Isaiah 37

¹Kgoši Hiskia ge a ekwa tšeo, a gagola diaparo tša gagwe, a ya Ngwakong wa Morena.

²A roma Elyakima molaki wa mošate, le Sebena mongwadi, le bagolo ba baperisita, ba ya go Jesaya morwa wa Amotsi ba apere mankgeretla,

³Ba tla ba re: Hiskia o re: Lehono ke la tlalelo, ke la go rogwa le go gobošwa; ke “Ngwana o kgauswi, go hlaela maatla a pelego.”

⁴Mohlongwe Morena Modimo wa gago o kwile tše Rabasake a di boletšego a romilwe ke mong wa gagwe kgoši ya Asuri, a goboša Modimo e a phelago ka maroga; Morena Modimo wa gago le yena o a kwele. Bjale hlatloša thapelo ya go rapelela mašalela a sa lego gona.

⁵Bahlanka ba kgoši Hiskia ba tlile go Jesaya,

⁶Yena a fetola a re: Botšang mong wa lena le re: Morena o re: O se ke wa tšhoga mantšu a o a kwelego, ao bahlanka ba kgoši ya Asuri ba nkgobošago ka ona.

⁷Se nna ke tlogo se dira sese: Ke tlo roma moya wa ka, mme o tlo kwa modumo, a boela nageng ya gabo; gona kua nageng ya gabo ke tlo mo tekola ka lerumo.

⁸Bjale Rabasake ge a goma, a kwa ge ba re: Kgoši ya Asuri o gometše motse wa Lakisi, a mo hwetša a hlabana le motse wa Libina.

⁹O be a sebetšwe gore Thirihaka kgoši ya Kuše o tšwile dira, o tla go hlabana nago. A re go di kwa, a romela batseta go Hiskia, a re:

¹⁰Botšang Hiskia kgoši ya Juda le re: Se forwe ke Modimo wa gago yo o mmotilego wa re: Jerusalema go ka se gafelwe diatleng tša kgoši ya Asuri.

¹¹Hleng le wena o kwele tše dikgoši tša Asuri di di dirilego dinago ka moka, ya ba digafiwa moka. A o re o ka phologa?

¹²Ditšhaba tše botate ba di feditšego a medimo ya tšona e di phološitše? Gosana le Harane le Retsefe, le ba Edene la ba Thelasara?

¹³E kae kgoši ya Hamathi, le kgoši ya Arapadi, le kgoši ya motse wa Sefarafaima, le Hena le Ifa?

¹⁴Hiskia a amogela mangwalo diatleng tša batseta, a a bala; a napa a rotogela Ngwakong wa Morena, a a phutholla pele ga Morena.

¹⁵Gomme Hiskia a le pela ga Morena a rapela a re:

¹⁶Morena Modimo wa Isiraele, Kokama Bakerubi, o Modimo o nnoši wa mebušo gohle ya lefase. Ke wene o dirilego legodimo le lefase.

¹⁷Morena, o ko sekege tsebe o kwe, lebeleša o bone! Kwaa mantšu, a Sanheribe a a rometšego go goboša Modimo a phelago.

¹⁸Morena, ke go rereša, dikgoši tša Asuri di sentše ditšhaba le dinaga tša tšona.

¹⁹Medimo ya tšona o e lahletše mollong, gobane e be e se medimo, e le mediro ya diatla tša batho, e le dikota le maswika, ba kgona go e fediša.

²⁰Bjale, Morena Modimo wa rena, re phološe seatleng sa gagwe, mebušo yohle ya lefase e tle e tsebe gobane Modimo ke wene Morena o nnoši.

²¹Ke mo Jesaya morwa wa Amotsi a romilego motho, a tla a botša Hiskia a re: Morena Modimo wa Isiraele o re: Tše o nkgopetšego tšona ka baka la Sanheribe kgoši ya Asuri ke di kwele.

²²Sele lentšu le Morena a mmoletšego ka lona; o re: Mosetsana e, ngwanenyana wa Tsione, o a go nyatša, o a go sega. Ngwanenyana wa Jerusalema o go šišinyetša hlogo.

²³Ke mang yo o bego o mo fotlela? Ke mang yo o mo rogilego? Ke mang yo o mmoletšego ka mašata? Yo o bego o mo khutlolela mahlo ke Mokgethwa wa Isiraele.

²⁴Wa roma batseta wa kwera Mong a bohle wa re: Ke namela thaba ka bontši bja koloi, ke tsena gare ga dithaba tša Libanoni ke reme merokwana e metelele le matsaka a megobogobo, wa re: Ke namela ntlheng ya thaba, mo tšhemong ya gagwe ya sethokgwa.

²⁵Wa re: Ke fatile ka nwa meetse, ke gopiša noka tša Egipita ka lwao la ka.

²⁶A ga wa ka wa kwa? Dilo tše di dirwa ke nna, di phethiwa ke nna go tloga ka mehla ya kgalekgale; ka di tliša bjale ge wena o šwalalanya metse ya dibo ya ba mekgobo ya marako.

²⁷Ke ka baka leo beng ba yona ba rephago ditho, ba tšhoga ba galoga boka ngwang tšhemong, ba etša mahlogedi a manana, le bjang godimo ga morako, ba etša mabele a hwago ka phori a sešo a tswala.

²⁸Mo o dulago, le mo o tšwago, le mo o yago, ke a go tseba, le mo o nthumotšego.

²⁹Bjale ka gobane o nthumotše ka kwa ka ditsebe o itheta, ke tlo go tsenya mogala nkong, ka tlema molomo wa gago ka lerala la ka, ka go gomiša ka tsela ye o tlilego ka yona.

³⁰Sešupo se wene Hiskia o tlogo di bona ka sona sese: Lenyaga go tlo lewa di imedišago; išago go tlo lewa makgwakgwa; ka ngwaga wa boraro le tlo bjala le be le bune. Le tlo lema rapa tša merara la ja dienywa tša tšona.

³¹Gobane ba moloko wa Juda ba ba tlo go phonyokga ba šala, ba tlo boela ba hlaba medu ba mela ba bea dienywa.

³²Gobane mašalela a tlo tšwa Jerusalema, ba ba phonyokgilego ba tlo tšwa thabeng ya Tsione. Ke tše Morena a pelofaletšego go di dira.

³³Gobane tše Morena a bolelago kgoši ya Asuri ka tšona šedi: A ka se tsene motseng wo; a ka se betše mosebe wa fihla go wona; a ka se batamele ka dikotse; a ka se o rakelle.

³⁴O tlo goma ka tsela ye a tlilego ka yona; a ka se tsene fa motseng! Morena o realo.

³⁵O re: Motse wo ke tlo o šireletša, ke tlo o phološa ka baka la leina la ka, le ka baka la Dafida mohlanka wa ka.

³⁶Gomme bošego bjoo gwa tšwa Morongwa wa Morena, a tla mešašeng ya Baasuri a bolaya banna ba dikete tše lekgolo le nago le masome a seswai a metšo e mehlano. Ge ka moswana ba tsoga, ba bona ditoto mo go fela.

³⁷Sanheribe kgoši ya Asuri a tloga, a goma, a boela gae kua Ninife.

³⁸Ya re a sa khuname ngwakong wa Nisiroko modimo wa gagwe, barwa ba gagwe, Adirameleke le Saretsere, ba mmolaya ka tšhoša, ba tšhabela nageng ya Ararate; bogoši bja tšewa ke Asarahadoni morwa wa gagwe.