Deuteronomy 2

¹Ra boela morago, ra sepela lešokeng ka tsela ya Lewatle la Mahlaka, ka mo Morena a bego a mpotša ka gona, ra fetša matšatši a mantši re rarela dithaba tša Seire.

²Morena a bolela le nna a re:

³Go lekane bjale; le raretše ka thoko la ba la feta dithaba tše; bjale lebang leboa.

⁴Laela setšhaba o re: Le yo sela mellwane ya ba geno ba Esau ba ba agilego Seire. Ba tlo le boifa; fela le itoteng ka kudu.

⁵Le se ke la hlabana le bona, ka gobane mo nageng ya bona nka se ke ka le fa le go lekanago lwao la monna; ka gobane dithaba tša Seire ke di neile Esau gore e be tša gagwe.

⁶Dijo tše le di jago le di reke ka tšhelete, le meetse le nwe le a rekile ka tšhelete.

⁷Ka gobane Morena Modimo wa gago o go šegofaditše medirong ka moka ya diatla tša gago; o go tsebile ge o sepela lešokeng lela le legolo. Nywaga e masome a mane e fedile a na nago, wa se ke wa hloka selo.

⁸Ya re ge re fetile ba gešo ba Esau ba ba agilego Seire re tšwile ka tsela ya molaleng wa Elathe le Etsionegebere, ra boa ra tšea ka tsela ya lešoka la Moaba.

⁹Morena a bolela le nna a re: O se ke wa rumola Bamoaba, o se ke wa hlabana le bona; ka gobane mo nageng ya bona nka se ke ka go arolela ye e tlogo ba ya gago, ka ge la Ari ke le neile bana ba Loto; ke la bona.

¹⁰Kgaleng lona leo le be le dutšwe ke Baemi, setšhaba se segolo se sentši, sa leemo le letelele bjalo ka Baenaki.

¹¹Le bona ba be ba thwe ke ba megwanggwang; Bamoaba ba be ba re ke Baemi.

¹²Kgaleng mo go la Seire go be go agile le Bahori; ba rakilwe ke bana ba Esau, ba ba fediša ge ba fihla, ba aga maropeng a bona ka mokgwa wo Baisiraele ba dirilego ka wona nageng ye ba e tšerego ya ba ya bona, ye Morena a ba filego yona.

¹³A re: Bjale tsogang le sele noka ya Saredi. Ke moka ra sela noka ya Saredi.

¹⁴Lebaka le re le feditšego re sepela re etšwa Kadese-Barnea go fihla nokeng ya Saredi ke nywaga e masome a mararo le metšo e seswai. Ya ba gona go fedilego bohle ba thaka yela ya banna ba ntwa, ka mo Morena a bego a ba enetše ka gona.

¹⁵Ka kgonthe seatla sa Morena se be se elwa le bona, sa ba fediša mo mešašeng, ba ba ba fela.

¹⁶Mola go fedile banna bao ba ntwa bohle, ba hwile lešokeng.

¹⁷Morena o boletše le nna a re:

¹⁸Lehono o yo sela mollwane wa Bamoaba ge o feta Ari.

¹⁹Ge o batamela mme wa lebana le Baamoni, o se ke wa ba rumola; o se ke wa hlabana le bona; ka gobane mo nageng ya Baamoni nka se ke ka go arolela ye e tlogo ba ya gago, ka ge ke e neile bana ba Loto gore e be ya bona.

²⁰Le yona yeo e thwe naga ya megwanggwang; ba be ba agile go yona kgaleng. Baamoni ba re ke Basamasumi.

²¹E be e le setšhaba se segolo se sentši sa leemo le letelele bjalo ka Baenaki. Morena o ba fedišitše ge bona ba fihla, ba ba raka ba dula maropeng a bona.

²²Ke tšona a di diretšego bana ba Esau ba ba agilego Seire mola a fediša Bahori, ge ba fihla ba ba raka ba dula maropeng a bona le lehono.

²³Le Baafi ba ba bego ba agile Hatserima ba goma ka Gasa, ba fedišitšwe ke Bakafutori ba ba bego ba etšwa Kafutori, ba tla ba dula maropeng a bona.

²⁴Ra thwe tsogang le sepele le sele noka ya Arinoni. Le tsebe gore Sihoni kgoši ya Baamori ya kua Hesiboni ke mo gafetše diatleng tša lena le naga ya gagwe; le e tšeeng e sa le bjale, le lwe ntwa nae.

²⁵Go tloga bjale ke beile tšhogo le poifo godimo ga ditšhaba tše di lego ka tlase ga legodimo ka moka ge di lebana nago; di tlo tlalelwa tša thothomela ge di ekwa tumo ya go re o a tla.

²⁶Re le lešokeng la Kedemothe ka roma batseta ba ya go Sihoni kgoši ya Hesiboni, ba bolela a khutšo ba re:

²⁷Lesa re phatše naga ya gago. Re tlo sepela ka tsela fela; re ka se fapogele thoko ya le letona goba ya la ntsogošo.

²⁸Dijo re tlo ja tše re go rekelago tšona ka tšhelete; le meetse re tlo nwa o re file re a rekile. A nke re fete fela ka dinao.

²⁹A nke o dire se se dirilwego ke bana ba Esau ba ba agilego Seire, le ba Moaba ba ba agilego Ari, re ye re sele noka ya Jorodane, re fihle nageng ye Morena Modimo wa rena a re filego yona.

³⁰Sihoni kgoši ya Hesiboni a gana ge re feta ka gona; ka gobane Morena Modimo wa gago o be a thatafaditše moya wa gagwe, a hlamaladitše pelo ya gagwe, gore a mo gafele seatleng sa gago. Ke tšona tša mehla yeno.

³¹Morena o mpoditše a re: Tseba gobane ke šetše ke go neile Sihoni le naga ya gagwe; e tšee e be ya gago e sa le bjale.

³²Sihoni a tšwa a re šwahlela kua Jahatsa a na le madira a gagwe ka moka.

³³Morena Modimo wa rena a mo gafela rena, ra mmolaya, le bana ba gagwe, le madira a gagwe ka moka.

³⁴Mehla yeo re hutše metse ya gagwe ka moka, ra e dira segafiwamoka, banna le basadi le bana, ra se ke ra lesa motho a phonyokga.

³⁵Ra ithopela dikgomo fela le dithebola tša metse ye re e hutšego.

³⁶Go tloga motseng wa Aroere o lego nokeng ya Arinoni, le metse e lego hleng ga noka, go goma ka Gileada ga se gwa šala motse o re paletšego, Tšohle Morena Modimo wa rena o di neile rena.

³⁷Gwa šala naga ya Baamoni; yona ga wa ka wa e fihlela; le naga e šikago le noka ya Jakobo, le metse e lego dithabeng, le gohle mo Morena Modimo wa rena a re ileditšego.