John 3

¹Go be go na le motho e mongwe wa bafarisei; leina la gagwe ke Nikodemo, wa bagolo ba Bajuda.

²Yena e a tla go Jesu e le bošego a bolela a re: Moruti! Re tseba ge o le moruti e a tšwago go Modimo, ka gobane ga go motho e a kgonago go dira mehlalo ye o e dirago ge Modimo a se na le yena.

³Jesu a fetola a re: Ruri, ruri, ke a go botša, ge motho e se wa go tswalwa lefsa, a ka se ke a bona mmušo wa Modimo.

⁴Nikodemo a re: Motho a ka tswalwa bjang ge a tšofetše? A a ka buša a boela mmeleng wa mmagwe, a tswalwa?

⁵Jesu a re: Ruri, ruri, ke a go botša, ge motho a sa tswalwe ka meetse le ka Moya, a ka se ke a tsena mmušong wa Modimo.

⁶Sa go tswalwa ke nama ke nama; sa go tswalwa ke Moya ke moya.

⁷O se kgotse ge ke go botša ke re: le swanetše go tswalwa lefsa.

⁸Moya o fokela mo o ratago; mme modumo wa wona o a o kwa, o sa tsebe mo o tšwago le mo o yago. Go bohle ba ba tswetšwego ke Moya go ba bjalo.

⁹Nikodemo a mmotšiša a re: Gomme tseo di direga bjang?

¹⁰Jesu a fetola a re: O re o le moruti wa Isiraele wa se tsebe tšeo?

¹¹Ruri, ruri, ke a go botša, re bolela se re se tsebago; re dihlatse tša tše re di bonego; mme bohlatse bja rena ga le bo amogele.

¹²Ge le sa dumele mola ke le botša tša mo lefaseng, le tlo dumela bjang ge ke le botša tša legodimong?

¹³Ga go e a kilego a rotogela legodimong, ge e se e a fologilego a etšwa gona, yena Morwamotho wa go ba legodimong.

¹⁴Gomme bjalo ka ge Moshe a fegile noga kua lešokeng, Morwamotho le yena o tlo fegwa ka mokgwa woo,

¹⁵Gore mang le mang e a mo dumelago a se lahlege; a upše a be le bophelo bjo bo sa felego.

¹⁶Gobane Modimo o ratile lefase gakaakaa, a ba a le nea Morwa wa gagwe e a tswetšwego a nnoši, gore mang le mang e a mo dumetšego a se ke a lahlega, a be le bophelo bjo bo sa felego.

¹⁷Gobane Modimo, Morwa wa gagwe ga a ka a mo romela lefaseng gore a le ahlole; o mo romile gore lefase le phološwe ke yena.

¹⁸E a mo dumetšego a ka se ke a lahlwa. E a sa dumelego, yena o šetše a tšwilwe, gobane a sa ka a dumela leina la Morwa motswalwaeši wa Modimo.

¹⁹Kahlolo yona še: Seetša se tlile lefaseng; gomme batho ba rata leswiswi gagolo, ba nyatša seetša gobane mediro ya bona e le e mebe.

²⁰Gobane modiratšempe mang le mang o hloile seetša, ga a tle go sona, gore mediro ya gagwe e se ke ya kgalwa.

²¹Modiratherešo yena o tla seetšeng, gore mediro ya gagwe e bonagale, gobane e dirilwe Modimo a le mo go yona.

²²Ka la ka moswana Jesu a tšwela nageng ya Judea a na le barutiwa ba gagwe; a fetša lebaka a le gona a na le bona a kolobetša.

²³Ke ge Johane le yena a le Enone kgauswi le Salima a kolobetša, gobane felo fao go be go na le meetse a mantši, batho ba tla ba kolobetšwa.

²⁴Ke mola Johane a sešo a išwa kgolegong.

²⁵Gwa tsoga kgang mo go barutiwa ba Johane le Bajuda ka baka la tlhatso.

²⁶Ba tla go Johane ba re: Moruti, motho yola a bego a na le wena mošola wa Jorodane yo o mmeetšego bohlatse, šolee o a kolobetša, mme bohle ba ya go yena.

²⁷Johane a fetola a re: Ga go se motho a ka fogo se tšea, ge a sa fiwe se etšwa legodimong.

²⁸Lena beng le dihlatse tša ge ke boletše ka re: Nna ga se nna Kriste. Ka re: Ke moromiwa wa go mo eta pele.

²⁹Monyadi ke eo a nago le monyalwa. Ge e le mogwera wa monyadi, ge a eme mme a mo kwa, lentšu la monyadi o le thabela ka gogolo. Lethabo la ka leo bjale ke gona le phethegile.

³⁰Yena ke wa go gola; nna ke wa go kokobela.

³¹Motšwagodimo o okametše bohle. Wa lefase ke wa lefase, mme o bolela e le wa lefase. Mookamelabohle ke eo a tšwago legodimong.

³²Ke yena hlatse ya tše a di bonego le tše a di kwilego; mme bohlatse bja gagwe ga bo amogelwe ke motho.

³³E a amogelago bohlatse bja gagwe, o tiišitše le go re: Modimo ke wa go rereša.

³⁴Gomme moromiwa wa Modimo o bolela mantšu a Modimo, ka ge Modimo a sa lekanyetše Moya ka go hlaetša.

³⁵Tatago Morwa o rata Morwa wa gagwe, mme tšohle o di beile seatleng sa gagwe.

³⁶E a dumelago Morwa, o na le bophelo bjo bo sa felego. E a sa mo dumelego, a ka se ke a ba a bo bona; se se tlogo dula se mo okametše ke bogale bja Modimo.