadipelo tša bana ba batho ka moka ke wena o nnoši,

³¹gore ba go boife, ba sware ka tsela tša gago ka mehla yohle ba sa phela mo nageng ye o e neetšego borrawešo.

³²Le moeng e sego wa setšhaba se sa gago sa Isiraele, motšwakgole a tlago ka baka la ina la gago le atla sa gago se maatla, le tsogo la gago le o le emišago, ge a ka tla a rapela a le Ngwakong wo,

³³o kwe o le godimong, o le bodulong bja gago bjo bo tiilego, o dire se se kgopelwago ke moeng, gore tšhaba tšohle tša lefase di tsebe leina la gago, di go boife bjalo ka setšhaba se sa gago sa Isiraele, ba tsebe gore mo Ngwakong wo ke o agilego, go bolwa leina la gago.

³⁴Le mohla setšhaba sa gago se tšwetše go hlabana le manaba, o ba romile mme ba wela tsela, ge ba ka go bitša ba lebile mo motseng wo o o kgethilego, ba iša difahlogo mo Ngwakong wo ke o agetšego ina la gago,

³⁵o kwe o le godimong, o kwe thapelo ya bona le topo ya bona, o dire mme o eme nabo!

³⁶Mohla ba tlogo ba ba go senyetše -- ka ge go se motho e a sa kego a senya -- mme wa ba befelelwa, wa ba lahletša tlhabanong, manaba a ba thopa, ba išwa nageng ya manaba, e ka ba kgole le ge e le kgauswi,

³⁷ge ba ka itshola dipelong, ba le nageng ya bao ba ba thopilego, mme ba sokologa ba go rapela ba le gona kua bothopša, ba re: Re dirile sebe! Re molato! Re disenyi!

³⁸ge ba ka boela go wena ka pelo ka moka le moya ka moka ba le gona kua nageng ya manaba a bona, ya bao ba ba thopilego, ge ba go kgopela tsela ya go ka boela mo nageng ya gabo ye o e neetšego botatabo, mo motseng wono o o kgethilego, le mo Ngwakong wo ke o agetšego ina lago,

³⁹o kwe o le godimong, o le bodulong bja gago bjo bo tiilego; o kwe thapelo ya bona le topo ya bona, o ba namolele, o lebalele tšhaba se sa gago tše ba go senyetšego ka tšona.

⁴⁰Bjale Modimo wa ka! A mahlo a gago a dule a lebeletše, mme tsebe tša gago di phafogele dithapelo felo fa.

⁴¹Bjale, Morena Modimo! Tsoga gee o tsene felo fa ga gago ga makhutšo, o tle fa go lego polokelo ya maatla a gago. Morena Modimo! A baperisita ba gago ba apešwe bonamodi, barapedi ba gago ba thabele tše botse.

⁴²Morena Modimo! Motlotšwa wa gago o se mo gerule; borapedi bja Dafida mohlanka wa gago o se bo lebale.