Job 29

¹Jobo a iša pele go ntšha diema tša gagwe, a re:

²A nka be ke sa le wa kgwedi tšela tša mohlamonene, wa mehla yela ke sa letwa ke Modimo!

³Mola lebone la gagwe le tuka le le godimo ga ka, ka sepela ke na le seedi sagwe leswiswing,

⁴ka etša mola ke sa le monna, mola go kwana le Modimo go le ngwakong wa ka,

⁵mola Yomaatlaohle a sa na le nna, masogana a ka a ntikologile,

⁶mola ke sa hlapa nao ka lebese, thaba e sa ntšwela dinokana tša makhura,

⁷ke sa fela ke etšwa ka kgoro ke eya motseng, sedulo sa ka ke se bea mabatleng;

⁸masogana ge a mpona a ntšhuthela, mme ba hlogoputswa ba tsoga ba ema,

⁹bakgomana ba lesa go bolela, ba dula ba swere melomo,

¹⁰le mantšu a ditona a se hlwe a kwala, maleme a bona a gomarela magalapa.

¹¹Tsebe e nkwilego ya re: Ke na le mahlatse! Leihlo le mponego le be le ntlhatsela.

¹²Gobane ke be ke lokolla mosenyegi ge a lla, le sešuana ge se hloka monamodi.

¹³Ka tlelwa ke ditšhegofatšo tša ba ba bego ba lahlilwe, ka hlaladiša pelo ya mohlologadi.

¹⁴Ke be ke apere toko; toko e apere nna; moahlolelo wa ka wa ba seaparo le seala.

¹⁵Ke be ke le mahlo a sefofu, ke le maoto a segole.

¹⁶Ke be ke le tatagobahloki; ke be ke lotolotša taba ya yo ke sa mo tsebego.

¹⁷Yo kgopo ke be ke mo roba mohlagare, ka mo ntšhiša tše a bego a di swere le ka meno.

¹⁸Ke be ke re ke tlo felela le sehlaga sa ka, ke atetšwe ke matšatši boka nong.

¹⁹Ka re ke namile medu mo meetseng, ka re thabe tša ka di tlo lala di ne phoka.

²⁰Bogolo bja ka ka re bo ka se onale, bora bja ka bo tlo dula bo tiile atleng sa ka.

²¹Ba be ba ntheetša, ba ntetela; ge ke ba eleditše ba homola.

²²Ge go boletše nna, go be go sa hlwe go bua motho, eke ba nilwe ke polelo tša ka.

²³Ba be ba ntetela boka pula ya tsheola, ba ahlama eke ba kgalegetše modupi.

²⁴Ge ba holofologile, ke be ke sega nabo, mme ba se nyatše go ela ga fahlogo sa ka.

²⁵Ge ke tlile go lakana nabo, ke be ke dula ke le wa pele, ka dula bo ka kgoši e le gare ga dira tša yona, eke ke homotša ba ba nyamilego.