Isaiah 48

¹Kwang, lena ba moloko wa Jakobo, bao le bitšwago ka leina la Jakobo, ba le tšwago sedibeng sa Juda, bao le enago ka leina la Morena, bao leina la Modimo wa Isiraele le thupelago ka bona, e se ka potego le ka toko.

²Gobane ba ipitša ba motse o mokgethwa, ba ithekga ka Modimo wa Isiraele, Eo leina la gagwe e lego Morena wa mašaba.

³Tše di diregilego kgale ke be ke le tsebišitše pele; ka di dira mme la tšhoga ge di tšwelela di tšwile ganong ga ka ke di boletše.

⁴Ke ka gobane ke tseba ge o thatafetše, ke tseba ge molala wago e le wa tšhika tša tshipi; o wa phatla ya mphiri.

⁵Ke fela ke go botša pele di sešo tša tšwelela, gore o se tlo re: Di dirilwe ke modimo wa ka, di laetšwe ke seswantšho sa ka le dipheko tša ka.

⁶Le di kwele tšohle. Bjale lena, a le ka se be dilhatse tša tšona? Bjale ke go botša tše mpsha le dithopa tše o bego o sa di tsebe.

⁷Ke tše di hlolegago bjale, e sego kgale; ke lehono ge o tlo di kwa, o se tlo re: Ke be ke di tseba.

⁸Ga o ešo wa di kwa, le go tseba o be o sa di tsebe; tsebe tša gago di be di sešo tša thibologa. Ke ka gobane ke tseba ge o le mohlanogi ruri, leina la gago ke Moarogi go tloga bjaneng.

⁹Ge ke diegile go galefa, ke direla ina la ka; ge ke itshwara ke sa go fediše ke direla gore ke retwe. Tseba gore, ke be ke go iša meubeng, ka hwetša o se tshipi tshehla, ke go lekile sebešong sa mahlomola.

¹⁰Ge ke dira bjalo ke ka baka la ka ka baka la ka ruri. A nka fo gobošwa? Ina la ka nka se le neele yo mongwe.

¹¹

¹²Hee Jakobo, kwaa se ke se bolelago, le wena Isiraele e ke go biditšego. Ke nna Thakamathomo le Phethamafelo.

¹³Hleng lefase le theilwe ke seatla sa ka; le legodimo le adilwe ke letsogo la ka. Ke nna ke di biditšego tša tšwelela tšohle.

¹⁴Kgobokanang ka moka le theetše! Ke ofe wa bona a kilego a bolela a re: Moratwa wa Morena o tlo dira Babele se se ratwago ke Morena; letsogo la gagwe le tlo di dira Bakaladea?

¹⁵E a di boletšego ke nna; ke nna ke mmiditšego. Ke a mo tliša; mme tsela ya gagwe o tlo e kgona.

¹⁶Batamelang fa go nna, le di kwe: Go tloga go thomeng ga ka di bolela ka thopeng; ke na natšo, e sa le mola di thomega. Bjale Morena Mong wa bohle o nthomile le moya wa gagwe.

¹⁷Morena Molopolodi wago Mokgethwa wa Isiraele o re: Nna Morena Modimo wa gago ke go ruta tše di go holago; ke go sepediša mo tseleng ye o swanetšego go e swara.

¹⁸Mola o ka be o theeditše ge ke go laela, molao wa gago o ka be o swana le noka, go loka ga gago go ka be go etša maphoto a lewatle.

¹⁹Ba moloko wago ba ka be ba atile bjalo ka lešabašaba, ba o ba tswalago ba ka be ba atile bjalo ka dithorwana tša lona; mme maina a bona a ka be a sa phumolwe pele ga ka.

²⁰Khudugang Babele! Tšhabang moo Kaladea! Hlagišang mekgolokwane le atlatše taba ye go fihla mo lefase le gomago gona, le re: Morena o lopolla mohlanka wa gagwe Jakobo.

²¹Ga ba kwe lenyora ge a ba sepediša mašokeng, o ba thulela meetse leswikeng; o fatola leswika, meetse a ela.

²²Ba babe ga ba na molao! O realo Morena.