Psalms 44

¹Modimo, re kwile ka ditsebe tša rena, ge botatawešo ba re anegela tša mediro o e dirilego mehleng ya bona, mehleng ya bogologolo.

²Ba ditšhaba o ba khudušitše ka seatla sa gago, wa agiša borawešo; ditšhaba wa di roba, bona wa ba atiša.

³Gobane naga ye ga se ba e tšea ka marumo a bona, ga se ba fenya ka matsogo a bona; ke diatla tša gago, letsogo la gago, le seetša sa sefahlego sago, gobane o be o ba rata.

⁴Modimo! Kgoši ya ka ke wena! Phalala o phološe Jakobo.

⁵Ge re na le wena, re tlo katelela manaba a rena; ka leina la gago re tlo katakela ba re rumolago.

⁶Gobane ga ke bote bora bja ka; le lerumo la ka le ka se mphološe.

⁷Morenamoledi manabeng ke wena; ke wena o lešago barehloi hlong.

⁸Modimo, re fadiša wena mehla yohle. Re leboga ina lago neng le neng.

⁹Fela, bjale o lahlile, O re gakantšhitše, o sa tšwe dira le rena.

¹⁰O dumetše ge manaba a re raka, ra hlakolwa ke bahloi.

¹¹Wa re gafa ra lewa bjalo ka dinku, wa re gašanya gare ga ditšhaba.

¹²Setšhaba sa gago o se rekišitše wa go lahla, wa se boelwe ke selo ka theko ya sona.

¹³O re gobošitše go baagišani, ra ba sekwero le sefela sa mathoko;

¹⁴Wa re dira leepo go bantle; re banyatšegi ditšhabeng.

¹⁵Ka mehla ke lebana le kgobogo ya ka, ke ribegetšwe ke dihlong tša sefahlego sa ka.

¹⁶Ka go kwa banyefodi le barogi, ka go bona lenaba le molefetši.

¹⁷Ka moka tšeo di re tletše; gomme ga ra go lebala; kgwerano ya gago ga re e hlanogele.

¹⁸Dipelo tša rena ga di boele nthago; mme dinao tša rena ga di lahle tsela ya gago.

¹⁹Gomme o re digetše dinageng tša diphukubje; o re khurumetša ka thiti ya lehu.

²⁰Mola re ka be re lebetše leina la Modima rena, ra iša diatla tša rena go medimo e šele.

²¹Gona wena Modimo, o ka be o sa šitwe ke tše bjalo; ešita le dithopa tša dipelo o a di tseba.

²²Aowaa, ge re bolawa, ge re sengwa dinku tša go hlabja, re bolaelwa wena mehla yohle.

²³Phafoga, Monga rena! O reng o robala? Phakgama, o lese go re lahla moka.

²⁴O reng o uta sefahlego sa gago, wa re lebala bobotlana le mohlako wa rena?

²⁵Gobane meoya ya rena e kateletšwe leroleng, mme mebele ya rena ga e tlogelane le mmu.

²⁶Nanoga, o re hlakodiše; o re phološe, gobane o yo botho.