Judges 16

¹Simisone o kile a ya Gasa; gona moo a bona mosadi wa seotswa, a tsena go yena.

²Bagasa ge ba botšwa gore Simisone o tlile, ba mo teta, ba mo lalela kgorong ya motse bošego ka moka; ba lala ba itše “kgwathi” ba re: Bosasa ge go esa re tlo mmolaya.

³Simisone a robala go fihla mašegogare: mašegogare a tsoga, a swara mamati a mabedi a kgoro a a kgola gotee le dijakwana le mekgoko, a di šikara a di rotošetša ntlheng ya thaba e ukametšego Heburone.

⁴Gwa tla lebaka le lengwe, Simisone a rata mosadi e mongwe wa moeding wa Soreka, leina la gagwe e be e le Delila.

⁵Dikgošana tša Bafilisita tša tla go yena tša re: Mo otelele a be a go botše mo go tšwago maatla a gagwe a magolo a le gore re ka mo kgona kang, gore re mo tleme, re mo kokobetše. Ke mo e mongwe le e mongwe wa rena a tlogo go nea disilifera tše sekete se se nago le lekgolo.

⁶Delila a bolela le Simisone a re: A nke o mpotše mo go dutšego maatla a magolo a gago, le gore o ka tlengwa kang wa fenywa.

⁷Simisone a re: Ge motho a ka ntlema ka tšhika tše di šupago tše mpsha di sešogo tša oma, gona nka fokola kaaka batho ba bangwe.

⁸Dikgošana tša Bafilisita tša tliša ditšhika tše di šupago tše mpsha tše di sešogo tša oma, Delila a mo tlema ka tšona,

⁹Ka mo phapošing ba mo laletše. Delila a mo rera a re: Simisone, Bafilisita ba go wela godimo! Gomme yena a kgaola ditšhika tšeo bjalo ka ge motho a kgaola hlale tša leokodi ge le tlabotšwe ke mollo; mme ba se tsebe mo go dutšego maatla a gagwe.

¹⁰Delila a bolela le Simisone a re: Hleng o nkgapišitše leswiswi; o nkakeditše. Bjale a nke o mpotše se se kago go tlema.

¹¹A fetola a re: Ge nka tlengwa ka dithapo tše mpsha tše di sešogo tša dira modiro, gona nka fokola kaaka batho ba bangwe.

¹²Ke mo Delila a tšerego dithapo tše mpsha, a mo tlema ka tšona, a napa a re: Simisone, Bafilisita ba go wela godimo! Ka mo phapošing ba be ba mo laletše; gomme yena a di kgaoganya ka matsogo a gagwe bjalo ka hlale tše tshesanyane.

¹³Delila a bolela le Simisone a re: Go fihla bjale o nkgapišitše leswiswi wa nkaketša. Bjale mpotše se se kago go tlema. Yena a re: Ge o ka loga mephotho e šupago ya hlogo ya ka ya ba mologo o tee le thapo.

¹⁴Delila a loga a di kokotela ka lemapo, a re: Simisone, Bafilisita ba go wela godimo! Simisone a phafoga borokong, a tomola lemapo ka thapo le ka mologo.

¹⁵Delila a re: O reng o fela o re o a nthata, etšwe pelo ya gago e sa nthe selo? Ke gararo bjalo o nkgapiša leswiswi, o nkutela mo maatla a magolo a a gago a dutšego gona.

¹⁶Gomme, ka gobane a fela a mo phegelela ka dipolelo, a mo hlokiša khutšo, a ba a mo lapiša wa go se sa rata go phela.

¹⁷A ba a mmotša tše di lego pelong ya gagwe, a re: Mo hlogong ya ka ga go ešo gwa batamela legare; ka gobane ke mokgethwa wa Modimo go tloga mola ke sa tšo belegwa. Ge nka kotwa hlogo, maatla a ka a tla tloga, ka fokola kaaka batho ba bangwe.

¹⁸Delila a bona gore bjale o mmoditše thopa ya gagwe ka moka. A roma lentšu a bitša dikgošana tša Bafilisita a re: Bjale tlang; o mpoditše thopa ya gagwe ka moka. Dikgošana tša Bafilisita tša tla di swere disilifera tšela ka diatla.

¹⁹Delila a mo robatša difarong tša gagwe, a bitša monna e mongwe a mo ripa mephotho e šupago ya hlogo ya gagwe; ya ba gona a mo fokodišitšego; ke mo maatla a gagwe a nago a mo tlogela.

²⁰Bjale ge mosadi a re: Simisone, Bafilisita ba go wela godimo! A phafoga a re le bjale ke tlo tšwa ka phonyokga, a sa tsebe ge Morena a mo tlogetše.

²¹Bafilisita ba mo swara, ba mo gonya mahlo, ba mo iša Gasa, ba mo tlema ka ditšhipi tše pedi tša mefiri; a hlwa a šila mabele kgolegong.

²²Fela, meriri ya hlogo ya gagwe ya mela, ya ba ya etša ya mola e sešo ya kotwa.

²³Gomme dikgošana tša Bafilisita tša kgobokanela go tliša sedimo se segolo sa Dagoni modimo wa bona, e le gore ba thabe ka gobane ba be ba re: Simisone lenaba la rena, modimo wa rena o mo gafetše diatleng tša rena.

²⁴Setšhaba ka moka ge se mmona, sa reta modimo wa bona, ka gobane se be se re: Ke modimo wa rena o gafetšego lenaba le la rena mo diatleng tša rena, lona le la go senya mašemo a rena, la go bolaya batho ba bantši ba gešo.

²⁵Ya re ge ba thabile ka mokgwa wo, ba re: A go bitšwe Simisone, a re binele koša. Ba mmitša, ba mo ntšha kgolegong, mme a ba binela koša ba mmeile gare ga dikokwane.

²⁶Simisone a botša lesogana le le bego le mo hlahla, a re: Ntese ke phopholetše dikokwane tše di thekgilego ngwako, ke tle ke itshame ka tšona.

²⁷Gomme mo ngwakong woo go be go tletše banna le basadi ba bantši; le dikgošana ka moka tša Bafilisita di be di le gona; le ka ngwakong wa godimo go be go dutše banna le basadi, e nyakile go ba dikete tše tharo tša batho, ba lebeletše ge Simisone a bina koša.

²⁸Simisone yena a rapela Morena a re: Mong wa ka Morena, a nke o nkgopole; mphe maatla bjale gatee fela. Modimo, lesa ke itefeletše go Bafilisita gatee fela ka baka la mahlo a ka a mabedi.

²⁹A swara dikokwane tše pedi tše di mo gare, tše ngwako o bego o eme ka tšona, a di notela, e nngwe ka le letona, e nngwe ka la ntšogošo,

³⁰A bolela a re: A nke ke hwe le Bafilisita! A napa a inama a kakatlela; mme ngwako ka moka wa wela dikgošana le batho ka moka ba bego ba le go wona; gomme batho ba a ba bolailego go hweng ga gagwe, ba bile ba fetiša bao a ba bolailego mehla yela a sa phela.

³¹Mme gwa tla bana babo le ba leloko la gabo, ba rwala setopo sa gagwe; ba boa naso, ba mmoloka lebitleng la Manoa tatagwe, kua gare ga Tsorea le Esithaolo. O be a feditše nywaga e masome a mabedi a ahlolela Isiraele.