1 Timothy 6

¹Bohle ba e lego ba bohlanka bja go tlengwa, ba tsebe ge beng ba bona ba loketšwe ke kgodišo ka moka, gore ina la Modimo, le thuto, di se ke tša gobošwa.

²Ba ba nago le beng ba e lego badumedi, ba se ke ba ba nyatša, gobane ke bana babo; a ba tiiše go ba hlankela ka ge e le badumedi le baratiwa ba go setšwa ka mokgwa woo. -- Ruta batho ka go realo, o ba eletše ka mokgwa woo.

³Ge motho a ka ruta tše šele a sa ye ka mantšu a Mong wa rena Jesu Kriste, ka mantšu a a se nago bolwetši, le ka thuto ye e amanago le borapedi,

⁴o foufetše ka boikgogomošo, mola a sa tsebe selo; bolwetši bja gagwe ke go bata dikgang le diphetolano tša go tsoša mona le tšhitano le maroga le kgonono tše mpe,

⁵le diphapang tša lefela tša batho ba ba senyegilego kgopolo, ba ba timetšwego ke therešo, ba ba rego borapedi a e be bja go inyakela leruo ka bjona. Ba ba bjalo kgaogana nabo.

⁶Gomme borapedi ke leruo le legolo ge bo na le go kgolwa ke tše o nago le tšona.

⁷Gobane mola re etla lefaseng, ga ra ka ra tla le selo; le go tloga re ka se kgone go tloga le selo.

⁸Ke gona, ge re na le dijo le diaparo, a re kgolweng ke tšona.

⁹Gobane ba ba ratago go huma ba wela melekong le mereong; ba ya le dikganyogo tše ntši tša bošilo tše di gobošago motho tša mo senya, tša mo tekesetša tshenyegong le tahlegong.

¹⁰Gobane megabaru ke wona modu wa bobe ka moka; gomme ba bangwe ba go kekela go tšona ba arogile tumelo ba ikobela mehlako e mentši.

¹¹Gomme wena motho wa Modimo, tšhaba dilo tšeo; o phegelele toko, le borapedi, le tumelo le lerato, le kgotlelelo, le bonolo.

¹²Hlabana tlhabano e botse ya tumelo, o thope bophelo bjo bo sa felego, bjo o bileditšwego bjona, wa ipolela o botse pele ga dihlatse tše ntši.

¹³Ke go laya re le pele ga Modimo Mophedišatšohle, le pele ga Kriste Jesu e a ipoletšego pele ga Pilato ka bohlatse bjo botse.

¹⁴O tiiše go ya ka taelo ye e se nago senyalo le bosodi, go be go bonagale yena mong wa rena Jesu Kriste.

¹⁵Ke yona ponagalo e tlogo bonatša yena Ramašoto, Makgoneannoši, Kgoši ya dikgoši, Morena wa marena.

¹⁶Mong a bophelo boilalehu ke yena a nnoši; o agile seetšeng se se sa fihlelwego, yo go sego motho wa go mmona le go ka mmona, mong a theto le bogoši bja neng le neng. Amene.

¹⁷Bahumi ba mehleng ya bjale ba laele o re ba se ikgodiše, ba se holofele lehumo la go tla le go tloga; ba holofele Modimo e a phelago; e a re fago tšohle gore di re natefele.

¹⁸Ba laele o re ba hume ka mediro e bolo, ba rate go nea, ba abele ba bangwe.

¹⁹E be gona go ithuela, go thea motheo wa mehla e tlo go tla gore ba fihlele bjo e lego bophelo bja ruri.

²⁰Timotheo! Diša tše di digetšwego wena. Ila merero ya lefela ye e sa holego selo, le diphetolano tša ba ba aketšago ba re ke yona tsebo.

²¹Ke tsebo ye ba bangwe ba ipolelago ka yona, mme ya ba go aroga tumelo. A kgaugelo e be le wena! Amene.