1 Corinthians 16

¹Ge e le dineo tše di ntšhetšwago ba bakgethwa, le lena dirang ka mo ke laetšego diphuthego tša kua Galatia.

²Ka la go hlathlama Sabatha e mongwe le e mongwe a ntšhe sa gagwe, a tšhele ka mo a ruilego ka gona gore e se re ge ke etla, ya ba gona go tšhelwago.

³E tlo re ge ke fihlile, ke tlo hlaola ba le ba botilego, ka ba roma ba swere mangwalo, ba tlo ya ba iša dimpho tša lena kua Jerusalema.

⁴Ge e tlo ba tše di lekanego gore go ye le nna, gona ba tlo wela tsela ba na le nna.

⁵Ke tlo tla go lena ka tsela ya Matsedonia, gobane naga ya Matsedonia ke tlo e phatša.

⁶Mohlomongwe ke tlo dula go lena ka fetša sebaka; mohlomongwe nka dula lebaka la marega, la tlo kgona le mphelegetša mo ke tlogo ya gona.

⁷Gobane bjale ga ke rate go fo le hlola ka feta; ke holofetše go dula lebakanyana ke na le lena, ge Morena a ka dumela.

⁸Motseng wa Efeso ke tlo dula go fihla Pentekoste.

⁹Gobane mojako wo o mpulegetšego ke o mogolo wo o tsenegago; le gona baganyetši ke ba bantši.

¹⁰Ge Timotheo a etla, le bone gore a dule le lena a se na poifo, gobane modiro wa Modimo o o dira bjalo ka nna.

¹¹Go se ke gwa ba le e a mo nyatšago, Le be le mo fe tsela ka tše botse; a tle go nna, gobane ke mo lebeletše gotee le bana bešo.

¹²Ge e le Apollo ngwanešo, ke mo kgopetše gagolo ka re a ye go lena a na le banabešo, a se dumele le ganyane go ya e sa le bjale. O tlo tla mohla a bonago sebaka.

¹³Phakgamang le eme tumelong, le dire senna, le tie maatla.

¹⁴Tšohle tša lena di dirwe ka lerato.

¹⁵Banabešo, a nke ke le eletšeng. Tsebang ntlo ya Stefana ka ge e le yena thakangwaga ya ba Akaya, le ka gobane ba itirile bahlankedi ba ba bakgethwa.

¹⁶Le lena le laolweng ke ba babjalo, le bohle ba ba ba swarišago, ba ba itapišago.

¹⁷Stefana le Fortunato, le Agaiko, ke ba thabetše ge ba tla go nna; gobane mo ke bego ke hloka tša lena ba go tladitše.

¹⁸Ba khutšišitše moya wa ka le meoya ya lena. Batho ba ba bjalo a nke le ba tsebeng.

¹⁹Diphuthego tša Asia di re le dumele. Le Akwila le Perisila le phuthego ya ngwakong wa bona ba le dumediša gagolo Moreneng.

²⁰Le dumedišwa ke bana bešo bohle. Dumedišanang ka katlokgethwa.

²¹Tumedišo ya seatla sa ka, nna Paulo, še.

²²Ge go na le e sa ratego Morena Jesu Kriste, a a tšwewe. Morena o etla.

²³Kgaugelo ya Morena Jesu Kriste a e be le lena.

²⁴Lerato la ka le mo go lena bohle ka Kriste Jesu. Amene.