2 Samuel 12

¹Jehofa a roma Nathane kwa go Dafite. A tla mo go ene, a mo raya a re: “Go kile ga ne go le banna ba le babedi mo motseng o le mongwe fela; mongwe a humile, mme yo mongwe a humanegile.

²Monna wa mohumi a na le matsomane a le mantsi, le matlhape a le mantsi;

³mme monna wa sehumanegi a se na sepe fa e se kwanyana e namagatsanyana e le nngwe fela, e o ne a e rekile a e otlile; mme ya gola e nna nae le bana ba gagwe; e ne e ja dijo tsa gagwe, e nwa ga senwelo sa gagwe, e robala mo sehubeng sa gagwe, e nna mo go ene jaaka e ka bo e le ngwana wa mosetsana fela.

⁴Monna wa mohumi a gorogelwa ke motsamai mongwe, mme a rekegela letsomane la gagwe le matlhape a gagwe, go tsaya mo go one go tlhabisa motho wa motsamai yo o mo gorogetseng, mme a gapa kwanyana ya monna wa sehumanegi, a e tlhabisa motho yo o mo gorogetseng.”

⁵Bogale jwa ga Dafite jwa tukela monna yoo; a raya Nathane a re: “Jaaka Jehofa a tshedile, monna yo o dirileng seo se o tshwanetse go swa;

⁶o tlaa lefa kwanyana ka go le gone, ka a dirile selo se, le ka gonne o ne a se ka a tlhomoga pelo.”

⁷Nathane a raya Dafite a re: “Ke wena monna yoo. Jehofa Modimo wa Iseraele o bua jaana, a re: ‘Ke go tloditse gore o tle o nne kgosi ya Iseraele, ka go golola mo seatleng sa ga Saule;

⁸ka go naya ntlo ya mong wa gago, le basadi ba mong wa gago mo sehubeng sa gago, ka go naya ba ntlo ya Iseraele le ya Bajuta; mme fa moo go ka bo go ne go le gobotlana bobe, nka bo ke go okeleditse ka dilo dingwe le dingwe.

⁹Ana o nyaditse lefoko la ga Jehofa ka ntlha yang, wa dira se se bosula mo matlhong a gagwe? O remile Uria wa Mohite ka tšhaka, o bile o tshotse mosadi wa gagwe gore a nne mosadi wa gago, o mmolaisitse tšhaka ya bana ba Amone.

¹⁰Ke gone, tšhaka ga e ketla e tlhola e tlogela ntlo ya gago; ka o nnyaditse, mme wa tsaya mosadi wa ga Uria wa Mohite gore a nne mosadi wa gago.’

¹¹Jehofa o bua jaana a re: ‘Bona, ke tlaa go tsosetsa bosula mo go ba e leng ba ntlo ya gago, ke tlaa tsaya basadi ba gago, fa pele ga matlho a gago ke ba naya wa gaeno, mme o tlaa lala le basadi ba gago mo ponong ya letsatsi le.

¹²Gonne wena o se dirile mo sephiring; nna ke tlaa dira selo se fa pele ga Baiseraele botlhe, le fa pele ga letsatsi.’ ”

¹³Dafite a raya Nathane a re: “Ke leofetse Jehofa.” Nathane a raya Dafite a re: “Jehofa le ene o tlositse boleo jwa gago; ga o ketla oo swa.

¹⁴Le fa go ntse jalo, e re ka o neile baba ba ga Jehofa thata e kgolo ya go tlhapatsa ka tiro e, le ngwana yo o mmonyeng o tlaa swa ruri.”

¹⁵Nathane a tloga a ya kwa ga gagwe. Jehofa a itaya ngwana yo mosadi wa ga Uria o mmonyeng le Dafite, mme a nna botlhoko thata.

¹⁶Ya re ka ntlha ya moo Dafite a rapelela ngwana mo Modimong; mme a ikitsa go ja, a tsena a lala a totometse fa fatshe bosigo jotlhe.

¹⁷Bagolwane ba ntlo ya gagwe ba nanoga, ba ema fa go ene, go tla ba mo kakatlolola fa fatshe; mme a gana, le gone a se ka a ja dijo nabo.

¹⁸Ga dirala ya re ka letsatsi la bosupa, ngwana a swa. Mme batlhanka ba ga Dafite ba boifa go mmolelela fa ngwana a sule; ka ba re: “Bonang, e rile ngwana a sa ntse a tshedile, ra bua nae, mme a se ka a reetsa lentswe la rona; o tlaa itshwenya bogolo jang fa re mmolelela go re ngwana o sule!”

¹⁹Mme e rile Dafite a bona batlhanka ba gagwe ba sebetsanya, a lemoga fa ngwana a sule; a raya batlhanka ba gagwe a re: “A ngwana o sule?” Ba re: “O sule.”

²⁰Foo Dafite a tloga fa fatshe, a tlhapa, a tlola, a apara diaparo di sele; a tla mo ntlong ya ga Jehofa, a obama; foo a tla mo ntlong e e leng ya gagwe; ya re a batla jalo, ba baya dijo fa pele ga gagwe, mme a ja.

²¹Foo batlhanka ba gagwe ba mo raya ba re: “Ana ke eng selo se o se dirileng? E rile ngwana a sa ntse a tshedile, wa ikitsa go ja, wa mo lelela; mme ya re ngwana a sena go swa o ema o ja dijo.”

²²A re: “E rile ngwana a sa ntse a tshedile ka ikitsa go ja, ka lela; gonne ke itheile ka re: ‘Go itse mang boo Jehofa ga a kake a nna boutlwelo botlhoko mo go nna gore ngwana a tshele?’

²³Jaana ka a sule nka bo ke ikiletsang go ja? A ke ka ba ka mmusa? Ke tlaa ya kwa go ene, ene ga a ketla a boela kwano go nna.”

²⁴Dafite a gomotsa Bathešeba mosadi wa gagwe, a tsena kwa go ene a lala nae; mme a bona ngwana wa mosimane, a mo raya leina a re Solomone.

²⁵Jehofa a mo rata; mme a roma ka Nathane moperofeti, a mo raya leina a re Jedidia, ka ntlha ya ga Jehofa.

²⁶Jaana Joabe a tlhabana le Raba wa bana ba Amone, mme a gapa motse wa segosi.

²⁷Joabe a roma batho kwa go Dafite a re: “Ke tlhabanye le Raba, ee, ke gapile motse wa dinoka.

²⁸Ke gone jaana, phutha batho ba ba setseng, o thibelelele motse, o o gape; nka tla ka gapa motse, wa reelelwa leina la me.”

²⁹Dafite a phutha batho botlhe, a ya kwa Raba, a o tlhasela, a o gapa.

³⁰A tsaya serwalo sa kgosi ya bone a se tlosa mo tlhogong ya yone; bokete jwa sone bo ne bo le talenta ya gouta, mo go sone go le majana a a tlhokegang; mme sa bewa mo tlhogong ya ga Dafite. A ntshetsa thopo ya motse kwa ntle, e le kgolo thata.

³¹Batho ba ba mo go one a ba ntshetsa kwa ntle, a ba baya fa tlase ga dišage le fa tlase ga dikokola tsa tshipi, le fa tlase ga dilepe tsa tshipi, a ba raladisa bobesetso jwa setene; a direla metse yotlhe ya bana ba Amone jalo. Mme Dafite le batho botlhe ba boela Jerusalema.