Zechariah 11

¹Hee Libanoni, bula difata tšago, mollo o tšhume dihlare tša gago tša morokwana.

²Hee lena megobogobo, tsošang sello! Go wile bomorokwana, go rapaladitšwe mere ya matsaka. Lena merekure ya Basani, tsošang sello. Go senyegile sekgwa se se bego se sa tsenwe.

³Kwang dillo tša badiši; letago la bona le ile. Kwang mokgoši wa ditau tša madumaedi; go senyegile botse bja nokeng ya Jorodane.

⁴Morena Modimo wa ka o mpoditše a re: Diša dinku tšeo tša go hlabja,

⁵tše di bolawago ke ba ba di rekago, mme ba re ga ba ne molato. Barekiši ba tšona ba re: A go retwe Morena; na re humile! Mme badiši ba tšona ga ba di šetše.

⁶Le nna bjale beng ba naga ye nka se hlwe ke ba setša. O realo Morena. Batho ba, mang le mang, ke tlo ba gafela tsogong la wa gabo, tsogong la kgoši ya gagwe. Ba tlo thopa naga ye, nna ke se namolele motho.

⁷Nna ka diša dinku tšeo tša go hlabja, e le mohlape wa go setla pelo. Ka swara mapara a mabedi; le lengwe ka re ke “Boleta”, le lengwe ka re ke “Kwano”.

⁸Ka re e diša dinku tšeo, ka raka badiši bararo ka kgwedi e tee, ka ge di ntenne, le tšona di sa nthate.

⁹Ka re nka se hlwe ke di diša; se se hwago a se hwe; tše di senyegago a di senyege; tše di šalago a di jane.

¹⁰Ka tšea lepara la “Boleta” ka le roba; ya ba go fediša kgwerano, ye ke e dirilego le ditšhaba tšohle.

¹¹Ge kgwerano e fedišwa, ka lona tšatši leo dinku tša goo setla pelo, tše di bego di lebeletše nna, tša tseba gobane ke tše di boletšwego ke Morena.

¹²Nna ka bolela nabo ka re: Ge le ka rata nneeng moputso wa ka; ge le sa rate le ka lesa. Mme ba mpha moputso wa ka wa disilifera tše masome a mararo.

¹³Morena a bolela le nna a re di lahlelwe polokelong ya matlotlo; ke yona theko ye ba rego ke rekwa ka yona. Nna ka tšea disilifera tšeo tše masome a mararo ka di lahlela polokelong ya Ntlo ya Morena.

¹⁴Ka roba lepara lela la bobedi la “Kwano”, ya ba go feditša tswalano ya moloko wa Juda le wa Isiraele.

¹⁵Morena a bolela le nna a re: Boela o sware mapara a modiši wa lešilo.

¹⁶Gobane o tsebe gore nageng yeno ke tsoša modiši e a sa šetšego tše di fokolago, e a sa tsomego tše di timelago, a sa alafego tše di gobetšego, e a sa lotego tše di thabilego; sa gagwe e tlo ba go ja dinama tša tše di nonnego, le go kokona le hlaku tša tšona.

¹⁷Joo, modiši wa lefela, mohlalamohlape! Tsogo lagwe le tlo hlabja ke lerumo, le leihlo lagwe la le letona. Tsogo lagwe le tlo golofala, lona ihlo leo lagwe le tlo hwa.