Tswana 1992 Bible - 31 verses
1Foo Josefe a tsena a bolelela Faro a re: “Rre le bomorwa rre ba tsile ba tswa lefatsheng la Kanana, ba na le matsomane a bone, le matlhape a bone, le tsotlhe tse ba nang natso. Mme ba mo lefatsheng la Gošene.”
2Mo go bomorwa rraagwe a tsaya banna ba le batlhano a ba isa fa pele ga Faro.
3Faro a raya bomorwa rra Josefe a re: “Tiro ya lona ke eng?” Ba raya Faro ba re: “Batlhanka ba gago re badisa, rona le borraetsho.”
4Ba raya Faro ba re: “Re tsile go jaka fela mo lefatsheng; gonne ga go na bohulo jwa matsomane a batlhanka ba gago; gonne leuba le botlhoko kwa lefatsheng la Kanana. Ke gone re reng: Mma batlhanka ba gago ba age mo lefatsheng la Gošene.”
5Faro a bua le Josefe a re: “Rraago le bomorwa rraago ba tsile mo go wena.
6Lefatshe la Egepeto le fa pele ga gago; baya rraago le bomorwa rraago kwa lefatshe le gaisang ka molemo gone. A ba age mo lefatsheng la Gošene; mme fa o itse banna bangwe ba ba tlhaga mo go bone o ba beye balaodi ba dikgomo tsetsho.”
7Josefe a isa Jakobe rraagwe mo teng, a mmaya fa pele ga Faro; mme Jakobe a segofatsa Faro.
8Faro a raya Jakobe a re: “Malatsi a dinyaga tsa botshelo jwa gago a kae?”
9Jakobe a raya Faro a re: “Malatsi a dinyaga tsa loeto lwa me ke dinyaga di le 130, a ntse a le mannye fela, a bile a bosula, mme ga a a fitlha kwa malatsing a dinyaga tsa botshelo jwa borre mo malatsing a diketo tsa bone.”
10Jakobe a segofatsa Faro; mme a tswa fa pele ga Faro.
11Josefe a baya rraagwe le bomorwa rraagwe, a ba naya boswa mo lefatsheng la Egepeto kwa lefatshe le gaisang ka molemo gone, mo lefatsheng la Ramesese, jaaka Faro a laotse.
12Josefe a otla rraagwe le bomorwa rraagwe le botlhe ba ntlo ya ga rraagwe ka dijo, ka fa malwapeng a bone.
13Go ne go se na dijo mo lefatsheng lotlhe, gonne leuba le ne le le botlhoko thata, mafatshe a Egepeto le a Kanana a ba a tla a idibala ka ntlha ya lone leuba.
14Josefe a kgobokanya madi otlhe a a bonwang mo lefatsheng la Egepeto le mo lefatsheng la Kanana ka mabele a ba neng ba a reka. Josefe a isa madi ao mo ntlong ya ga Faro.
15E rile madi a setse a fedile mo lefatsheng la Egepeto le mo lefatsheng la Kanana, Baegepeto botlhe fela ba ya kwa go Josefe ba re: “Re fe dijo. Ana re ka bo re swelang fa pele ga gago?” Gonne madi a tlhaetse.
16Josefe a re: “Ntshang dikgomo; ke tlaa lo fa ka dikgomo tsa lona fa madi a tlhaetse.”
17Ba isa dikgomo tsa bone kwa go Josefe; Josefe a ba naya dijo mo boemong jwa dipitse, le jwa matsomane, le jwa matlhape, le jwa diesela; a ba jesa ka ngwaga oo, a amogela dikgomo tsotlhe tsa bone mo boemong jwa dijo.
18E rile ngwaga oo o sena go feta ba ya kwa go ene ka ngwaga wa bobedi ba mo raya ba re: “Ga re nka re lobela morena wa rona jaaka madi a rona a ile otlhe; le jaaka matlhape a dikgomo e le a morena wa rona. Ga go a sala sepe mo matlhong a morena wa rona fa e se mebele ya rona le matlhagare a rona fela.
19Ana re ka bo re swelang fa pele ga matlho a gago, rona le lefatshe la rona? Re reke, rona le lefatshe la rona ka dijo, mme rona, le lefatshe la rona re tlaa nna batlhanka ba ga Faro. Re neye peo gore re tle re tshele, re se ka ra a swa, le gore lefatshe le se ka la swafala fela.”
20Josefe a rekela Faro lefatshe lotlhe la Egepeto; gonne Baegepeto mongwe le mongwe a rekisa tshimo ya gagwe, ka leuba le ne le le botlhoko mo go bone; mme lefatshe la nna la ga Faro.
21Ka ga batho, a ba hudusetsa mo metseng, go simolola ka sekhutlo sengwe sa molelwane wa Egepeto go ya kwa sekhutlong se sengwe sa gone.
22Fa e se lefatshe la baperesiti le le losi, ga a ka a le reka; gonne baperesiti ba ne ba tle ba amogele kabelo mo go Faro, ba je kabelo e Faro o e ba nayang. Ke gone ka moo ba neng ba se ka ba rekisa lefatshe la bone.
23Foo Josefe a raya batho a re: “Bonang, ke lo rekile gompieno le lefatshe la lona, ke lo reketse Faro. Bonang peo ke e, ke ya lona, lo tlaa lema lefatshe.
24Go tlaa dirala gore e tle e re ka nako ya thobo, sa botlhano lo se neye Faro, tse nne e nne tsa lona, go nna peo ya leota le go nna dijo tsa lona, le tsa matlo a lona, go nna dijo tsa banyana ba lona.”
25Mme ba re: “O re tshedisitse; a re ke re bone tsalano mo matlhong a morena wa rona, mme re tlaa nna batlhanka ba ga Faro.”
26Josefe a tlhoma molao mo lefatsheng la Egepeto, o eme le gompieno, gore Faro a tseye sa botlhano; fa e se lefatshe la Baperesiti le le losi ga le a ka la nna la ga Faro.
27Iseraele a aga mo lefatsheng la Egepeto, mo lefatsheng la Gošene; mme ba bapala maruo gone, ba ata, ba ntsifala thata thata.
28Jakobe a aga mo lefatsheng la Egepeto dinyaga di le 17; jalo malatsi a ga Jakobe, a dinyaga tsa botshelo jwa gagwe e ne e le dinyaga di le 147.
29Lobaka lwa atamela lo Iseraele o tlaa swang ka lone. Mme a bitsa Josefe morwawe, a mo raya a re: “A e re fa jaana ke bonye tsalano mo matlhong a gago, ke a go rapela, baya seatla sa gago fa tlase ga serope sa me, o ntirele ka pelonomi le ka boammaaruri; ke a go rapela, o se ka wa mphitlha mono Egepeto.
30Motlhang ke robalang le borraetsho, o mpelege ke tswe mo Egepeto, o ye go mphitlha mo felong ga phitlhelo ya bone.” Mme a re: “Ke tlaa dira jaaka o buile.”
31A re: “Inkanele.” Mme a mo ikanela. Mme Iseraele a ikobela mo tlhogong ya bolao.