1 Samuel 21

¹Dafida a tla motseng wa Nobe go Ahimeleke moperisita. Ahimeleke a dumedišana le Dafida a tšhogile, a re: O hloma bjang o etla o nnoši, go se motho e a tlago nago?

²Dafida a botša Ahimeleke moperisita a re: Kgoši o nthomile ka ditaba, a re: Taba ye ke go romago ka baka la yona, ye ke go laelago yona, ke thopa. Masogana a ka ona ke a rometše motseng o mongwe.

³Bjale ge o ka ba le dijo, hlalla dinkgwe tše tlhano, goba tše dingwe tše o ka bago natšo.

⁴Moperisita a fetola a re: Mo go nna ga go na dinkgwa tša ka mehla, ge e se tše kgethwa, ge e ba ka masogana a itotile basading.

⁵Dafida a fetola a re: Ruri re ileditšwe basadi bjalo ka maabane le maloba ge re tšwa, le ge e le leeto fela; lehono gona ga go na e a nago le seila.

⁶Ke mo moperisita a mo neilego dinkgwa tše kgethwa, ka gobane go be go se tše dingwe ge e se tšeo tša dinkgwaponwa, tše di bego di beilwe pele ga Morena, tša tlošwa ge go bewa tše dingwe.

⁷Gomme ka lona tšatši leo, gona fao pele ga Morena go be go na le e mongwe wa bahlanka ba Saulo, a tswaletetšwe moo; leina la gagwe e be e le Doege, Moedomo, mogolo wa badiši ba Saulo.

⁸Dafida a botšiša Ahimeleke a re: A ga go ne lerumo, le ge e le tšhoša mo go wena? Gobane ga ka tloga le lerumo la ka le ge e le dibetša tša ka, ka ge taba ya kgoši e akgofišwa.

⁹Moperisita a re: Se se lego gona ke tšhoša yela ya Goliata Mofilisita yola o mmolailego kua moeding wa merula; še, e phuthetšwe ka lešela gomme e širilwe ke kobjana ya moperisita. Ge o rata o ka tšea yona; ke yona e lego gona. Dafida a re: Ga go na e nngwe e swanago le yeo; mphe yona.

¹⁰Bjalo Dafida a tsoga a tšhaba Saulo ka lona tšatši leo, a tla go Akise kgoši ya Gathe.

¹¹Bahlanka ba Akise ba mmolela ba re: Naa ga se Dafida kgoši ya naga? A ga se yena yola ba kilego ba mo opelela dikoša ba re: Saulo o hlaba ba gagwe ba sekete; Dafida ba gagwe ke kete tše lesome?

¹²Gomme Dafida mantšu ao a na a mo tsena pelong, a boifa Akise kgoši ya Gathe gagolo.

¹³A re ge ba mo lebeletše, a hlafiša sefahlogo sa gagwe, a itira segafa, a ngapaka mamati a mojako, a lesa mare a gagwe a elela maledung.

¹⁴Akise a omanya bahlanka ba gagwe a re: Monna e, a ga le mmone ge e le segafa? Le mo tliša go nna ka baka lang?

¹⁵A le re ke hloka magafa, ge le mo tliša fa gore a gafe mo go nna? A fa o mobjalo a ka tsena ngwakong wa ka?