Isaiah 62

¹Ke ka baka la Tsione ge ke sa homole; ke ka baka la Jerusalema ge ke sa iketle, gore toko ya gona e be e tšwelele bjalo ka phadimo, phološo ya gona e be e gotetšege bjalo ka lebone.

²Ditšhaba di tlo bona toko yago; magoši ohle a tlo bona bokwala bja gago; o tlo bitšwa ka leina le lefsa le le tlogo bolwa ke molomo wa Morena.

³O tlo ba mphapahlogo wa bothakga atleng tša Morena, le seala sa bogoši sa go swarwa ke Modimo wa gago.

⁴O ka se hlwe o bitšwa sešuana, mme naga ya gago ba ka se hlwe ba e re ke marope; ba tlo re o Monkgahli; naga ya gago ba tlo re ke Monyalwa; gobane Morena o tlo go thabela, mme naga ya gago e tlo ba le mong wa yona.

⁵Yena e a go agilego o tlo go tšea boka lesogana le tšea kgarebe. Modimo wa gago o tlo go thabela bjalo ka monyadi ge a thabela monyalwa.

⁶Hee Jerusalema, merakong ya gago ke beile bahlapetši ba ba ka se kego ba homola mosegare le bošego. Hee lena baeletši ba Morena, le se ke la homola.

⁷A se ke a ba a kwa le homotše, a be a age Jerusalema, a be a go dire motse wa go retwa lefaseng.

⁸Morena o enne ka tsogo lagwe le letona, ka tsogo la gagwe le maatla, a re: Nka se ke ka ba ka leša mabele a gago manaba; batho ba mathoko ba ka se buše ba nwa morara wa gago wo o itiretšego wona.

⁹Mabele a tlo lewa ke ba ba a bunnego, ba reta Morena; bafudi ba morara ke bona ba tlogo o nwa malapeng makgethwa a ka.

¹⁰Fetang! Fetang! Le yo bula kgoro. Bulelang setšhaba tsela! Lekelelanyang, lekelelanyang mmila! Kgolang maswika! Tsemelang ditšhaba sefoka!

¹¹Le tsebe ge Morena a kwaditše foko lagwe la yo fihla mo lefase le gomago; o re: Botšang morwedi wa Tsione le re: Mophološi wago šo o etla; šo o etla a na le tša go go šetša; o etwa pele ke moputso wagwe.

¹²Bona ba tlo thwe ke setšhaba se sekgethwa, banamolelwa ba Morena; mme ba tlo re o Monyakiwa, motse o sa tlogelwego.