1 Corinthians 13

¹Le ge nka bolela ka maleme a batho le a barongwa, ka upša ka hloka lerato, gona nka ba tshipi e llago, nka ba moropa wo o dumago.

²Le ge nka ba le boporofeta, ka tseba diphiri ka moka, ka ba le tlhaologanyo yohle, ka ba le tumelo wa go šuthiša dithaba, ka upša ka hloka lerato, gona ga ke selo.

³Le ge nka hlallela ba hlokago ka tše e lego tša ka tšohle, ge nka gafa mmele wa ka wa tšhungwa ka mollo, ka upša ka hloka lerato, go ka se nkhole selo.

⁴Lerato ga le fele pelo. Lerato ke le botho. Lerato ga le tsebe mona; ga le na go ikgantšha, ga le ikgogomoše.

⁵Ga le dire tša dihlong; ga le tsome go ikhola; ga le hlohloletšege; ga le loge maanomabe;

⁶ga le thabele bobe; le thaba le therešo.

⁷Le bipa tšohle; le dumela tšohle; le holofela tšohle; le kgotlelela tšohle.

⁸Lerato ga le fele neng le neng. Ge e le diporofeto, tšona di tlo fela; le ona maleme a tlo goma; le tsebo e tlo fela.

⁹Gobane tše re di tsebago ke diripanyana fela; le ge re porofeta, ke diripanyana fela.

¹⁰Mohla go tlago tše botlalo, go tlo fela tša boripanyana.

¹¹Mola ke sa le ngwana, ke be ke bolela boka ngwana, ke be ke hlaologanya boka ngwana, ke eleletša boka ngwana. Bjale ke le monna, tša bjana ke di fedišitše.

¹²Ge e le bjale re bona ka seiponi, re sa kwa ka nyepo; mohla woo re tlo bona re lebane natšo. Se ke se tsebago bjale ke boripanyana fela. Mohla woo ke tlo tseba moka boka le nna ge ke tsebilwe moka.

¹³Ke moka, di šalago di le gona ke tumelo, le kholofelo le lerato, tše tharo tše. Gomme se segolo mo go tšona ke lerato.