Psalms 88

¹Morena Modimo Mophološi wa ka! Ke hlaboša lentšu mosegare le bošego ke go lebeletše.

²Thapelo ya ka a e fihle pele ga gago; mme sello sa ka o se sekegele tsebe.

³Gobane moya wa ka o tennwe ke mahloko; mme bophelo bja ka bo atama molete wa bahu.

⁴Ke šetše ke balwa le bao ba go fologela moleteng; ke etša monna e a feletšwego.

⁵Ke lahleetšwe gara bahu, bjalo ka ba ba bolailwego ge ba letše mabitleng, ba o sa ba gopolego. Bona ba tlogelane le seatla sago.

⁶O mpeile fasefase moleteng, maswiswing, dikoting.

⁷Ke robja ke boima bja kgalefo yago; ke ribegetšwe ke mafula ago ohle.

⁸O nkgaoganya le ba ke tsebanago nabo; o ntirile seila sa bona; ke kgonyeletšwe, ga ke sa tšwa.

⁹Mahlo a ka a lapile ka go hlaka; Morena ke hlwa ke go bitša, ke iša matsogo go wena.

¹⁰A o sa tlo dira tša mehlolo ka ba ba hwilego? A diriti di ka tsoga mme tša go leboga?

¹¹A botho bjago bo sa retwa mabitleng? Therešo ya gago a e sa tlo retwa sekoting sa bahu?

¹²Matete a gago a a sa tlo tsebja kua swiswing? Go loka ga gago a go sa tlo tsebja gona kua nageng ya tebalo?

¹³Mme nna ke llela wena Morena; o gahlana le thapelo ya ka e sa le bošego.

¹⁴Morena, o reng o lahla moya wa ka? O reng o nkgerula?

¹⁵Ke mohlaki; ke wa go hwa go tloga bjaneng; ke robja ke tše o ntšhošago ka tšona ka ba ka gakanega.

¹⁶Kgalefo ya gago e nkwetše godimo, o mphetša ka tše šiišago;

¹⁷Di ntikologa bjalo ka mafula mehla yohle, di nape di mpoka.

¹⁸O nkaroganya le baratwa le bagwera le ba gešo ka leswiswi le.