2 Samuel 18

¹Dafite a bala batho ba o nang nabo, mme a tlhoma balaodi ba makgolo a makgolo, le balaodi ba makgolo mo go bone.

²Dafite a bolotsa batho ba le dikabo di le tharo: kabo nngwe e laolwa ke Joabe, kabo e nngwe ya laolwa ke Abišai morwa Seruja, monnaa Joabe, kabo e nnge ya laolwa ke Itai wa Mogite. Kgosi ya raya batho ya re: “Ruri le nna ke tlaa bolola le lona.”

³Mme batho ba re: “Ga o bolole, gonne e tlaa re fa re tshaba, ga ba ketla ba re sepe ka rona; le fa re ka a swa bontlha e nngwe ga ba ketla ba re sepe ka rona; mme wena o kana ka batho ba ba 10 000 ba rona; jaana go molemo bogolo wa bo o iketleeditse go re thusa o le mo motseng.”

⁴Kgosi ya ba raya ya re: “Se lona lo se bonang se le molemo bogolo, ke tlaa se dira.” Kgosi ya ema fa kgorong, mme batho botlhe ba tswa ka makgolo le ka makgolo a masome.

⁵Kgosi ya laola Joabe le Abišai le Itai ya re: “Lo mamaisetse lekau leo, e bong Abesalome ka ntlha ya me.” Batho botlhe ba utlwa jaaka kgosi e laela balaodi botlhe ka ga Abesalome.

⁶Batho ba bololela Baiseraele kwa nageng; mme ga tlhabanelwa mo sekgweng sa Eferaime.

⁷Batho ba Iseraele ba lotlelwa gone fa pele ga batlhanka ba ga Dafite, mme ga nna polao e kgolo gone ka tsatsi leo, ya batho ba le 20 000.

⁸Gonne tlhabano e ne e anametse gone mo lefatsheng lotlhe; mme sekgwa sa nyeletsa batho ba le bantsi ka tsatsi leo bogolo go ba ba nyeleditsweng ke tšhaka.

⁹Abesalome a tshogana ka a kopana le batlhanka ba ga Dafite. Abesalome a bo a palame mmoulo wa gagwe, mmoulo wa huhumela dikala tse ditona tsa mooka o motona, tlhogo ya gagwe ya tshwarwa ke mooka, a lepelediwa gare ga legodimo le lefatshe; mmoulo o o fa tlase ga gagwe wa tsamaela pele.

¹⁰Monna mongwe a bona, a bolelela Joabe a re: “Bona, ke bonye Abesalome a akgega mo mookeng.”

¹¹Joabe a raya monna yo o mmoleletseng a re: “Bona, o go bonye, ke ka ntlha yang o se ka wa mo otlelela gone mo mmung? Ke ne ke tlaa go naya dipapetlana tsa selefera di le some, le moitlamo.”

¹²Monna yoo a raya Joabe a re: “Le fa ke ne ke ka bo ke amogela dipapetlana tsa selefera di le makgolo a le some mo atleng sa me, le fa go ntse jalo ke ne ke sa ka ke ka ntshetsa morwa kgosi seatla sa me; gonne mo kutlong ya rona kgosi e laetse wena le Abišai le Itai ya re: ‘Lo itise gore ope a se ka a ama lekau leo, e bong Abesalome.’

¹³Fa nka bo ke ne ke dirile ka boferefere ka ga botshelo jwa gagwe, kaitse ga go na sepe se se lobelwang kgosi, foo le wena tota o ne o tlaa ntswa.”

¹⁴Foo Joabe a re: “Ga ke na go diega nao jaana.” A tsaya diputlela di le tharo, a ya a phololetsa pelo ya ga Abesalome ka tsone, a sa ntse a tshedile a le mo gare ga mooka.

¹⁵Makau a le some a a tshotseng dibolao tsa ga Joabe a hula Abesalome, a mo otlela, a mmolaya.

¹⁶Joabe a letsa lonaka, mme batho ba boa kwa go konateleleng Baiseraele; ka Joabe a rekegela batho.

¹⁷Ba tsaya Abesalome, ba mo latlhela mo lehuting le legolo mo sekgweng, ba koela mokoa o mogolo wa maje mo godimo ga gagwe; Baiseraele botlhe ba tshaba, mongwe le mongwe a ya mogopeng wa gagwe.

¹⁸Jaana ya bo e rile mo botshelong jwa gagwe Abesalome a bo a tlogile a ikagela sefikantswe se se motloutlo, se se mo mogogorong wa kgosi; gonne a re: “Ga ke na ngwana wa mosimane wa go nna segopodiso sa leina la me;” a raya sefikantswe seo leina la gagwe, se bidiwa sefikantswe sa ga Abesalome le gompieno.

¹⁹Foo Ahimaase morwa Satoke a re: “Mma ke siane, ke ise mafoko kwa kgosing, a jaaka Jehofa a e busoloseditse mo babeng ba yone.”

²⁰Mme Joabe a mo raya a re: “Ga o ketla o nna moisamafoko gompeino, o tlaa isa mafoko ka letsatsi le sele; gompieno ga o ise mafoko ape, gonne morwa kgosi o sule.”

²¹Foo Joabe a raya motho wa Mokuše a re: “Ya o bolelele kgosi se o se bonyeng.” Motho wa Mokuše a ikobela Joabe, a siana.

²²Foo Ahimaase morwa Satoke a raya Joabe gape a re: “Le fa go ka nna ka fa go nnang ka gone fela, ke a go rapela, o mme ke siane morago ga motho wa Mokuše.” Joabe a re: “O rata go siana ka ntlha yang morwaaka, ka o se ketla o bona tuelo epe ka mafoko a gago?”

²³Mme a re: “Le fa go ka nna ka fa go ka nnang ka gone, ke tlaa siana fela.” Mme a mo raya a re: “Siana.” Foo Ahimaase a siana ka tsela ya Lobala, mme a sia motho wa Mokuše.

²⁴Jaana Dafite a bo a dutse fa gare ga dikgoro tse pedi tsa motse, molebeledi a palama ditlhomeso tsa kgoro a ya kwa lorakong, a tsholetsa matlho a leba, mme bonang, monna a bo a siana a le esi.

²⁵Molebeledi a kua a bolelela kgosi, mme kgosi ya re: “Fa a le esi o na le mafoko.” A tla fela, a atamela.

²⁶Molebedi a bona monna yo mongwe a siana; molebedi a tlhaeletsa kwa mmuding wa setswalo a re: “Bona, monna yo mongwe o tla a sianye a le esi.” Kgosi ya re: “Le ene o tla le mafoko.”

²⁷Molebedi a re: “Ekete tshiano ya wa pele e tshwana le tshiano ya ga Ahimaase morwa Satoke.” Kgosi ya re: “Ene ke monna yo o molemo, o a ba a tla le mafoko a a molemo.”

²⁸Ahimaase a kua, a raya kgosi a re: “Go siame gotlhe.” A ikobela fa fatshe ka sefatlhogo fa pele ga kgosi, a re: “A go bakwe Jehofa Modimo wa gago, yo o tsentseng mo seatleng sa gago batho ba ba neng ba tsholeletsa kgosi morena wa me letsogo la bone.”

²⁹Kgosi ya re: “A lekau Abesalome le tsogile sentle?” Mme Ahimaase a fetola a re: “E rile Joabe a roma motlhanka wa kgosi, e bong nna motlhanka wa gago, ka bona khuduego e kgolo, ga ke itse go re, e ne e le eng.”

³⁰Kgosi ya re: “Fetela fa thoko, o eme fa.” A fetela fa thoko, a ema a didimetsa fela.

³¹Mme bonang, motho wa Mokuše a tla; motho wa Mokuše a re: “Go na le mafoko a kgosi morena wa me; gonne gompieno Jehofa o go busoloseditse mo go bone botlhe ba ba neng ba go tsogologetse.”

³²Kgosi ya raya motho wa Mokuše ya re: “A lekau Abesalome le tsogile sentle?” Motho wa Mokuše a e fetola a re: “Baba ba kgosi morena wa me, le botlhe ba ba go tsogologelang go go utlwisa botlhoko, a ba nne jaaka lekau leo.”

³³Kgosi ya huduega thata, ya palamela kwa ntlwaneng e e okameng kgoro, ya lela; ya re e tsamaya, ya bua jaana ya re: “Abesalome, morwaake wee! Abesalome, morwaake wee! A bo ke ka bo ke go swetse, Abesalome, morwaake wee! morwaake wee!”