Isaiah 28

¹Kotsi e tlo tlela botšhepi bja boipoti bja matagwa a Efuraimi, le letšoba le le ponnego, le a ikgantšhago ka lona, la thabeng ya moedi wo o nonnego wa ba go tagwa ke morara.

²Go na le yo maatla, wa kokoto, wa go rongwa ke Morena, mokadimolasefako, sesesedi se se ubulago, mokadimolamafula a a gogolago, wa letsogo la go uša fase.

³Botšhepi bja boipoti bja matagwa a Efuraimi bo tlo gatakelwa ka maoto.

⁴Le letšoba le le ponnego le a ikgantšhago ka lona, la thabeng ya moedi wo o nonnego, le tlo ka lego la thakangwaga, le motho a sa tšogo le bona a le fula a kwametša.

⁵Mohla woo Morena wa mašaba e tlo ba yena mofapahlogo wa bokwala le seala sa botšhepi sa mašalela a tšhaba sagwe.

⁶Moahlodi o tlo mo nea moya wa toko, bogale o tlo bo nea bao ba go thibela manaba dikgorong.

⁷Le bona ba ba thekesela ka morara, ba phokaela ka sebela, bomphamodimo le baboni ba phokaela ka sebela, ba fenywa ke morara, ba thekesela ka bjalwa, ba thekesela ge ba rera, ba apaapa kahlolong.

⁸Mo go fela mo ba jago go tletše mahlatša le tšhila, ga go sa le sebaka.

⁹Yo bjalo a ka ruta mang bohlale? A ka lemoša mang ditaba? A le bana a ka ruta, bona ba sa tšogo tshwa letswele?

¹⁰Go thwe: Molao, molao! -- Molao, molao! -- Taelo, taelo! -- Taelo, taelo -- leka fa, moo!

¹¹Hleng setšhaba go bolelwa le sona' ka melomo e goloketšago, ka leleme le le sa kwegego.

¹²Mola e le sona se se boditšwego gwa thwe: Ke wona molao, šo! Ladišang ba lapilego; ba lapologe fa! Fela, ba ganne go kwa.

¹³Bjalo ge go thwe: Molao, molao! -- Molao, molao! -- Ge go thwe: Taelo, taelo! -- Taelo, taelo! Ge go thwe: Leka fa, leka moo go bona e ke ke lentšu la Morena, gore ba sepele ba yo wa ka sa nthago ba robege, ba tanywe, ba swarwe.

¹⁴Bjalo kwang gee, se Morena a se boletšego, lena banna ba dikwero, le bušago tšhaba se sa Jerusalema.

¹⁵Ge le ka re: Re lakane le lehu, re kwane le bodulabahu, la re: Ge go fihla kotlo ya gogola batho, e ka se re fihlele, gobane re khuta ka maaka, re utama ka bofora,

¹⁶Bjalo Morena Mong a bohle o re: Ke nna ke beago swika la motheo mo Tsione, swika le tsebjago gore le tiile, la bohlokwa, la go thekga motheo. E a dumelago ga a tšhabe.

¹⁷Selekanyi ke bea molao; kelo ke bea toko. Bokhuto bjola bja maaka, sefako se tlo bo thunthunya. Boutamo bjola bo tlo gogolwa ke mafula a meetse.

¹⁸Ge e le molaka wo le rego le o tlemile le lehu, o tlo fedišwa; go kwana le bodulabahu go ka se ke gwa tia; mohla mafula a kotlo a tlago, a tlo le ribegetša.

¹⁹Ge a feta, a tlo le gogola; a tlo fihla mehla yohle ge e sa le bosasa, le mosegare, le bošego. Gomme le tlo tšhoga ge le e kwa se le sebelwago sona.

²⁰Gobane malao ke a makopana, ge motho a re ke a naba; kobo e a hlaela, ge motho a re ke apare.

²¹Gobane Morena o tlo tsoga boka mola thabeng ya Peratsime (I Sam. 5:17-25), a galefa boka mohla wola moeding wa Gibeoni (I Kron. 14:13-16); o tlo dira se a se dirago, modiro wo o sešogo wa dirwa.

²²Bjale le se ke la kwera, gore tlemo tša lena di se tlo swineletšwa; gobane nna ke kwile lentšu la Morena wa mašaba ge a tiiša a re: Tshenyo e tlo tlela lefase ka moka.

²³Theetšang le kwiše lentšu la ka; phafogang le kweng se ke se bolelago.

²⁴A molemi a ka fela a lema ka mehla, ge a re ke tlo bjala? A fa a ka hlwa a kgatha a lema ka mehla?

²⁵A ka se re a lekelantše, a tsebo bjala peu ya lenonya, a bjala dinawa, a bjala mabele le mphogo mo temeng ya gona, le dihlodi malepeng a tšhemo?

²⁶Mokgwa wo o swanetšego o o rutilwe ke Modimo wagwe.

²⁷Bjale lenonya ga le folwe ka sefolo, nawa ga di kgokgošwe ka leswika. Lenonya le a hlohlorwa, nawa di folwa ka phatana.

²⁸Thoro ya dijo ga e pšhatliwe; motho ga a fo tula ka sefolo; ga a fola goba a kgokgoša, thoro ga a e pšhatle.

²⁹Le Morena wa mašaba o dira ka mokgwa woo. Morero wa gagwe ke wa matete; bohlale bja gagwe ke bjo bogolo.