Psalms 109

¹Modimo, yo ke go retago, se homole!

²Gobane melomo ya babe, le melomo ya bafori, e nkahlametše; ke bolelwa ke maleme a maaka.

³Ba nkgobotla ka ditaba tša lehloyo, ba nthumola ke se ne molato.

⁴Ba ntsogela ka bonaba, mola nna ke ba ratile, ke ba rapeletše.

⁵Tše bolo ba mpušetša ka tše mpe; lerato ba mpušetša ka lehloyo.

⁶O ke o mmeele yo mobe a mmuše; mme lenaba a le batagane nae.

⁷Tshekong a tloge a tšwilwe, thapelo ya gagwe e fetoge sebe.

⁸Matšatši a gagwe e se be a mantši, kabelo ya gagwe e newe o šele.

⁹Bana ba gagwe e be dišuana, mosadi wa gagwe e be mohlologadi.

¹⁰Bana ba gagwe e be baneneri le bakgopedi, ba yo diilela kgole le marope a bona.

¹¹Thoto ya gagwe a e tlengwe ke molefiši; tše a di rekilego a di thopše ke mathoko.

¹²A a hloke wa go mo dira ka botho, mme dišuana tša gagwe di se be le mogaugedi.

¹³Ditlogolo tša gagwe di fedišwe, leina la gagwe le hwe le ditlogolwana.

¹⁴Morena a se lebale dibe tša botataagwe; mme sebe sa mmagwe se se ke sa phumolwa.

¹⁵Morena a a dule a di lebeletše, a fediše maina a bona nageng.

¹⁶Ka gobane a sa ka a gopola go dira ka botho; sa gagwe ya ba go hlomara monna mmotlana mohloki, a rata go bolaya mojapelo.

¹⁷Maroga a a bego a a rata a a mmoele; tšhegofatšo, ye a bego a sa e rate, a e be kgole le yena.

¹⁸Maroga a gagwe a a mo apeše boka kobo, a a mo tsene bjalo ka meetse, a a etše makhura mo dithong tša gagwe.

¹⁹A a etše seaparo se a se aperego, a etše moketwana wa go itlema ka mehla.

²⁰A e be tšona tšeo di tlogo dirwa lenaba la ka di etšwa go Morena, le bao ba mpharago ka tše mpe.

²¹Mme wene Morena Mong wa ka, nna o ntire se se swanetšego leina la gago; o ntlhakodiše gobane botho bja gago ke bjo bobotse.

²²Gobane nna ke mmotlana mosenyegi, mme pelo ya ka ka teng ga ka e gobetše.

²³Ke felela bjalo ka meriti ge e gonogile, ke tšoka boka tšie.

²⁴Matolo a ka a fo thekesela ka go ikona dijo; le mmele wa ka o gwametše, mme ke hloka moko.

²⁵Go bona ke wa go hlwa ke kwerwa; ge ba mpona ba šišinya dihlogo.

²⁶Morena Modimo wa ka, a ke o nthuše, o ntlhakodiše ka botho bja gago,

²⁷Gore ba lemoge gobane tše bjalo ke seatla sa gago, di dirwa ke wena Morena.

²⁸Bona a ba roge, mme wena o šegofatše; bona ge ba tsoga, ba tlo lewa ke dihlong, gwa thaba molata wa gago.

²⁹Bampeki a ba apešwe dihlong, ba iphuthe ka kgobogo boka kobo.

³⁰Morena ke tlo mo leboga kudu ka molomo wa ka, ke tlo mo reta ke le gare ga lešaba.

³¹Gobane o lwela mmotlana, o mo namolela diatleng tša bao ba mo lahlilego.