Psalms 93

¹Morena o a buša; o apere borena; o bo apere, yena Morena Moitlhamamaatla. Le lona lefase le theilwe, ga le šuthe.

²Go theilwe sedulo sa gagwe go tloga kgaleng. O wa mehla e se nago mathomo.

³Mafula a a duma, Morena. Mafula a kwatša modumo wa ona; mafula a tsoša mogoo.

⁴Fela, le ge modumo wa mafula a magolo o godile, le ge lewatle le botoga, yo maatla mophagami ke wena Morena.

⁵Mabohlatse a gago a botegile ruri. Ngwako wa gago o loketšwe ke bokgethwa, Morena; go bjalo ka mehla le mehla.