Deuteronomy 7

¹E tlo re ge Morena Modimo wa gago a go fihliša nageng ye o yago go yona go e tšea, gomme ge a raka ditšhaba tše ntši ge o fihla, e lego Bahethe, le Bagirigasi, le Baamoro, le Bakanana, le Bapheresi, le Bahefi, le Bajebusi, ditšhaba tše di šupago tše kgolo tše di go fetago ka maatla,

²ge Morena Modimo wa gago a di gafa ge o fihla, o tlo di fenya wa di dira digafiwamoka. O se ke wa ba wa gwerana le tšona; o se ke wa ba gaugela.

³Le se ke la tšeana nabo; le se ke la ba nea barwedi ba lena ya ba basadi ba barwa ba bona; gomme le se ke la tšeiša barwa ba bona barwedi ba lena.

⁴Ka gobane ba tlo aroša barwa ba lena ba ntlhanogela, ba direla medimo e šele; gomme bogale bja Modimo bo tlo le tukela, a le fediša ka pela.

⁵Se le swanetšego go ba dira sese: Phušolang dialetare tša bona, le thumaganye dikokwane tša bona, le reme meremedimo ya bona; diswantšho tša medimo ya bona le di fiše ka mollo.

⁶Ka gobane wena o setšhaba se se kgethetšwego Morena Modimo wa gago. Morena Modimo wa gago o go kgethile, gore o be setšhabaseruiwa sa gagwe, se a se hlaotšego ditšhabeng tše di lego lefaseng.

⁷Ge Morena a le ratile, a le hlaotše ga se ka gobane le feta ditšhaba tše dingwe ka bontši, gobane le be le le setšhaba se senyenyane go ditšhaba ka moka;

⁸Morena o dirilwe ke lerato; o be a rata go phetha keno ye a e enetšego botataweno, mme a le khuduša ka seatla se maatla, a le namolela kua ngwakong wa bohlanka letsogong la Farao kgoši ya Egipita.

⁹Tseba gee gobane Morena Modimo wa gago ke yena Modimo, Modimo e a botegago, e a dirago kgwerano ya tia; mme ba ba mo ratago mme ba hlokomela ditaelo tša gagwe, o ba dira ka botho go iša molokong wa sekete.

¹⁰Ba ba mo hloyago o ba lefetša a lebane nabo; ga a diege go lefetša le go lebana le yoo a mo hloilego.

¹¹Hlokomela gee, o dire ka melao le ka mekgwa ye nna ke go laodišetšago yona lehono.

¹²Se le tlogo se bona ge le latela mekgwa ye, la e hlokomela, la dira ka yona, sese: Morena Modimo wa gago o tlo fela a tiiša kgwerano, a go dira ka botho bjo a bo enetšego botataweno.

¹³O tlo go rata, o tlo go šegofatša, o tlo go atišetša thari le kenyo tša naga ya gago, le mabele a gago, le mananose a morara wa gago, le makhura a mehlware ya gago, le mabotlana a dikgomo tša gago, le dikwanyana le diputšana, o le mo nageng ye a e enetšego botataweno a re ke tlo le fa yona.

¹⁴O tlo ba mošegofatšwa mo go ditšhaba ka moka; mo go wena go ka se ke gwa ba le monna goba mosadi e a se nago ngwana wa gagwe; le go diruiwa tša gago go tlo ba bjalo.

¹⁵Morena o tlo go efela malwetši ohle; gomme dinkhu, tšela ka moka tše šoro tša Egipita tše o di tsebago, a ka se ke a di tliša go wena; o tlo di iša go manaba a gago.

¹⁶Ditšhaba ka moka tše Morena Modimo wa gago a go neago tšona o di fediše; mahlo a gago a se ke a di gaugela, gore o se tlo direla medimo ya bona. Ka gobane ke wona moreo wo o go theilego.

¹⁷Ge mo pelong ya gago o ka bolela wa re: Ditšhaba tše di mpheta ka boati, nka kgona bjang go di fenya?

¹⁸O se ke wa ba boifa; o fele o gopola tše Morena Modimo wa gago a di dirilego Farao le Baegipita ka moka.

¹⁹Gopola meleko e megolo ye o e bonego ka mahlo a gago, le matete, le mehlolo, le seatla se maatla, le letsogo le le emišitšwego. Ke tšona tše Morena Modimo wa gago a tlo go di dira ditšhaba ka moka tše o di boifago.

²⁰Morena Modimo wa gago o tlo ba a roma le mebu ya ba tsena, go be go fedišwe le mašaledi a a utamago ge o fihla.

²¹O se ke wa ba tšhoga, ka gobane Morena Modimo wa gago o na le wena, yena Modimo e mogolo e a tšhabegago.

²²Ditšhaba tšeo Morena Modimo wa gago o tlo di raka ka lenoko ge o fihla; o se ke wa di fediša ka pela; o ka tlo atelwa ke dibata tša naga.

²³Morena Modimo wa gago o tlo di lahletša ge o fihla, a di tlaletša ka tlalelo e kgolo, di be di fedišwe.

²⁴Dikgoši tša bona o tlo di gafela matsogong a gago; maina a tšona o tlo a fediša ka tlase ga legodimo; go ka se ke gwa ba le e a tlogo ema ge o fihla, wa ba wa ba fediša.

²⁵Diswantšho tša medimo ya bona o di fiše ka mollo. O se ke wa kganyoga disilifera le digauta tše di lego mo go tšona, gore o se tanyege ka tšona; ka gobane dilo tšeo Morena Modimo wa gago o a di hlaswa.

²⁶Makgapa ao o se ke wa a tliša nywakong ya gago, gore o sa tlo dirwa segafiwamoka bjalo ka tšona. O di hlaswe, o di nyaletše ruri, ka gobane ke digafiwamoka.