Isaiah 53

¹Ke mang a dumetšego taba tše re di begago, mme letsogo la Morena le utolletšwe mang?

²O medile pele ga gagwe bjalo ka lehlogedi, boka modu mo mmung o omilego. O be a se na bokwala le letago; le ge re mmogela, o be a se na lebopo le re kago le thabela.

³Monyadiwa e a lahlilwego ke banna, monna wa dihlokofalo, wa go tsebja ka mahloko; o nyaditšwe boka mogerulwa; ga ra ka ra mo re selo.

⁴Anthe o be a rwele a rena malwetši, o ipelešitše a rena mahloko. O hlabilwe ka baka la dikarogo tša rena. Gomme rena ra mo sema moteiwa, e a otlwago ke Modimo, a hlokofatšwago.

⁵Anthe o hlabilwe ka baka la dikarogo tša rena; o tlapirigantšwe ka baka la makgopo a rena. Kotlo e wetše yena godimo, gore re bone khutšo; ra tlelwa ke go fola ka dintho tša gagwe.

⁶Rena ka moka re be re timetše bjalo ka dinku, mang le mang a lebeletše tsela ya gagwe; gomme Morena a lahlela makgopo a rena ka moka go yena.

⁷A tlaišwa, yena a ikokobetša, a se ke a ba a ahlama, a etša kwanyana e išwago tlhabong, a etša nku ge e ikhomolela pele ga ba e kotago, a se ke a ba a ahlama.

⁸O ntšhitšwe tlalelong le kahlolong. Mo go ba mehla ya gagwe o hlathwa ke mang? Hleng o kgaotšwe nageng ya ba phelago ka baka la karogo ya setšhaba sa ka, kotlo e lebane sona.

⁹Ba mo laeletše go fihlwa le ba babe, lebitla lagwe le go bahumi, le ge a sa dira tša sehlogo, go se bofora molomong wa gagwe.

¹⁰Gomme Morena o ratile go mo šilakanya ka mahloko. Ge a beile moya wa gagwe ya ba selefa, o tlo bona bana le go phela galelele; mme morero wa Morena o tlo letlega ka atla tša gagwe.

¹¹O tlo di bona ka tapišego ya moya wa gagwe, mme a hora. Yena mohlanka wa ka moloki, ka tsebo ya gagwe o tlo lokafatša ba bantši, mme molato wa bona o tlo rwalwa ke yena.

¹²Ka baka leo ke mo nea kabelo mo go bagolo, bagale e tlo ba thebola tše a tlogo di abaganya; ka gobane o tšholletše moya wagwe mo lehung, a balwa le badiradibe, a rwala dibe tša ba bantši, a humela baarogi.