1 Corinthians 8

¹Tša nama ya didimo re a di tseba, gobane ka moka re na le temogo. Temogo yona e a gogomoša; se se agišago ke lerato.

²Ge motho a ka re: Taba yeo ke e lemogile, gona o sa hlaelelwa ke temogo ya gona.

³Fela motho e a ratago Modimo, ke yena a tsebilwego ke Modimo.

⁴Ge e le go ja nama ya didimo, re tseba gore medimo ga se selo mo lefaseng, le gore ga go modimo o šele; Modimo ke yena o tee fela.

⁵Le ge go ka ba le tše ba rego ke medimo legodimong le lefaseng, etšwe go na le medimo e mentši le marena a mantši,

⁶wa rena Modimo ke o tee fela, yena Tata wešo, yena tlhago ya tšohle le boyo bya rena bohle. Le Mong wa rena ke o tee, yena Jesu Kriste Motšweletšašohle le rena.

⁷Fela temogo ye e sa na le ba ba e hlokago; ba bangwe le bjale ba sa fokola; mme ka go tlwaela gore go na le medimo, ba ja nama yeo ba e sema didimo, mme ba senya letswalo la bona le le sago fokola.

⁸Gomme dijo ga di ne taba mo re itebanyago le Modimo, ge re ja, ga re tšwele pele; ge re sa je, ga re boele morago.

⁹Fela, le bone gore ge le dira ka mokgwa woo, e se be go kgopiša bafokodi.

¹⁰Gobane ge e mongwe wa bona a ka bona, wena o nago le temogo o dutše mo go lewago nama ya sedimo, a pelo ya yena mofokodi eo e ka se forwe, a tloga a ja nama ya go hlabelwa medimo?

¹¹Ke mo temogo ya gago e tlogo senya pelo ya ngwaneno e a fokolago, yo Kriste a mo hwetšego.

¹²Ge le ka senyetša bana beno ka mokgwa woo wa go gobatša dipelo tša bafokodi, e ba go senyetša Kriste.

¹³Gomme bjale, ge go ja e eba go kgopiša ngwanešo, nna nka napa ka lesa go ja nama le neng, gore ke se kgopiše ngwanešo.