Psalms 63

¹Modimo, Modimo wa ka ke wena, ke go hlologetšwe. Pelo ya ka e nyoretšwe wena; mmele wa ka o llela wena ke le lešokeng, leganateng, mo go sego meetse.

²Ke le bjalo ka lebelela wena Sekgethweng, ke re ke bone maatla a gago le letago la gago.

³Gobane botho bja gago bo phala bophelo ka botse; molomo wa ka o a go reta.

⁴Ke tlo realo ke go godiša ge ke sa phela; diatla tša ka di lotšha leina la gago.

⁵Moya wa ka e ke o khora moko le makhura; ganong ga ka go tšwa theto ya melomo ya mekgolokwane.

⁶Ge ke yo lala, ke gopola wena; ge ke phafoga, ke elelwa wena.

⁷Gobane o tloga o le mophološi wa ka; ke hlalala ke le moriting wa diphego tša gago.

⁸Moya wa ka o go gomaretše, o go šetše nthago; ke thekgwa ke letsogo la gago le maatla.

⁹Fela bala ba go tsoma moya wa ka gore ba o senye, bona ba tlo kodumela kua fasefase.

¹⁰Ba tlo lahlwa ba lewa ke lerumo, ya ba dijo tša diphukubje.

¹¹Kgoši yona e tlo ithabela Modimong; go tlo retwa bohle ba ba enago ka yena, gobane melomo e batago maaka e tlo thibja.