2 Samuel 22

¹Dafite a bua le Jehofa mafoko a sefela se, ka letsatsi le Jehofa o mo golotseng ka lone mo seatleng sa baba botlhe ba gagwe, le mo seatleng sa ga Saule,

²a re: “Jehofa ke lefika la me, le kago ya me ya phemelo, le mogolodi wa me, e bong wa me;

³Modimo wa lefika la me, ke tlaa ikanya mo go one; thebe ya me, le lonaka lwa poloko ya me, kago ya me e e godileng, botshabelo jwa me; mmoloki wa me, wa nkgolola mo thubakong.

⁴Ke tlaa bitsa Jehofa, yo o tshwanetseng go bakwa; jalo ke tlaa gololwa mo babeng ba me.

⁵Gonne makhubu a metsi a loso a ne a ntsentse gare, merwalela ya boikepo ya mpoifisa.

⁶Megala ya Bobipo e ne e ntharile, diru tsa loso tsa nkwela.

⁷Mo pitlaganong ya me ka bitsa Jehofa, Ee, ka tlhaeleletsa kwa go Modimo wa me; wa utlwa lentswe la me o le mo tempeleng ya one, go goa ga me ga tsena mo tsebeng tsa one.

⁸Foo lefatshe la reketla la roroma, metheo ya legodimo ya tshikinyega ya reketlisiwa, ka one o ne a tuka bogale.

⁹Ga kua mosi mo dinkong tsa one, molelo o o tswang molomong wa one wa laila; magala a tshujwa ka one.

¹⁰Wa oba le one magodimo, wa fologa; go ne go le lefifi le le kwenneng tlase ga dinao tsa one.

¹¹Wa palama mo tšherubeng, wa fofa; Ee, wa bonwa mo diphukeng tsa phefo.

¹²Wa dira lefifi go nna maobo tikologong ya one, kgobokano ya metsi, maru a a kwenneng a legodimo.

¹³Magala a molelo a ne a tshujwa ka phatsimo e e fa pele ga one.

¹⁴Jehofa a duma a le kwa legodimong, Mogodimodimo a ntsha lentswe la gagwe.

¹⁵A hula ka metswi a ba phatlalatsa; e bong ka dikgadima, a ba alola.

¹⁶Foo meedi ya lewatle ya bonala, metheo ya lefatshe ya senolwa, ka kgalemo ya ga Jehofa, ka pudulo ya mowa wa dinko tsa gagwe.

¹⁷A roma a le godimong, a ntsaya; a ntshwatola mo metsing a magolo;

¹⁸a nkgolola mo mmabeng wa me yo o thata, mo go bone ba ba nkidileng; gonne ba ne ba le thata bobe mo go nna.

¹⁹Ba ne ba nkwela mo motlheng wa tatlhego ya me; mme Jehofa ya nna ene seitshegeletso sa me.

²⁰O ne a nntshetsa kwa felong fa go atlhameng; a nkgolola, gonne a kgatlhega thata mo go nna.

²¹Jehofa, o ne a ntuela ka fa tshiamong ya me; a ntefetsa ka fa bontleng jwa diatla tsa me.

²²Gonne ke tshegeditse ditsela tsa ga Jehofa, ga ke a tloga mo Modimong ka go ikepa.

²³Gonne dikatlholo tsotlhe tsa gagwe di ne di le fa pele ga me; ka ga melao ya gagwe ga ke a ka ka tloga mo go yone.

²⁴Gape ke ne ke le boitekanelo fa pele ga gagwe, ka ithiba mo boikepong jwa me.

²⁵Ke gone ka moo Jehofa o ne a ntefela ka fa tshiamong ya me; ka fa bontleng jwa me mo ponong ya matlho a gagwe.

²⁶Mo go ba ba kutlwelo botlhoko o tlaa itshupa kutlwelo botlhoko, mo go yo o itekanetseng o tlaa itshupa boitekanelo;

²⁷mo go yo o itshekileng o tlaa itshupa boitsheko; mo go yo o logwadi, o tlaa itshupa lesoko.

²⁸Batho ba ba patikegang o tlaa ba boloka; mme matlho a gago o mo go ba ba ipegang, gore o tle o ba kokobetse.

²⁹Gonne ke wena lobone lwa me, Jehofa; o tlaa bonesa lefifi la me.

³⁰Gonne ke sotlhomela lesomo ka wena; ke tlola lorako ka Modimo wa me.

³¹Ka ga Modimo, tsela ya one e itekanetse; lefoko la ga Jehofa le lekilwe; ene, ke thebe ya botlhe ba ba mo ikanyang.

³²Gonne Modimo e mang, fa e se ene Jehofa? Le gone lefika ke mang, fa e se Modimo wa rona?

³³Modimo ke one kago ya me e e thata ya phemelo; o goga moitekanedi mo tseleng ya one.

³⁴O dira dinao tsa gagwe go nna jaaka ditlhako tsa kwalata, mme o mpeye mo mafelong a me a a godimo.

³⁵O ruta diatla tsa me go tlhabana; jalo mabogo a me a ba a tle a obe bora jwa kgotlho.

³⁶O bile o nneile thebe ya poloka ya gago; bopelonamagadi jwa gago bo ntirile mogolo.

³⁷Dikgato tsa me o di atlhamoloseditse tlase ga me, dinao tsa me ga di a relela.

³⁸Ke konateletse baba ba me, ke ba sentse; le gone ga ke a ka ka bowa ba ise ba nyelediwe pele.

³⁹Ke ba gaitse, ka ba phololetsa, ba ba ba retelelwa ke go tsoga; Ee, ba wetse fa tlase ga dinao tsa me.

⁴⁰Gonne o ntlametse go tlhabana ka nonofo, o kokobeditse fa tlase ga me bone ba ba neng ba ntsogologela.

⁴¹Gape o dirile gore baba ba me ba nnee dikotla, gore ke tle ke tlose bone ba ba nkilang.

⁴²Ba ne ba leba, mme go ne go se na ope yo o bolokang; ba leba e bong kwa go Jehofa, mme a se ka a ba araba.

⁴³Foo ka ba ngotangota bosesane, jaaka lorole lwa lefatshe, ka ba šobotla jaaka moraga wa mebila, ka ba phatlalatsa.

⁴⁴E bile o nkgolotse mo dipetapetanong tsa batho ba gaetsho; o ntshegeditse go tla ke nna tlhogo ya merafe; tšhaba e ke iseng ke e itse e tlaa ntirela.

⁴⁵Baeng ba tlaa inkokobeletsa; e tlaa re ba itlhoma ba nkutlwela, boo ba ineela fela.

⁴⁶Baeng ba tlaa tlhotlhorega, ba tlaa tla ba roroma ba tswa mo maitshubelong a bone.

⁴⁷Jehofa o tshedile; a go bakwe lefika la me; a go goletsege Modimo wa lefika la poloko ya me;

⁴⁸e bong Modimo o o dirafatsang pusoloso ka ga me, o kokobeletse ditšhaba fa tlase ga me;

⁴⁹e le o o ntshawatolang mo babeng ba me; Ee, o a ntsholetsa, o mpaya godimo ga bone ba ba ntsogologelang; wa nkgolola mo monneng yo o thubakang.

⁵⁰Ke gone ka moo ke tlaa go lebogang, Jehofa, mo gare ga merafe, ke tlaa opelela leina la gago dipako.

⁵¹O naya kgosi ya gagwe kgololo e kgolo; o itshupa bopelonomi mo go motlodiwa wa gagwe, mo go Dafite le losika lwa gagwe ka bosakhutleng.”