2 Timothy 1

¹Paulo Moapostola wa Jesu Kriste ka thato ya Modimo, yo ke beetšwego go bolela bophelo bjo bo re holofedišitšwego bja tla bja ba gona ka Kriste Jesu,

²Ke ngwalela Timotheo ngwanaka moratwa. Go gaugelwa le go šokelwa le go khutšišwa a di go tlele di etšwa go Modimo Tata wešo le go Jesu Kriste Mong wa rena.

³Ke leboga Modimo, yo boka borrawešo ke mo hlankelago letswalo la ka le kgodilwe, ke sa kgaotše go go gopola dithapelong tšaka bošego le mosegare.

⁴Ke hlologetšwe go go bona ge ke elelwa megokgo ya gago, mme ke re ke tlale lethabo,

⁵ke elelwe tumelo ya gago e se nago boikaketši, ye e bego e agile pelong ya Loisa makgolwago, le pelong ya Oinika mmago, ye ke kgodilwego gore le mo go wena e agile.

⁶Ke ka baka leo ke felago ke go eletša ke re: Goteletša neo yeo Modimo a go seditšego ka yona ye e lego go wena ka go bewa diatla ke nna.

⁷Gobane Modimo ga a ka a re nea Moya wa boi; o re file Moya wa maatla, le wa lerato, le wa tlhaologanyo.

⁸Ke gona, o se be le maseme ge o hlatsela Mong wa rena, ge o hlatsela le nna mogolegwa wa gagwe; mo Ebangedi e hloiwago o eme le yona ka maatla a Modimo.

⁹Ke yena a re phološitšego a re bitša ka mmiletšo o mokgethwa, e sego ka baka la mediro ya rena; o re biditše ka go ithatela le ka kgaugelo ye a re seditšego ka yona ka Jesu Kriste mola go sešo gwa thoma mehla ya mabaka.

¹⁰Ke yona kgaugelo ya go bonagatšwa mehleng yeno ka go bonagala ga Mophološi wa rena Jesu Kriste, e a fedišitšego lehu, a tšweletša bophelo le go se hwe ka seetša sa Ebangedi.

¹¹Gomme nna ke beetšwe yona Ebangedi gore ke be segoeledi sa yona le motseta wa yona le moruti wa bantle.

¹²Molato ke wona woo ge ke hlokofatšwa; fela ga ke na maseme. Yo ke mo dumetšego ke a mo tseba. Ke botile maatla a gagwe a go mpolokela se ke beetšwego sona, gwa tlo ba gwa fihla letšatši leo.

¹³Mantšu ao a se nago senyalo, a o a kwelego go nna, o tšee ka mohlala wa ona, ka tumelo le ka lerato, le re le hwetšago go Jesu Kriste.

¹⁴Se o beetšwego sona, o ipolokele sona ka Moyamokgethwa wo o agilego mo go rena.

¹⁵O a tseba, ba ba lego Asia ba ntlhanogetše bohle; ke boFigelo le Heremogene.

¹⁶Ba lapeng la Onesiforo Morena a a ba setše ka kgaugelo, gobane ba ntapološitše gantši; mme yena ga a ka a itšimeletša go mpona ke tlemilwe,

¹⁷a re go tla mono Roma, a itapiša a nnyaka, a ba a nkhwetša.

¹⁸A Morena a mo setše ka go mo gaugela ka letšatši leo. Ke wena o tsebago ka mo a swerego modiro motseng wa Efeso.