Isaiah 65

¹Ba ba bego ba sa mpotšiše ke re a ba batamele; ba ba bego ba sa nnyake ke re a ba nkhwetše; mme setšhaba se se bego se sa rapele ina la ka, ke bolela naso ke re: Ke nna e!

²Ke hlwile ke emiša atla tša ka ka baka la setšhaba sa dinganga, sa go swara tsela tše di sego botse, sa go ya ka maithatelo.

³Ke setšhaba se se bego se lebana le nna ka borumolane, ka didimo tša go išwa mašemong, ba di fiša dibešong tša makokota a a tšhumilwego.

⁴Ba ba bego ba itiša mabitleng, ba tsetsa mo go šiišago, ba ja nama ya kolobe, dibjaneng tša bona ba dubela dilo tša ditšhila.

⁵Ke bona ba go re: Ema moo, o se mpatamele, ke na le tše di ilago. Bona bao ba ka muši dinkong tša ka, ke mollo o tukago ka mehla.

⁶Tšona tšeo di dula di ngwadilwe pele ga ka; mme nka se homole; nka se lese go bušološetša dilo tšeo mo go bona.

⁷Molato wa lena ke o tee le molato wa botataweno. O realo Morena. Ba be ba fiša diorelo dithabeng, ba nkgoboša mebotong; ke tlo ba elela se se lebanego tiro tša bona.

⁸Morena o re: Ge go hwetšwa kenyo tša morara di sa na le todi, ba tlo re: Se di senye, di sa na le mohola. Le nna ke tlo realo ka baka la bahlanka ba ka, ke se tlo ba senyamoka.

⁹Go Jakobo ke tlo ntšha peu, go Juda ke tlo ntšha bao ba go tlo dula thabeng tša ka; tša tlo dulwa ke balata ba ka ba ke ba hlaotšego, ya ba naga ya bona.

¹⁰Molala wa Sarona e tlo ba phulelo ya mehlape; moedi wa Akore e tlo ba wa meraka ya dikgomo tša setšhaba sa ka, sa ba ba nnyakago.

¹¹Fela, lena bahlala Morena, ba le itebatšago thabakgethwa ya ka, ba le ipegago kua Gadi ka meruswi, ba le tšhelelago Meni tše di hlotlilwego,

¹²Lena ke tlo le balela tšhoša, le tlo obamišwa la bolawa; gobane ke biditše la se arabe; gobane ke boletše la se theetše, la dira tše di mpefetšego, la itlhaolela tše di sa nkgahlego.

¹³Ke wona molato woo ge Morena Mong wa bohle a re: Tsebang, bahlanka ba ka ba tlo ja, mme lena la hwa ka tlala. Tsebang, bahlanka ba ka ba tlo nwa, mme lena la nyorwa. Tsebang, bahlanka ba ka ba tlo thaba, mme lena la lewa ke dihlong.

¹⁴Tsebang, bahlanka ba ka ba tlo hlalala ba ipshina, mme lena le tlo hlatloša dillo ka masetlapelo, le tlo golola le hlobogile.

¹⁵Ina la lena le tlo šala e le la go roga, ge bahlaolwa ba ka ba re: Morena Mong wa bohle a a go bolaye boka bona bao! Mme bahlanka ba gagwe o tlo ba bitša ka leina le šele,

¹⁶Gore nageng yeno e a itšhegofatšago a itšhegofatše ka Modimo wa makgonthe; e a enago nageng yeno a ene ka Modimo wa makgonthe; gobane tlaletšo tša kgale di tlo ba di lebetšwe, di širogile pele ga ka.

¹⁷Le tsebe gore ke tlo hlola magodimo a mafsa le lefase le lefsa; tša kgale di ka se hlwe di tsebja, le mo pelong ya motho di ka se hlwe di rotoga.

¹⁸Mme lena hlalalang le fele le thabela tše nna ke tlogo di hlola. Tsebang ge e le nna Mohlodi wa Jerusalema motse wa tlhalalo, Mohlodi wa lethabo la setšhaba sa gona.

¹⁹Motse wa Jerusalema, le nna ke tlo o thabela, ka hlalalela tšhaba sa ka. Go bona go ka se hlwe go kwala dillo, le ge e le ntšu la motho a kwago bohloko.

²⁰Go ka se hlwe go eba le lesea la go phela matšatšana fela; go ka se be le mokgalabje e a sa tlatšego mehla e mo lekanego; go tlo hwa e mofsa a ne nywaga e lekgolo; modiradibe go tlo rogwa wa nywaga e lekgolo.

²¹Nywako ye ba e agago ba tlo dula mo go yona; dirapa tša merara, ba tlo lema ba ja kenyo tša tšona.

²²Ba ka se ke ba aga, gwa dula o šele; ba ka se ke ba lema gwa ja o šele; gobane matšatši a batho ba ka a tlo lekana le matšatši a sehlare, mme bahlaolwa ba ka ba tlo phela ka tše ba itiretšego tšona, tša tlo ba tša ba onalela diatleng.

²³Ba ka se itapiše, mme ya ba lefela; ba ka se tswale bana ba go tlo hwa ka pela; gobane e tlo ba mohuta wa bašegofatšwa ba Morena, bona le bana ba bona.

²⁴E tlo re ba sešo ba bitša, ka ba ke šetše ke araba; e tlo re ba sa bolela, ka ba ke šetše ke ekwa.

²⁵Phiri le kwana di tlo fula gotee; tau e tlo fula bjang wa kgomo; noga, dijo tša yona e tlo ba lerole. Go ka se hlwe go senywa go dirwa bošula thabeng e kgethwa ya ka yohle. O realo Morena.