Psalms 107

¹Lebogang Morena, gobane ke yo bolo, ke yo botho ka mehla le mehla.

²A ba realo baphološwa ba Morena, ba go phološwa kotsing,

³Ba go kgobiwa kua bohlabela le bodikela, ba thoko ya borwa le ya leboa.

⁴Ba go putlaputla naga ya lenyora ka tsela ya mahanateng, ba hloka motse wa go dula,

⁵Ba swarwa ke tlala le lona lenyora, meoya ya bona e feletšwe maatla,

⁶Ba bitša Morena ba gakanegile, a ba hlakodiša tlalelong,

⁷A ba iša tseleng ya go loka, ya go gorogela magaeng;

⁸Bona bao a ba leboge Morena botho le mehlolo, a go e dira go bana ba batho.

⁹Ka gobane o horišwa moya wo o lapilego, le moya wa tlala o o tlatša tše di botse.

¹⁰Ba go dula swiswing la thiti ya lehu, ba tlemilwe ke tšhego le tshipi,

¹¹Ka ge ba ganne lentšu la Modimo, ba nyaditše morero wa Yogodimo,

¹²Yena a ba roba pelo ka tapišo, ba ušwa ba hloka mothuši,

¹³Ba bitša Morena ba gakanegile, a ba hlakodiša tlalelong,

¹⁴A ba ntšha swiswing la thiti ya lehu, a ripa ditlemo tša bona;

¹⁵Bona bao a ba leboge Morena botho le mehlolo a go e dira go bana ba batho,

¹⁶Gobane o pšhatla mamati a mphiri, o thokga mepheko ya tšhipi.

¹⁷Ba mašilo ba go itlhakiša ka karogo le makgopo,

¹⁸Ba ba ba hlaswa dijo ka moka, ba batamela kgoro ya go hwa,

¹⁹Ba bitša Morena ba gakanegile, a ba hlakodiša tlalelong,

²⁰A roma lentšu la gagwe a ba rekola, a ba gomiša mabitleng,

²¹Bona bao a ba leboge Morena botho le mehlolo a go e dira go bana ba batho,

²²Ba tliše didimo tša go leboga, ba kwatše ditiro tša gagwe ka go hlalala.

²³Baeti batshelamawatle, ba sela ka tsela ya meetsemagolo,

²⁴Bona ba bone ditiro tša Morena, le matete a gagwe mo madibeng,

²⁵A mola a laile, gwa tsoga ledimo la phagamiša mankwele a meetsemagolo,

²⁶Ba kukega, ba koduma, ba ba ba nolega moko di befile,

²⁷Ba dikologa, ba phokaela, mantiko a ba swara ba ba ba hloboga,

²⁸Ba bitša Morena ba gakanegile, a ba hlakodiša tlalelong,

²⁹A latša ledimo, gwa napa gwa ruthela, mankwele ala a ikhomolela,

³⁰Ba thaba ge go sile, ge a ba iša letšibogong le ba bego ba le nyaka;

³¹Bona bao a ba leboge Morena botho le mehlolo a go e dira go bana ba batho,

³²Ba mo rete gare ga mašaba, ba mo tumiše kgorong ya banna.

³³O pšhiša dinoka, ya ba lešabašaba; meela ya meetse ya oma;

³⁴Naga ya mašemo ya ba e tshehla; o dira bjalo ge go senya baagi ba yona.

³⁵O upša a buša madiba lešokeng, naga ya lenyora ya ela dinoka.

³⁶A agiša ba ditlala gona moo, ba thea motse wa legae,

³⁷Ba lema mašemo, ba bjala dihlare, ba fula dienywa ba buna;

³⁸A ba šegofatša ka boati bjo bogolo; dikgomo tša bona a se lese tša notlega.

³⁹Ba be ba notlegile mme ba loba ba patilwe ke go hlaka le ka mahloko.

⁴⁰Babuši a ba tšhilafatša ka nyatšego, a ba dira baneneri ba mahanateng mo go sego tsela.

⁴¹Mme modiidi o mo ntšha mo tšhegong, a mo phagamiša, moloko wa gagwe wa etša mohlape go ata.

⁴²Baloki ba di bona mme ba di thabela; bakgopo ka moka melomo ya bona ya thibja.

⁴³Yo bohlale ke mang wa go šetša tšona tše, a lemoga botho bja Morena?